Read Gangte 1 LENGTE 22 Bible Online

1 LENGTE 22 - Gangte bible

1 LENGTE 22

¹Chun, kum thum sung chu Suria te leh Israel te chu kido lo in a um u a.

²Chun, a kum thumna achun hiti hi ahi a, Juda leng Jehoshaphat chuh Israel leng Ahab kawmah a va chieh suk a.

³Chun, Israel leng chun a miliente kawmah, “Gilead gam a Ramoth khu ei uh a ahi tih hezing ngâl a bangtia Suria leng hih lâksak lo a um mai I hiu hi leh?” a ti a.

⁴Chun, Jehoshaphat kawm achun, “Ramoth-gilead khuo hi nei hung dopih nuom die?” a ti a. Jehoshaphat chun Israel leng kawm achun, “Keia chuh nang a ahi a, ka mite chule nang mite ahiu a, ka sakawlte chu nang sakawlte ahiu,” ti’n a dâwng a.

⁵Chun, Jehoshaphat chun Israel leng kawmah, “Tuni hin LALPA thu hungaih tadih in,” a ti a.

⁶Khutichun, Ahab chun Thiemgau zali hiel a sam khawm a, a kawm u ah, “Ramoth-gilead do dinga va kuon ding ka him, va kuon lo ding?” a ti a. Amau chun, “Va kuon in, LALPA’n leng khut ah pie ding ahi,” a tiu a.

⁷Himahlele Jehoshaphat chun, “Zie tak ahin LALPA thiemgau dang I vak dawt dinguh a um puou em?” a ti a.

⁸Chun, Israel leng chun Jehoshaphat kawmah, “LALPA ei uh a dinga ei dawt sak thei ding mi khat Imlah chapa Mikaiah vang a um kha uo. Himahleh, amah hi chu ka mudah chi tak ahi; ka chungchâng thu hi a sie lam chauh lo ngâl, a phalam himhim a gen ngei puoh ngâl a,” a ti a. Chun, Jehoshaphat chun, “Leng in khutibang chun gen kihen,” a ti a.

⁹Tichun Israel leng chun lawiupa khat a vak sama, “Imlah chapa Mikaiah kha hun pui vak tie,” a ti a.

¹⁰Chun, Israel leng leh Juda leng Jehoshaphat chun Samari kulh kawtkhak lutna kienga mun-âwng achun a leng puon u a kivan in a lalchutphah gel u ah a chuu a; tichun thiemgau chengcheng te chun a masang u ah hilhlawkna thu a gen chiet u a.

¹¹Chun, Kenaanah chapa Zedekia chun thik kite a siem a, “LALPA’n hiti hin a tii: ‘Ziehaw mang hin Suria chu do in na tin, sumangthai vek inla,’ a tii,” ti’n.

¹²Khutibang mah chun thiemgau dangte chun le, “Ramoth-gilead achun va chieh to inla, va do in, zo ding na hi, LALPA’n leng khut ahin hun pie ding ahi,” tin a gen u a.

¹³Chun, thiemgau Mikaiah va sam dinga a sawlpau chun a kawmah, “Ngaitie, thiemgaute chun lungkiguol takin a phalam in leng kawma hin thu a gen chiet u a; a gen bang bang u chu hun gen inla, a phalam in hun gen in aw,” tin a gen a.

¹⁴Chun, Mikaiah chun, “LALPA hinna sâlin ka gen hi, LALPA’n ka kawma a gen mai chuh ahi ka gen ding chuh,” a ti a.

¹⁵Khutichun leng kawm a va tun chun, leng chun a kawmah, “Mikaiah, Ramoth-gilead do dinga va kuon ding ka him, va kuon lo ding?” a ti a. Mikaiah chun a dâwng a, “Va kuon inla, va lawhting in, LALPA’n leng khuta pie ding ahi,” a ti a.

¹⁶Chun, leng chun a kawmah, “LALPA min a thudik lo ngâl chu ka kawma gen lo dingin bang zah vei ahim ka hun kipautiem sak ding?” a ti a.

¹⁷Chun, Mikaiah chun, “Israel te chengcheng chuh chingpa neilo belam banga tânghaw a vak zak in ka mu a; LALPA’n, ‘Ziehaw hin puitu a nei ta puou a, mitin amah In lam chietah lungmuong takin chieh mai u hen,’ a tii,” a ti a.

