Read Gangte 2 SAMUEL 24 Bible Online

2 SAMUEL 24 - Gangte bible

2 SAMUEL 24

¹Chun, Israel te chung a chun LALPA lungnatna chu a hung kuong dawk kit ta a, “Chieh inla, Israel mi leh Juda mite sim vekin,” ti’n David chu a sietna dinguh hih dingin a châwk tho a.

²Chun, leng chun a kawma um sepaih lawiupa Joab kawm achun, “Israel nam chengcheng laka hin Dan apat Beer-sheba tiengin tawh viel inla, mi bang zah a hih uh ka het theihna dingin sim suok kêi un,” a ti a.

³Himahleh, Joab chun leng kawmah, “LALPA na Pathien chun mipite hihpung in, bang zah a tam le, a leh za le, lengpa ka pu hin mu mawng he uo; himahlele, lengpa ka pu hin zie chu bang zieka kithalawp na him?” a ti a.

⁴Himahlele, lengpa thu chun Joab leh a sepaihte a thunun ta a. Tichun, Joab leh sepaih lawiupate chu Israel mite sim ding chun lal In apat chuh a pawt tau a.

⁵Jordan lui a va galkai u a. Gad phaicham lai tak simlam panga um Aroer khuo achun ummun a guonggalh tau a. Zie a kipat chun mâllam zuonin Jazer ah a chieh u a,

⁶Hit te gam ah Gilead-ah a chieh pek uh a, Kadesh tiengin a chieh tau a. Chun, Dan ah a chieh uh a, Dan apat chun thanglam ah Sidon tiengin a chieh u a.

⁷Chun, simlam a Tura khawpi kulh nei haw achun a chieh uh a, Hiv te khawpi haw leh Kanaan te khawpi haw a chieh pek in, a tâwp chun Juda simlam panga Beerseba chu a tung tau hi.

⁸Khutichun, tha kuo leh ni sawmnih nung chun gamsung chengcheng a tawh suok zawh nung u chun Jerusalem ah a vaikit tau ui.

⁹Chun, Joab chun mihing zah chu leng a pie a; chun, Israel gam achun chemzâm chawi thei chiet, mi hangsan nuoigiet a um a, Juda mi chu nuoinga a um u a.

¹⁰Himahlele, mi a sim zawh nung chun David lunggil chu ana mah mah mai ta a. Tichun LALPA kawmah, “Zie tawbang thil ka na hih hi, gitlohna nasa tak hih kha ka na hi tai! Himahleh, tuhin Aw LALPA lungsiet takin ei ngaidam in, ngawlhuoi takin thil ka na hih ahi tai!” a ti a

¹¹Chun, zingkal a David a hung thawh phet chun David thiemgau, thiemgau Gad kawmah LALPA thu a hungtung a,

¹²“Chieh inla, David kawmah, LALPA’n hiti hin a tii: thil thum ka hun guot saka, na chunga ka hih ding khat tel in, a tii,” ti’n a ti a.

¹³Tichun, Gad chu David kawmah a va chieh a, LALPA thugen chuh a va hilh a, ziehaw, “Na gam ahin kum thum kiel kiek ahim, na melmate masanga tha thum taihmang ahim, na gamsung a ni thum hipi lên? a ti a. Tuhin ngaihtuoh pha’n la, ei sawlpa bangti a dâwng ding ka him kingaihtuoh in la, ei hilh tie,” a ti a.

¹⁴Chun, David chun Gad kawmah, “Dinmun tizat-um tak mah ah ka ding a, ka lung a zing mah mah zieng a; LALPA khut ah puklut phawt mai leng; a zahngaihna chu a nasa mah mah mai ngâla. Mihing khut achun vang ei puklut sak dah tei tei in,” a ti a.

¹⁵Khutichun, LALPA chun Israel mipite chung achun zingkala kipatin hunbi a guot tieng chun hipi ni thum a lên sak a; tichun, mipi chu Dan apat Beerseba tiengin singsagih a thiu a.

¹⁶Chun,LALPA vânsâwlchâk in Jerusalem hihsie dinga a khut a vak zak leh LALPA’n thil phalo a hih chu a kisik a, mite hih mangthai guo vânsâwlchâk kawm achun, “A hun ta ie, na khut tha ta ki’n,” a ti a. Chun, LALPA vânsâwlchâk chu Jebus-mi Araunah buhphuol kawm achun a um a.

¹⁷Chun, David in vânsâwlchâk mi that chu a muhin LALPA a hopih a, “Ngaitie, Kei hi ka hi a gilo chu, keimah hin diklo takin thil ka na hih ahi tai: himahleh, zie belamte hin bang ahim a hih uh? Na khut chun kei leh ka ka pa insung ei gawt zaw hen,” a ti a.

¹⁸Chun, zie ni chun Gad chu David kawmah a chieh a, a kawmah, “Chieh to inla, Jebus mi Araunah phuol ah LALPA dingin maichâm siem in,” a ti a.

¹⁹Tichun, David chu LALPA thupiek Gad in a hilh bang chun a chieh to ta a.

²⁰Chun, Araunah chu a na dâk viel a, amah lam zuona leng leh a suokte hung chu a na mu a; tichun, Araunah chu a pawt a, a maia lei si’n leng masang achun a bawkkhup a.

²¹Chun, Araunah mah chun, “Bang zieka lengpa ka pu hi a suokpa kawma hung ahi ta’m?” a ti a. David chun, “Mipi laka hipi hi a kithiel theihna dingin LALPA a dinga maichâm siemna dinga na phuol chaw dinga hung ka hi,” a ti a.

²²Chun, Araunah chun David kawmah, “Lengpa, ka pu chun pha a sak dân dân la hen la, entie, hâlmanga piek dingin le bâwngchal haw le a um a, a thing dingin le phuol matchâkte leh bâwngchal van matchâkte le a um hi.

²³Aw lengpa, ziehaw chengcheng hi, Araunah chun leng a pie vek hi,” a ti a. Chun, Araunah mah chun leng kawm achun, “LALPA na Pathien chun hun pawm sak tei hen,” a ti a.

²⁴Chun, David chun Araunah kawmah, “Hi maizen lo e, a man nei in, a chawkin hun châwksak thawh zaw ding ka hi; bangmah cha seng lo in LALPA ka Pathien kawmah hâlmang thilpiekte pie hiel puo’ng ka,” a ti a. Khutichun, David chun phuol leh bâwngchal haw chu dangka sekel sawmnga’n a chaw a.

²⁵Tichun, David chun zie tak achun LALPA dingin maichâm a siem a, hâlmang thilpiekte leh chamna thilpiekte a lân ta a. Khutichun, LALPA chuh a gam chung achun a lungkim ta a, Israel gam apat hipi chuh a kithiel dawk tai.