Read Gangte 1 LENGTE 20 Bible Online

1 LENGTE 20 - Gangte bible

1 LENGTE 20

¹Chun, Suria leng Benhadad in a sepaihte chengcheng a sam khawm a: leng sawmthum leh nih tawh, sakawl haw leh kangtalai haw tawh: Samari khuo a va huol a, a va do ta a.

²Chun, khawpi sunga Israel leng Ahab kawmah mi a sawl a, “Benhadad in hiti hin a tii;

³‘Na dangka leh na sana haw kha kei a ahi; na zite leh na chate a hawih pên pên te le keia ahi,’ ti’n” a ti a.

⁴Chun, Israel leng chun a dâwng a, “Aw lengpa, hepu, na gen bang chu ahi nai; kei leh ka neih chengcheng chu nang ahi,” a ti a.

⁵Chun, a mi sawlte chuh a chieh kit u a, “Benhadad in hiti hin a tii, ‘Na dangka te, na sana te, na zite, na chate chuh nei piek ding ahi ti’n na kawmah mi ka hun sawl ngut a;

⁶Himahlele, zing tuphat vel hin ka mite na kawmah hun sawl ing ka ting, na In leh na mite In chuh a hun lawn dinguh ahi a; chun, hiti hi hi ding ahi, na mit la taphawt chu lau untin, bang hitaleh a khut un chawi untin, pawmang vek un au,’ a tii” ti’n.

⁷Tichun, Israel leng Ahab chun a gama upahaw chengcheng chu a sam khawm a, “A na tiemteh un, zie pa hin thil phalo tak a hih guot hi heu un: ka kawmah mi a hun sawl a, ka zite, ka chate, ka dangka te, ka sana te a hun ngên a, a na niel le ka hi puoh ngâl a,” a ti a.

⁸Chun, upate chengcheng leh mipite chengcheng chun a kawmah, “A na ngaihsak ki’n la, lem le sakpih diek kih,” a tiu a.

⁹Khutichun, Benhadad mi sawlte kawmah chun, “Lengpa, ka pu kawm achun, ‘Na suok kawma mi sawl a na hun nget masak chengcheng khah hih ing ka; amahvang chuh zie thil hi hih thei puo’ng ka, a tii’ tiu in,” a ti a. A mi sawlte chu a chieh kit u a, thu chuh a va tun kit u a.

¹⁰Chun, Benhadad in a kawmah mi a sawl kit a, “Ka nungzuite chengcheng hin Samari khuo leivui khutdim khat chiet a a chan u a ahihleh, pathiente chun a nawp nawp ei lawh u hen la, zie sanga nasa zaw chun le,” a ti a.

¹¹Chun, Israel leng chun a dâwng a, “Mi a kigalvan lai tak in, a gâlvan suoh tha bang takin a chapo ngei puou hi, ti’n va hilh un,” a ti a.

¹²Chun, hiti hi ahi a, a puon-In teu a amah leh a miliente’n zu a dâwn lai u chun Benhadad in zie thu chu a hun za a, a mite kawm achun, “Kisau un,” a ti a. Tichun khuo chu va do ding chun a kisa tau a.

¹³Chun, ngaitie, Israel leng Ahab kawmah thiemgau khat a hung a, a kawmah, “LALPA’n hiti hin a tii: ‘Zie mipi tamtak haw hi na mu? ngaitie, tuni hin na khut a hun pie ding ka hi. Chun, Kei hi LALPA chu ka hi tih he’n la,’ a tii,” a ti a.

¹⁴Chun, Ahab in, “Kuo mang in em?” a ti a. Chun, amah chun, “LALPA’n tihin a tii, ‘Gam kaih khat a lawiupate tangvalte mang hin,’ ti’n,” a ti a. Chun, amah chun, “Kuo a gâl matawng ding?” a ti a. Amah chun a dâwng a, “Nang inla,” a ti a.

¹⁵Tichun amah chun gamkaih khat a lawiupate tangvalte chuh a sim a, zanih leh sawmthum leh nih ahiu a: zie zawh chun mipi chengcheng, Israel chate cheng chu a sim a, sangsagih ahiu a.

¹⁶Chun, sun lai tak hin a va pawt tau a. Himahlele, Benhadad chu amah panpih leng sawmthum leh nih te tawh amah leh lengte chu puon-In achun zu a na dâwn u a, amah ngêi chu zukham in a na um ta a.

¹⁷Chun, gamkaih khata lengte tangvalte chuh a va pawt masau a, Benhadad in mi a sawl a, amau chun, “Samari khuo apat a hung pawt a um ui,” ti’n a hilh u a.

¹⁸Chun, amah chun, “Kicham guo a hung a hih u leh a hing in a na man unla, kido guoa hung a hih u leh a hing mah in a na man un,” a ti a.

¹⁹Tichun, gamkaih khat a lawiupate tangvalte leh a hun zui sepaihte chu khawpi apat chun a hung pawt uh a.

²⁰Chun, mitin in a kilanpihteu chiet chuh a va that u a. Tichun Suria te chuh a taisie tau a, Israel te chun a delh u a; Suria leng Benhadad chuh sakawl chung achun sakawl chung chuong mihaw tawh a taidawk tau a,

²¹Chun, Israel leng Ahab chu a va pawt a, sakawl leh kangtalaite chuh a va do a, a va that lemlum zieng ta a.

²²Chun, thiemgau khat chu Israel leng Ahab kawm achun a va chieh a, a kawmah, “Chieh kit inla, na sepaihte guonggalh hawih in, kum a hung beih tieng leh Suria leng chun hun do kit ding ahi,” a ti a.

