Read Gangte 1 LENGTE 1 Bible Online

1 LENGTE 1 - Gangte bible

1 LENGTE 1

¹Chun, leng David chuh a hung upa a, a hung têk ten ta a; a suokte’n puon haw silh sak mahleu le lum a sa thei diek puoh a.

²Khutichun a siehmang ten a kawmah, “Ka lalpau leng a ding hin nungak hawl hi hen la; leng kawm ahin um zing henla; enkawl hen la; chun, a angsung ah hung kuol henla hileh, tichun, ka lalpau leng hin lum sathei mai ding ahi,” a tiu a.

³Khutichun Israel gam chengcheng achun nungak melhawih a hawl u a, Shunam mi Abishag a va muu a, leng kawm achun ahun pui tau a.

⁴Zie nungak chuh a mel a hawih mah mah mai a; leng chuh a enkawl a, neklechâk a siem saka; himahlele, leng chun a kuolpih puoi.

⁵Chun, Hagith chapa Adonijah chun, “Kei leng hi ding ka hi,” ti’n a kingaisang mah mah a; kangtalai leh sakawl chung chuong mite, mi sawmnga a masanga tai dingin a guonggalh a.

⁶A pa David chun bangtik lai inle, “Bang zieka zie tawbanga hi um na him?” ti’n a dawng in a sulungawi lo kha puoh a; amah hi mel hawih tak le ahi a, a nu’n Absalom zawh a a hin ahi.

⁷Amah chun Zeruiah chapa-Joab leh thiempu Abiathar chuh a hopih a; amau chuh amah lama pang in a panpih sek him uh ahi a.

⁸Himahlele, thiempu Zadok, Jehoiada chapa Benai, thiemgau Nathan, Shimei, Rei leh David mi hangsan haw vang chuh Adonijah lam ah a pang puou hi.

⁹Chun, Adonijah chun belam te, bâwngchal te, gan vak thau haw chuh Zoheleth suong umna achun a that a, zie chuh En-rogel kawma um ahi; chun, leng chapate, a unaute chengcheng leh Juda gama leng siehmang haw chengcheng chuh a chiel a.

¹⁰Himahlele, thiemgau Nathan, Benai, leng milien haw leh a suohpihpa Solomon vang chuh a chiel puoi.

¹¹Khutichun Nathan in Solomon nu Bathsheba kawmah, “Hagith chapa Adonijah leng ahih zieng hi, I lalpau David in a hetphakloh hiel thu hi a na za lo na him?

¹²Zieziekchun tuhin hung in, nangmah bitna ding leh na chapa Solomon bitna ding hun hilh ing ka.

¹³Leng David kawmah va chieh inla, a kawmah, ‘Aw ka lalpa lengpa, nang in, Na chapa Solomon hi, kei nunga leng hung hi ngêi ngêi ding ahi, amah hi ka lalchutphah ahin hung chu ding ahi,’ ti’n na suoknu kawmah hin na kipautiem hilo ahim? Bangti dana Adonijah hi leng a pang mai ahi ta’m?” va ti’n.

¹⁴“Ngaitie, leng na hopih lai takin, keile hung lut ing ka ting, na thu gen chuh hun namdet pih ing ka,” ti’n a gen a.

¹⁵Chun, Bathsheba chuh leng indan ah a va lut a, leng chuh a têk mah mah a, Shunam mi Abishag chun leng chuh a na enkawl a.

¹⁶Chun, Bathsheba chun leng chuh khun in chibai a bûk a, chun, leng chun, “Banga na deih?” a na ti a.

¹⁷Chun, amahnu chun a kawmah, “Ka lalpa, LALPA na Pathien min a kipautiem in na suoknu kawm ahin, ‘Na chapa Solomon hi kei nung ah leng hung hi tei ding ahi, amah hi ka lalchutphah ahin hung chu tei ding ahi,’ ti’n na na gen ta a.

¹⁸Himahleh ngaitie, tuhin, Adonijah hi leng in a pang ta mai a; nang ka lalpa, lengpa hin lah na he puoh ngâl a.

