Read Gangte 1 LENGTE 17 Bible Online

1 LENGTE 17 - Gangte bible

1 LENGTE 17

¹Tishbe mi, Elijah, Gilead gama Tisbea um chun, Ahab kawmah, “LALPA Israel te Pathien, a âng a ka din sek na hinna sâlin ka gen hi: ka thu lo in, kum bang zah ahim sung chu guoh leh dâitui himhim kie puo’n a,” a ti a.

²Chun, LALPA thu chu a kawmah a hung tung a, a kawmah,

³“Zie apat hin pawt inla, suohlam ah chieh inla, Jordan suohlam a um Cherith lui ah va kisel in.

⁴Chun, hiti hi hi’n tin, zie lui tui chu dâwn in na tin; zie mun a chuh nang hun vak dingin vaakte thu ka pie tai,” a ti a.

⁵Khutichun, LALPA thu bang chun a chieh ta a, a va um ta a: Jordan suohlam a um Cherith lui achun a va um ta a.

⁶Chun, vaakte chun zinglam leh chângthâk leh sa a hun puok sak sek u a, nitâk lam leh chângthâk leh sa a hun puok sak kit sek u a; lui tui chuh a dâwn sek a.

⁷Chun, hun chawmkhat lo kâl in hiti hi ahi a, zie gama chu guoh himhim a zuk takloh ziekin lui tui chule a hung kang ta a.

⁸Chun, LALPA thu chu a kawmah a hung tunga,

⁹“Kipan inla, Sidon gama Zarephath khuo ah chieh inla, zie tak achun um in, ngaitie.meithai khat nang hun vak dingin thu ka pie tai,” a ti a.

¹⁰Khutichun Elijah chuh a kipan a, Zarephath khuo achun a chieh ta a; chun, zie khuo kulh kawtkhak chu a va tun chun, ngaitie, meithai khat thing chawm hi a mu a; tichun amah chu a vak sama, “Bel in tui tawmcha ei hun dawpsak tie, vak dâwn ing ka,” a ti a.

¹¹Chun, tui dawm ding a va chieh chu a vak sama, “Chângthâk neukhat le ei hun chawihsak in,” a ti a.

¹²Chun, amahnu chun, “LALPA na Pathien hinna sâlin ka gen hi, Chângthâk vang ka nei puoh a, bel ah changbuong khut dim khat phet leh um a sathau tawmcha mai ka nei; chun, ngaitie, thing nih ahim phet ka chawm a, chieh ing ka ting, kei a ding leh ka chapa a dingin siem ka ting, zie chuh ne’ng ka tingun, thi mai ding ka hi tau hi,” a ti a.

¹³Chun, Elijah chun a kawmah, “Lau ki’n, na gen bang chun va hih in; amahvang chuh, keia ding chângthâk neuchah ei hun siem ma sak sak phawt inla, zie chu ei hun chawihsak inla, zie zawh tieng chuleh nang a ding leh na chapa a ding kisiem nan la.

¹⁴LALPA Israel te Pathien in hiti hin a tii, ‘LALPA’n lei chunga guoh a hun zuk sak macheng chun changbuong bel chuh hawm puo’n tin, sathau um le kang diek puo’n a,’ a tii,” a ti a.

¹⁵Tichun Elijah gen bang chun a va hih a; chun, amahnu leh a chapa tawh a inkuon un ni tamtak a ne tau a.

¹⁶Elijah manga LALPA’n thu a gen bang khan, changbuong bel chu a hawm puoh a, sathau um le a kang diek puoi.

¹⁷Zie thil haw nung chun, hiti hi ahi a, a in neinu chapa chuh a hung dam puoh a, a natna chu a khawk deuh deuh a, a hat a tâwp ta a.

¹⁸Chun, amah chun Elijah kawmah, “Aw nang, Pathien mi, nang leh kei hi bang I hi a ahi? Ka gitlohna ei hetdawk sak ding leh, ka chapa that dinga hung na hi hi uo!” a ti a.

¹⁹Chun, Elijah chun a kawmah, “Na chapa chu ei hun pie tie,” a ti a. Tichun a pawm lai chu a lâksak a, a umna indan achun a pawm to a, amah zâlkhun ah a kuol sak a.

²⁰Chun, LALPA a sama, “Aw LALPA ka Pathien, ka umna nu meithainu chung ahin le a chapa suklup sak in thil phalo tun sak ding na him?” a ti a.

²¹Chun, naupang chungah chun thumvei tak a bawk a, LALPA kawmah a kiko a, “Aw LALPA ka Pathien, ka hun ngên hi, lungsiet takin zie naupang hinna hi amah ahin hun um sak kit in,” a ti a.

²²Chun, Elijah aw chuh LALPA’n a na ngaihthak sak a; tichun naupang hinna chuh amah achun a hun umsak kit a, a hung halh kit ta a.

²³Chun, Elijah chun naupang chu a pui a, insung a pindan lam ah a puisuk a, a nu kawmah a pie ta a. Chun, Elijah chun “Entie, na chapa hi a hing kit tai,” a ti a.

²⁴Chun, numei chun Elijah kawmah, “Tuzet hin chuh Pathien mi na hi takzet hi, na kam a thu hih thutak ahi tih ka he tai,” a ti a.