Read Gangte 2 SAMUEL 5 Bible Online

2 SAMUEL 5 - Gangte bible

2 SAMUEL 5

¹Khutichun Israel suonte chengcheng chu Hebron ah David kawmah a hung u a, “Ngaitie, na mi leh sate ka hiu hi.

²Tuma a Saul ka chungu a a lal lai a Israel te puidawk leh puilutpa na na hi sek a: chun LALPA chun na kawmah, ‘Ka mi Israel te chu vak-in na tin, Israel te chunga lawiupa’n um inla,’ a ti a,” a tiu a.

³Khutichun Israel upa chengcheng chu Hebron ah David kawm achun a chieh u a; chun leng David chun Hebron achun LALPA masangah a kawm u ah thu a gawlh a: tichun David chu Israel te chunga leng hi dingin sathau a nuh tau a.

⁴David chu leng a hih tûng chun kum sawmthum mi ahi a, kum sawmli vai a hawm a.

⁵Hebron achun Judate chungah kum sagih leh tha gup vai a hawm a; Jerusalem ah Israel leh Judate chengcheng chungah kum sawmthum leh kum thum vai a hawm a.

⁶Chun, David leh a mite chu Jerusalem do dingin a kipan dawk u a. Zie gama chêngte Jebus mite chun David in a khawpiu a lak zawh loh gingcha’n ti hin a kawmah a gen u a, “Zie taka hin hung lut hiel puo’n la, mitdûk leh kêngbâite’n hun na nang zo un au,” a tiu a.

⁷Himahlele David chun Zion chu a la ta a, zie chu “David khawpi” ti a het ahi tai.

⁸Chun, David chun zie ni chun, “Jebus mite mudah taphawt in tuilawng chu zui to in va chieh u hen la, mitdûk leh kêngbâite chu va do u hen,” a ti a. Zieziekchun apuo, “mitdûk leh kêngbâite chu LALPA In a chun a lut thei puou,” a tih sek u chu.

⁹Tichun David in kulh chu a lak zawh nung chun zie tak achun a cheng ta a, a min dingin “David khawpi” a vawh ta a. Chun, David chun Millo apat a kimvelin a kulh a siem a, a sung lama tawh.

¹⁰Tichun David chu a hung hât deuh deuh ta a, LALPA sepaihte Pathien chu a kawma a um zel ziekin.

¹¹Chun, Tura leng Hiram chun David kawmah palai a sawl a, sidar thingte a thak a, khutthiemte leh suong sek thiemte le a sawl a, David In ding a sak sak u a.

¹²Chun, David chun LALPA’n Israel mite chunga leng dingin amah chu a hihdet in, a mi Israel te ziekin gam chu a limbawl hi tih chu a he ta a.

¹³Chun, David chun Hebron a pawtsan nung in Jerusalem ah mei leh zi a neih beh a: tichun David chun chapate leh chanute a hun neih beh nalai a.

¹⁴Jerusalem a a cha neihte min chu ziehaw hi ahiu hi; Shammua, Shobab, Nathan, Solomon,

¹⁵Ibhar, Elishua, Nepheg, Japhia;

¹⁶Elishama, Eliada leh Eliphalet ahiu hi.

¹⁷Chun, Philistia mite chun David chu Israel mite leng dinga thau nuh ahi tih a zak un, Philistia mite chengcheng chu David man dingin a chieh to tau a; David in a na het phetin kulh sung ah a chieh lut a.

¹⁸Tichun Philistia mite chu Rephaim guom ah a kitieng u a.

¹⁹Chun, David chun, “Philistia mite do dingin ka va chiehto die? Ka khut ahin amau haw chu nei pie dem?” ti’n LALPA a dawng a. Chun, LALPA chun David kawmah, “Va chieh to in; Philistia mite chu na khut ah hun pie ngêi ngêi ding ka hi,” a ti a.

²⁰Tichun David chu Baal-perazim ah a chieh a, zie tak achun David chun amau haw chu a do ta a, “LALPA’n ka melmate chu tui khuotzak bang mai in ka masangah ei thehdalh sak tai,” a ti a. Zieziekchun zie mun min ding chun “Baal-perazim” a sa ta a:

²¹Chun, zie tak achun a milim hawu a taihsan u a, David leh a mite chun a hâltum sak u a.

²²Chun, Philistia mite chu a chieh to kit u a, Rephaim guom ah a kitieng kit u a.

²³Chun, David in LALPA a vak dawt kit leh amah chun, “Va chieh to ki’n; a nung lam u ah chieh huol inla, thingtheimi kung zawn haw akhun va do in.

²⁴Chun, hiti hi hi’n tin, thingtheimi kung lêka kal thawm tawbang gi hut hut na zak chun, kipan inla, zie chu Philistia sepaihte do dingin na masangah LALPA a pawt tai tihna hi’n a,” a ti a.

²⁵Khutichun LALPA’n thu a piek bang chun David in a hih a; Philistia mite chu Geba apat in Gezer tiengin a that zel ta ahi.