¹⁹Amah chun, bâwngchal te, gan vak thau haw leh belam tamtak a that a, leng chapa chengcheng leh thiempu Abiathar leh na sepaih lawiupa Joab te a chiel a, himahleh, na suok Solomon hi vang a chiel puoi.

²⁰Tuhin ka lalpa lengpa, nang nunga na lal chutphah a kuo a hung chu ding tin na gen ngak in Israel te chengcheng mit na chungah a chu chiet hi.

²¹Khutilochun chuh ka lalpa, lengpa hi a pulepate haw kawma a ihmut tieng leh, kei leh ka chapa Solomon hi thil hihkhiel in ei ngai mai ding ahiu hi,” a ti a.

²²Chun, ngaitie, khutia leng a hopih lai tak chun, thiemgau Nathan chule a va lut a.

²³“Entie, thiemgau Nathan a hung hi,” ti’n leng chuh a hilh u a. Nathan chuh leng masang a va tun chun, a ma achun a mai a lei si’n a bawkkhup a.

²⁴Chun, Nathan chun a kawmah, “Aw lengpa, ka lalpa, ‘Ka nung ah Adonijah hin vai hun hawm intin, ka lal chutphah ah hung chu ding ahi,’ na ti a ahi?

²⁵Tuhin a chieh suk a, kithawihna dingin bâwngchal te, gan vak thau haw, belam te a that a. Leng chapa chengcheng, sepaih lawiupa haw, thiempu Abiathar te a chiel a; ngaitie, a neu un a dâwn khawm u a, ‘Pathien in Leng Adonijah hi humbit hen,’ a tiu hi.

²⁶Amahvang chuh kei na suok ngêi leh thiempu Zadok leh Jehoiada chapa Benaiah leh, na suok Solomon hi chu vang ei chiel puoi.

²⁷Ziehi ka lalpa lengpa thu a hih ahih ngâl chun, ka lalpa lengpa hin a nunga lalchutphah a chu ding hi kuo pên ahim tih na suokte hi na hilh loh hi’n a maw?” a ti a.

²⁸Khutichun leng David chun a dâwng a, “Bathsheba ei hun sap sak kit tiem u,” a ti a. Chun, amahnu chuh leng kawm achun a va chieh a, leng masang achun a va ding a.

²⁹Chun, leng chuh a kipautiema, “Lungkhamna chengcheng a ka hinna humbit pa LALPA hinna sâlin,

³⁰Na kawma LALPA Israel te Pathien min pan in, ‘Na chapa Solomon hi kei nung leh vai hun hawm ngêi ngêi in a, kei thasang in ka lalchutphah ahin hung chu ding ahi,’ ti a ka kipautiemna bang khan, tuni ngêi hinle hih ding ka hi,” a ti a.

³¹Khutichun Bathsheba chuh a maia lei si’n a bawkkhup a, leng chuh chibai a bûk a, “Ka lalpa, leng David hi kumlekhuo’n dam zing hen,” a ti a.

³²Chun, Leng David chun, “Thiempu Zadok leh, thiemgau Nathan leh Jehoiada chapa Benaiah ei va sap sak tiem u,” a ti a. Khutichun amau chuh leng masang achun a hung u a.

³³Chun, leng chun a kawm u ah, “Na lalpau suokte pui unla, ka chapa Solomon hi keimah sabiltung chung ngêi ah chut sak unla, Gihon lui lam ah pui un.

³⁴Chun, thiempu Zadok leh thiemgau Nathan in Israel te leng dingin sathau nuh u hen. Chun, pengkun mût unla, ‘Leng Solomon damsawt hen,’ tiu in, a ti a.

³⁵Tichun amah chuh hun zui to un na tin uh, ka lalchutphah ahin hung chu’n a. Amah hi kei thasanga leng hung hi ding ahi ngâl a; chun, amah hi Israel gam leh Juda gam vaihawm dingin ka guot ahi,” a ti a.

³⁶Chun, Jehoiada chapa Benaiah chun leng chuh a dâwng a, “Amen: LALPA, ka lalpa lengpa Pathien inle khutibang chun ti hen.

