Read Gangte 1 LENGTE 18 Bible Online

1 LENGTE 18 - Gangte bible

1 LENGTE 18

¹Chun, ni tamtak nung chun hiti hi ahi a, a kum thum kum chun LALPA thu Elijah kawmah a hung tung a, “Va chieh inla, Ahab kawmah va kilang ah; tichun lei chunga hin guoh hun zuk sak ding ka hi,” a tii, va ti’n, a ti a.

²Tichun Elijah chuh Ahab kawma kilang ding chun a chieh ta a. Samari gam achun kiel chu a huoisie ten ngâl a.

³Ahab chun Obadia, a In sunglam lawiupa chu a sama. (Obadia chu LALPA kihcha mi tak ahi a:

⁴Khutia Jezebel in LALPA thiemgaute a thah lai khan, Obadia chun thiemgau zakhat a pui a, kawlpûk ah sawmnga zel in a selgu a, chângthâk leh tui in a vak sek a.)

⁵Chun, Ahab in Obadia kawmah, “Gamsung a tuinak chengcheng leh luiguom umna cheng va tawh viel tie; sakawl leh sabiltungte hih I hukbit theihna dingun hampate I muh sak theih khâk u leh, khutilochun gancha haw hi chan vek khâi tiu,” a ti a.

⁶Khutichun gam tawh viel ding dân chu a kihawm u a: Ahab chu amah mai in lam chuom ah a chieh a, chun, Obadia chuh amah mai in lam dangah a chieh a.

⁷Khutia Obadia a chieh lai chun, ngaitie, Elijah tawh a kituok u a: amah chun a na he a, tichun a khupbawk a, “Ka pu Elijah kha na hi maw?” a ti a.

⁸Chun, amah chun a dâwng a, “Ka hi, chieh inla, ‘Ngaitie, Elijah zie tak akhun a um hi,’ ti’n na pu va hilh in,” a ti a.

⁹Chun, Obadia chun, “Thil bang ka hihkhiel a, na suok hi thah dinga Ahab khuta pie mai ding na him?

¹⁰LALPA na Pathien hinna sâlin ka gen hi, ka pu’n nang hun hawl sak lohna nam leh gam mawngmawng a nei puoi: ‘Zie tak ahin a um puoi,’ a tih u chun a hun muh loh na thuu ah a gam leh nam chu a kipautiem sak zel ahi a.

¹¹Tuhin nangin ‘Chieh inla, ngaitie, Elijah zie tak akhun a um hi, ti’n na pu va hilh in,’ na ti mai a.

¹²Hiti hi hung hi’n tin, ka hun nutsieh sieh leh LALPA thagau in hetlohna ah hun lamang ngâl intin, tichun Ahab ka va hilh a a hun. muh loh chun ei that mai ding ahi: himahlele na suok hin ka tanglak tung apat in LALPA chu ka lau sek ngâl a.

¹³Jezebel in LALPA thiemgaute a thah lai a ka thilhih LALPA thiemgaute laka mi zakhat, sawmnga zelin kawlpûk ah ka selgu a, chângthâk leh tui a ka vak ziehaw kha ka pu hun hilh lo ahiu em?

¹⁴Tuhin nangin, ‘Chieh inla, ngaitie, Elijah chu zie tak a khun a um hi, ti’n na pu va hilh in,’ na ti mai a: va hilh leng ei that mai ding ahi,” a ti a.

¹⁵Chun, Elijah chun, “A maa ka din sek na Sepaihte LALPA hinna sâlin ka gen hi, tuni hin a kawma va kilang ngêi ngêi ding ka hi,” a ti a.

¹⁶Khutichun Obadia chuh Ahab tawh kimu dingin a chieh a, a va hilh ta a: Ahab chule Elijah tawh kimutuoh dingin a chieh ta a.

¹⁷Chun, hiti hi ahi a, Ahab in Elijah a va muh chun a kawmah, “Nang na hi maw, Israel te hih lungkham pa chuh?” a ti a.

¹⁸Chun, amah chun a dâwng a, “Israel te ka sulungkham puoi; nang leh na pa inkuonte na hiu a puo, sulungkham zaw chuh, LALPA thupiekte hih kiheisan a, Baal te na ho zawk tâk na ahin.

¹⁹Khutichun, tuhin Israel te chengcheng leh Baal thiemgau zali leh sawmnga leh, Asher thiemgau zali, Jezebel dawhkhâng a ankuong um sek te khah, Karmel tânga hin samkhawm dingin mi sawl in,” a ti a.

²⁰Khutichun Ahab in Israel chate haw chengcheng kawmah mi a sawl a, thiemgau haw chuh Karmel tâng achun a sam khawm a.

²¹Chun, Elijah chun mipi haw chuh a va naih a, “Lung-awpkai a bang chan a na um ding uh? LALPA chuh Pathien a hih chun zui unla, chun, Baal chu Pathien a hih chun amah chu zui un,” a ti a. Mipite chun kam khat cha’n le a dâwng puou a.

²²Ziephet chun Elijah chun mipite kawmah, “LALPA thiemgau um sun chu kei mai ka hi a; Baal thiemgaute vang chuh mi zali leh sawmnga ahiu hi.

²³Khutichun bâwngchal nih ei hun pieu unla; amauhawn bâwngchal khat kitel u henla, sem nêl u henla, thing chungah kawih u hen la, a nuoia mei tik lo in: chun, ken bâwngchal khat chu guonggalh ing ka ting, thing chungah kawih ing ka ting, mei tik diek lo in:

²⁴Chun, nangun na pathien hawu min chu sam unla, ken le LALPA min chu sam ing ka ting: tichun mei a hun dâwng Pathien taphawt chu Pathien tak hi hen,” a ti a. Mipi chengcheng chun a dâwng u a, “Na gen chu hi hen,” a tiu a.

