Read Gangte 1 LENGTE 15 Bible Online

1 LENGTE 15 - Gangte bible

1 LENGTE 15

¹Nebat chapa leng Jeroboam in kum sawmlegiet vai a hawm kum chun, Judate chungah Abijah chun vai a hun hawm pan a.

²Jerusalem ah kum thum vai a hawm a. A nu min chu Maakah, Abisalom chanu ahi.

³Amah masanga a pa’n thil gilo a hih chengcheng te khah, ama’n le a hih a: a pu David lunggil bangin a lunggil chuh Pathien lam ah a dik zo puoh a.

⁴Himahlele David ziekin, Jerusalem tungdawk ding leh a nunga a chapa tundawk dingin Jerusalem ah thaumei a neih sak a;

⁵Hit mi Uria chungchâng tihloh in David in LALPA mitmuh a thilpha ahih sek ziekin leh a damsung chengcheng a hih ding a a thupiek taphawt chu a niel khâk loh ziekin;

⁶Rehoboam chuh a damsung cheng chu Jeroboam tawh a kido zing u a.

⁷Abijah chanchin dangte leh a thilhih chengcheng chuh Juda lengte vaihawm lai thu zikna bu ah chun a chuong hilo ahim? Chun, Abijah leh Jeroboam chu a kido sek u a.

⁸Chun, Abijah chu a pilepute kawm achun a ipmu ta a; David khawpi ah a vui tau a: a thasang in a chapa Asa chun vai a hawm ta a.

⁹Israel leng Jeroboam in kum sawmnih vai a hawm kum chun Asa chuh Judate chungah vai a hâwm pan a.

¹⁰Chun, Jerusalem ah kum sawmli leh khat vai a hawm a. A nu min chuh Maakah, Abisalom chanu ahi.

¹¹Asa chun a pu David mah bangin LALPA mitmuh in thilpha a bawl sek a.

¹²Chun, pasal kizuok haw chuh a gam apat in a delhdawk a, a pileputeu in milim a na siem hawu chengcheng te chu a paih dawk vek a.

¹³Chun, a nu Maakah chule milim kihdak-um tak Asher a siem ziekin a lengnu hihna a haihsak a. Asa chun a milim siem chu a satpuk a, Kidron lui ah a hâl a.

¹⁴Himahlele, munsang haw chu a hihbei puoh a: Ahinla, Asa lunggil chuh a damsung chengin LALPA lam ah a phabukim ahi.

¹⁵Chun, a pa’n thil a na latsate leh, amah ngêi in a na latsate, dangkaguo te, sana te, ûmlebel te, chuh LALPA In ah a puo lut a.

¹⁶Chun, Asa leh Israel leng Baasha chuh leng a hih sung cheng u chuh a kido zing u a.

¹⁷Chun, Israel leng Baasha chuh Judate do dingin a chieh to a, Juda leng Asa kawma lut ding leh pawt ding dalna ding chun Ramah khuo a siem ta a.

¹⁸Chun. Asa chun LALPA In a go a na um, dangkaguo leh sana chengcheng chuh a la a, a suokte a pie a; chun, leng Asa chun Damaska khuo a um Suria leng Hezion chapa, Tabrimon chapa Benhadad kawm achun a sawl ta a.

¹⁹A kawmah, “Ka pa leh na pa kikal leh kei leh nang kikala kichamna a um a: ngaitie, dangka leh sana kipahman dingin ka hun thak hi; chun, Israel leng Baasha hin ka gamsung apat a a sepaihte a lâkdawk theihna dingin amah tawh kilemna na siem u kha haihsan mai in,” ti’n a thuthak a.

²⁰Chun, Benhadad chun leng Asa thu chu a na zawp a, tichun Israel khuote chu do dingin a sepaihte chu a sawl a. Ijon khuote, Dan khuote, Abel-beth-maakah khuo te, Kineroth biel chengcheng leh, Naphtali gam chengcheng te chuh a do tau a.

²¹Chun, Baashan in zie thu chuh a na zak phet chun, Ramah khuo a siem chuh a hai a, Tirzah khuo ah a um ta a.

²²Khutichun leng Asa chun Juda gam chengcheng ah thu a than viel ta a; kuomah cha a awl a um puou; tichun Baashan in Ramah khuo a siemna dinga suong leh thing a mat hawu chuh a phieu a. Chun, ziehaw mang chun, leng Asa chun Mizpah leh Benjamin gama Geba khuo a siem a.

²³Asa chanchin dang cheng chengte, a thilhih theih dân cheng chengte, a thilhihdawk chengcheng te, a khawpi siem dawk te chuh Juda lengte vaihawm lai thu zikna bu achun a chuong hilo ahim? Amahvang chuh a teklam in a keng ah natna a hung um ta a.

²⁴Chun, Asa chuh a pilepute kawmah a ipmu ta a, a pu David khawpi ah a pulepate lak ah a vui tau a; a chapa Jehoshaphat chun amah thasang in vai a hawm ta a.

²⁵Chun, Jeroboam chapa Nadab chun Juda leng Asa vaihawm kum nihna achun Israel te chungah vai a hawm pan a, Israel te chungah kum nih vai a hawm a.

²⁶LALPA mitmuh in thil phalo tak a hih sek a, a pa lampi hawh chu amân le a hawh a, Israel te haw a gitloh sakna a, a gitlohna haw tawh.

²⁷Chun, Issakar inkawte laka Ahijah chapa Baashan chun Nadab a do a, Philistia te gama Gibbethon khuo ah Baasha chun a that ta a; Nadab leh Israel te chengcheng in Gibbethon khuo a huol vel lai uh ahi.

²⁸Juda leng Asa lal a kum thumna chun Baasha chun amah a that a, a thasang in ama’n vai a hawm tai.

²⁹Chun, hiti hi ahi a, leng a hung hih phet chun, a sukchimit macheng chun Jeroboam inkawte chengcheng chuh a that zel ta a. LALPA’n Shiloh khuo a a thiemgau Ahijah manga a na gen sa bang khan Jeroboam inkawte chu khatchale a hing hawih puoi.

³⁰Zie chu Jeroboam in a thilhih gitloh ziek leh, Israel chate gitlohna hih dinga a puih ziek a, LALPA Israel te Pathien a suklungnat zieka tung ahi.

³¹Nadab chanchin dangte leh a thilhih chengcheng te chuh Israel lengte vaihawm lai thu zikna bu ah a chuong hilo ahim?

³²Chun, Asa leh Israel leng Baasha chuh a vaihawm sung chengun a kido zing u a.

³³Juda leng Asa vaihawm a kum thumna achun Ahijah chapa Baasha chun Tirzah khuo ah Israel te chengcheng chungah vai a hawm pan a, kum sawmnih leh li vai a hawm a.

³⁴LALPA mitmuh in thil phalo tak a hih sek a, Jeroboam lampi chuh amân le a hawh a, Israel te haw thil hihkhelh sak a a hih gitlohna kha amân le a hih hi.