³⁷LALPA chu ka lalpa, lengpa kawma a um sek bangin, Solomon kawm ale um zel hen la, ka lalpa leng David lalchutphah sangin, a lalchutphah chuh hih lopi zaw hen,” a ti a.

³⁸Khutichun thiempu Zadok, thiemgau Nathan, Jehoiada chapa Benaiah, Kereth mite leh Peleth mite chuh a va chieh u a, Solomon chuh David sabiltung chungah a chut sak u a, Gihon lam ah a pui tau a.

³⁹Chun, thiempu Zadok chun temple apat sathau kawihna sa ki chuh a la a, Solomon chu sathau a nuh ta a. Chun, pengkun a mût u a; tichun mi chengcheng in, “Pathien in leng Solomon humbit hen,” a tiu a.

⁴⁰Chun, mipi chengcheng chun amah chu a zui to u a, mipite chun châmngaite a mût u a, nasatak in a kipâk u a, a thawm giu chun lei a kithing hiel ta a.

⁴¹Chun, Adonijah leh a mi chielte chengcheng chun guolvak zawh a a thawm u chu a vak zau a. Chun, Joab in pengkun kimut gi a vak zak chun, “Khawpi sunga thawmgi um ta dul dul chu bang ziek ahi ta die aw?” a ti a.

⁴²Khutia a gen lai tak chun, ngaitie, thiempu Abiathar chapa Jonathan a va chieh a; Adonijah chun, “Hung tie, nang vang mi hangsan na hi a chanchin pha hun tun tei inla,” a na ti a.

⁴³Chun, Jonathan chun a dâwng a, Adonijah kawm achun, “Tun lo e, I lalpau leng David in Solomon leng a a siem ahi tai;

⁴⁴amah tawh kitawn in thiempu Zadok, thiemgau Nathan, Jehoiada chapa Benaiah, Kareth mite leh Peleth mite chu leng in a sawl a, leng sabiltung chungah a chut sak a.

⁴⁵Chun, thiempu Zadok leh thiemgau Nathan chun Gihon mun ah Solomon chu leng hi dingin thau a nuh u a; zie apat chun kipâk takin a hung to u a, zie chun khawpi sung a thawng zungzung ahi. Zie chuh ahi na thawm zak u chuh.

⁴⁶Chun, Solomon chule lalgam lalchutphah achun a chu tai.

⁴⁷Zie ban achun, leng siehmang te chun le, ‘Na Pathien in na min sangin Solomon min hi hih phazaw hen la, na lalchutphah sangin a lalchutphah hih lopi zaw hen,’ ti’n I lalpau leng David kipahpih dingin a hung ui. Chun, leng David chuh a luchang a zâlkhun si’n, a lu a kun a.

⁴⁸Chun, leng chun le hiti hin a ti a, ‘LALPA, Israel te Pathien, tuni ngêi a ka lalchutphah a chu ding hun guotpa chu pahchak in um hen, ka mit ngêi in a mu ta hi,’ a tii,” a ti a.

⁴⁹Chun, Adonijah mi chielte chengcheng chu a lau tau a, a kipan u a, amau mazawn chiet uh ah a chieh tau a.

⁵⁰Chun, Adonijah chun Solomon chu a lau ta a; a chieh a, maichâm kihaw chu a tu ta a.

⁵¹Chun, “Ngaitie, Adonijah chun leng Solomon a lau a; ‘Leng Solomon hin a suok hi chemzâm a that lo dingin tuni hin ka kawmah kipautiem phawt hen,’ ti’n maichâm a kite chu a tûi,” ti’n Solomon chu a hilh u a.

⁵²Chun, Solomon chun, “Mi taksan um tak a hihna a suklat phawt chun a samzang khat chale tuol ah kie puo’n a; amahvang chuh, lungthimsie a nei hi tih hetna a um chun thi tei in a,” a ti a.

⁵³Khutichun leng Solomon chun mi a sawl a, maichâm apat chun a va puisuk u a; chun, a hung a, leng Solomon chu chibai a bûk a; Solomon chun a kawmah, “Na In ah chieh ta’n,” a na ti a.