²³Chun, Suria lengpa suokte chun a kawmah, “A Pathien u hi tâng pathien ahi a, zieziekchun ahi Israel te’n ei zawh tâk u hi; phaicham ah kido leuhing zo ngêi ngêi hitiu.

²⁴Hitibang hin hih in: lengte hi a bawn un theng vek inla, a thasang un gam vaipawte haw hi kawih inla;

²⁵Chun, sepaihte sakawl leh kangtalaite, na mansak zah mah kha sepaih phut dawk kit inla; tichun phaicham ah do hiting un, tichun amau sang chun hatzaw ngêi ngêi hitiu,” a tiu a. Tichun a thuu chu a zawp a, khutibang chun hih ta a.

²⁶Chun, a kum kit chun hiti hi ahi a, Benhadad in Suria te chuh a va sim a; Israel te do dingin Aphek khuo ah a va chieh to a.

²⁷Chun, Israel chate chu a kisim u a, nek dingte a lakhawm u a, do ding chun a kuon tau a; Israel chate chuh kelno tawmcha hawn nih bang phetin a ma âng u ah a va kikulh uh a; Suria te vang chuh a gam a gam in a dim uh a.

²⁸Chun, Pathien mi khat a hung a, Israel leng kawm achun, “LALPA’n hiti hin a tii: ‘Suria te hin LALPA chu tâng pathien ahi a, phaicham pathien ahi puoi a tiu hi; zieziekchun zie mipi tamtak haw hih na khut ah hun pie ding ka hi, tichun kei hi LALPA chu ka hi tih he’n lau,’ a tii” ti’n.

²⁹Tichun, ni sagih sung chuh a kichâng tuoh uh a. A ni sagih ni chun a kido tau a; Israel chate chun Suria te sepaih nuoikhat chu ni khat in a that tau a.

³⁰A suokchate chuh Aphek khawpi sung ah a tai lut u a, a na umte mi singnih leh sangsagih chu kulh chim in a delh lum a. Benhadad chule a taisie a, khawpi sunga indan sunggil ah a lut ta a.

³¹Chun, a suokte’n a kawmah, “Ngaitie, Israel inkuon laka lengte hi mi lungsiet thei tak ahiu hi tih thu ka zau hi: kawlladip puon cheng in, ka luchang uh khauhuol a gâk in Israel leng kawmah ei va chieh leuhing; amah chun a hun hing hawih nuom kha mawh dem,” a tiu a.

³²Khutichun kawlladip puon a cheng uh a, a luchang uh khauhuol in a gâk uh a, Israel leng kawm achun a va chieh tau a, “Na suok Benhadad in, ‘Lungsiet takin ei hing hawih hen,’ a tii,” a tiu a. Ahab chun, “A dam nalai ahi maw? Ka suohpihpa ahi apuo,” a ti a.

³³Tichun, zie mite chun lungmuong takin, a lunggil taktak gen hi’n a tih gingcha’n, “Na suohpihpa Benhadad ahi,” a tiu a. Tichun amah chun, “Va chieh unla hun pui un,” a ti a. Tichun Benhadad chu a pawt a, a kawmah a chieh a; chun, amah chun kangtalai ah a na chut sak a.

³⁴Benhadad chun a kawmah, “Ka pa’n na pa apat a khawpihaw a na laksa haw kha hun pie kit ing ka ting: ka pa’n Samari khuo kawtthêl mun a siem bang khan Damaska khuo ah na kawtthêl mun ding kisiem ding na hi,” a ti a. Ahab chun, “Zie banga thutiem um chun hun thahdawk ing ka,” a ti a. Khutichun a kawmah thutiem a bawl a, a thahdawk ta a.

³⁵Chun, thiemgau chapate laka mi khat hin a invengpa kawmah, “LALPA thu’n ei zêp in,” ti’n a ngên a. Amah chun a zêp nuom puoh a.

³⁶Ziephet chun a kawmah, “LALPA thu na zawp loh ziekin, ngaitie, ka kawma pata na pawtdawk phat phat leh, sakeibaknei in hun pet in a,” a ti a. Chun, a pawt phet chun sakeibaknei in a na mu a, a that ta a.

³⁷Chun, midang a mu kit a, “Ei hun zêp in,” ti’n a ngên a, zie mi chun a vak zêp a, a zêp liem ta a.

³⁸Khutichun thiemgau chuh a chieh a, lampi ah leng chu a na châng a, a chal gâkna’n a mit khuh in a kisiem zatchuom a.

³⁹Chun, leng chuh a hung phet chun thiemgau pa chuh leng kawmah a hung kiko dawk a, “Na suok hi kidona phuol a ka va chieh leh, ngaitie, mi khat a hung kilehkit a, amah chun ka kawmah, mi khat a hun pui a, zie mipa hi a na veng inla, na thahsuok a ahih leh amah hinna sik in nang hinna na piek ding ahi; ahihloh leh dangka talent khat na piek ding ahi, ei ti a.

⁴⁰Chun, na suokpa hi ka hah buoi bêk ziekin, amah chu a na taimang tai,” a ti a. Israel leng chun a kawmah, “Na thutan nau bang taka chuh a um ngêi ngêi ding ahi, nangmah ngêi in a man na piek ding ahi,” a ti a.

⁴¹Chun, amah chun a mit apat chal gâkna chuh a hâwkdawk a; tichun Israel leng chun thiemgaute laka mi ahi tih a he ta a.

⁴²Chun, amah chun a kawmah, “LALPA’n hiti hin a tii: ‘Sukmangthai dinga ka guotsa chuh na pawtdawk sak tâk ziek in a hinna sik in nang hinna, a mite sik in na mite cha’n inla,’ ti’n,” a ti a.

⁴³Chun, Israel leng chu ngui tak leh lungkim lo tak chun a chieh a, Samari khuo chu a tung ta a.