²⁵Tichun, Elijah chun Baal thiemgaute kawm achun, “Nangun bâwngchal khat hi na chan dingun kitel unla, guonggalh masau un, nanguh a tamzaw na hi ngâl u a; na pathien hawu min chu sam unla, amahvang chuh a nuoi ah mei tik kiu un,” a ti a.

²⁶Tichun bâwngchal a chan uh chu a lau a, a guonggalh u a, chun, zingkal apat in sun tiengin Baal min chu a sam u a, “Aw Baal, ei hun dâwng in,” a tiu a. Himahlele, aw gi leh dawnna himhim a kihe puoi. Chun, a maichâm siem uh chung achun a kichawm sausau u a.

²⁷Sun a hung hih phat chun hiti hi ahi a, Elijah chun amau haw chu êngho in, “Kiko ngeih deuh un: pathien khat ahi ngâl a; a kingaihtuoh tadih ahim, a kiselmang tadih ahim, khuolzin ahim, ahihloh leh a ipmu phawn halh ding ahim hi’n a,” a ti a.

²⁸Khutichun ngeih tak in a kiko u a, a hih sek guol mah un chemcha leh thik zum in thi pawt zeng zung in a kisun un a ki-ât u a.

²⁹Chun, ni a hung kihei phet chun hiti hi ahi a, nitâk lam kithawih hun tiengin a sam a sam mai u a; himahlele aw gi mawng mawng a um ta puoh a, a dawng mawngmawng a um puoh a, a na ngaihsak mawngmawng le a um diek puoi.

³⁰Tichun, Elijah chun mipite chengcheng kawm achun, “Ei hun naih tiem u leh,” a ti a. Chun, mipite chengcheng chun a va naih uh a. Amah chun LALPA maichâm suksietsa chu a siempha a.

³¹Chun, “Na min chu Israel hi tan a,” ti a LALPA thu a na tunna, Jakob chate nam sawmlenih dungzui chun Elijah chun suong chu a la a;

³²zie suonghaw chun LALPA min in maichâm a siem a; chun, maichâm kimvel chu tui tehna nih dawl ding khawpa lien in a lai kuok a.

³³Chun thing chu maichâm chung achun a kawih a, bâwngchal chu a sem nêl a, thing chung achun a kawih a. “Bel li sung ahin tui sudim unla, hâlmang thillat leh thing hi hun buokkhum un,” a ti a.

³⁴Chun, amah chun, “Hun sunkhum kit un,” a ti a, amau chun a vak sunkhum kit uh a. Amah chun, “Hun sunkhum beh na a lai un,” a ti a, amau chun a sunkhum kit u a.

³⁵Tichun, maichâm kimvel achun tui chu a luong viel ta a: a laihkuokna hawu a chun le tui a dim suok ta a.

³⁶Nitâk lam kithawih hun vel chun hiti hi ahi a, thiemgau Elijah chun a va naih a, “Aw LALPA, Abraham te, Isak te, Jakob te Pathien, nang hi Israel gam ahin Pathien na hi a, kei hi na suok ka hi a, ziehaw chengcheng hi nangmah thu a ka hih ahi tih hi tuni hin heu hen.

³⁷Zie mipite hin nang hi LALPA Pathien na hi tih a het u a, a lunggil teu na hei sak tai tih a hettheih na dingun, Ei na ngaihthak sak inla, Aw LALPA, ei na ngaihthak sak in,” a ti a.

³⁸Tichun LALPA mei chuh a hung kie a, hâlmang thillat te, thingte, suongte leh leivui haw chu a kamang a, lei a laihkuok a tui chule a hîp kang vek ta a

³⁹Chun, mipite chengcheng in zie chuh a vak muh phet un, a khupbawk u a, “LALPA chu Pathien ahi; LALPA chu Pathien ahi,” a tiu a.

⁴⁰Chun, Elijah chun a kawm u ah, “Baal thiemgau haw hi man unla, khatchale thahsuok kiu,” a ti a. Amau chun a man u a: Elija chun Kishon lui ah a pui tha suk a, zie tak achun amau haw chu a that vek ta a.

⁴¹Chun Elija’n Ahab kawmah, “Va chiehto in la, ne’n la dâwn in; guohpi zu ding thawm a um hi,” a ti a.

⁴²Khutichun, Ahab chu ne leh dâwn dingin a va chieh to a. Elijah chu Karmel tângsip lam ah a va chieh to a: chun, lei lam ah a khun a, a khûp kal ah a mai a silut a.

⁴³A suokpa kawmah, “Va chieh to inla, tuisuohgiet lam va entie,” a ti a. Chun, a va chieh a, a vak en a; “Bangmah a um puoi,” a ti a; Chun, amah chun, “Sagih vei chieh kit in,” a ti a.

⁴⁴Chun, sagih veina achun hiti hi ahi a, “Ngaitie, Tuisuohgiet apat in mei neucha, mihing khut tieh phet a chieh to hi,” amah chun ahun ti a. Chun, Elijah chun, “Chieh to inla, Ahab kawmah, na kangtalai siem inla, chieh suk ta’n, guoh in hun huom khan a, va tih,” a ti a.

⁴⁵Chawmlokal in hiti hi a hung hi a, van chu huih leh mei haw chun a hung dup keihkuih zieng ta a; guohpi nasatak a hung zu ta a.

⁴⁶Chun, LALPA khut chu Elijah chungah a um a; a kâwng a gâk a, Ahab ma achun Jezreel tiengin a tai ta a.