¹⁸Chun, Israel leng chun Jehoshaphat kawmah, “Ka chungchâng thu hi a sie lam tihloh chu a phalam mawngmawng chu gen puon a tih ka hun hilh hilo ahim?” a ti a.

¹⁹Chun, Mikaiah chun, “Zieziekchun LALPA thu hi ngaitha tie, LALPA chu a lalchutphah a chu ka mu a, van a mipi chengcheng, a changlam leh a veilam a ding te tawh.

²⁰Chun, LALPA’n, ‘Ahab hi Ramoth gilead khuo a va chieh a, gâla thi dingin kuo a va thêm ding?’ a tii. Mi khat in hiti hin a ti a, mi dangin khutibang chun a ti a.

²¹Tichun thagau khat hi a hung pawt a, LALPA masangah a dinga, ‘Ken thêm ing ka,’ a ti a.

²²Chun, LALPA’n a kawmah, ‘Bangti’n na thêm die?’ a ti a. Amah chun, ‘Va chieh ing ka ting, a thiemgauteu mûk a khun thagau lepchieh va hi’ng ka ting,’ a ti a. LALPA chun, ‘Va thêm in na tin, lawh le lawh ting inla; va chieh inla, khutibang chun va hih in,’” a ti a.

²³“Zieziekchun tuhin ngaiin, LALPA chun, zie na thiemgaute chengcheng mûk ahin thagau lepchieh a kawih a, na chungchâng thu hi a phalo lama LALPA’n a gen sa ahi tai,” a ti a.

²⁴Himahleh, Kenaanah chapa Zedekiah chun a hun naih a, Mikaiah bieng chuh a hun bêng a, “LALPA thagau chun na kawma thu gen dingin khawilam ah ahim ei chieh san?” a ti a.

²⁵Chun, Mikaiah chun, “Ngaitie, indan sunggil a kisel dinga na lut ni leh he’n la,” a ti a.

²⁶Chun, Israel leng chun, “Mikaiah hi pui unla, khawpi vaipawpa Amon leh leng chapa Joash kawmah chiehpih kit tau in;

²⁷Chun, a kawm u ah, leng in hiti hin a tii, ‘Zie pa hi suongkul ah khum unla, lungmuong taka ka hungkit macheng, gimthawkna an leh gimthawkna tui a na pieu un,’ tiu in,” a ti a.

²⁸Chun, Mikaiah chun, “Lungmuong taka na hung vaihkit himhim chun, LALPA’n kei hi mang in thu a gen loh hi’n a,” a ti a. “Aw mipite haw, na bawn un ka gen hi a na zau un,” a ti a.

²⁹Khutichun, Israel leng Ahab leh Juda leng Jehoshaphat chu Ramoth-gilead khuo achun a va chieh to u a.

³⁰Chun, Israel leng chun Jehoshaphat kawmah, “Kisiem lamdang ing ka ting, kidona achun va chieh ing ka; nang chun chuh na leng puon silh inla,” a ti a. Tichun Israel leng chuh a kisiem lamdang a, kidona achun a va chieh a.

³¹Chun, Suria leng chun a kangtalai chunga lawiupa sawmthum leh nih te kawmah chun, “Israel leng tihloh chu mi neu le, mi lien le kuomah do kiu in,” ti’n thu a pie a.

³²Chun, kangtalai chunga lawiupate chun Jehoshaphat a vak muh u chun, Israel te leng hi ngêi ngêi in a, a tiu a; tichun do dingin a huol tau a. Chun, Jehoshaphat chu a hung kiko dawk ta a.

³³Chun, hiti hi ahi a, kangtalai chunga lawiupate chun Israel leng ahi puoi tih a het phet u chun, a delh lai u chuh a hai kit tau a.

³⁴Chun, mi khat hin a thalpi a luoi a, tup chuom nei lo in a vak kap a, Israel leng Ahab chuh a awmphaw leh awmphaw kikal tak a kap kha a: tichun a kangtalai tawlpa kawmah chun, “Kai hêi inla, sepaihte lak apat hin ei puidawk in, liemna huoisie tak ka tuok tai,” a ti a.

³⁵Chun, zie ni chun kidona chuh a nasa mah mah a; leng chu a kangtalai achun Suria te muhin a dinsak u a, mahleh nitâk lam chun a thi ta a: amah a kap liem nau apat chun thisan chu a hung luong dawk a, kangtalai sung ah a luong zung zung a.

³⁶Khutichun ni tum ding kuon vel chun, sepaihte haw lak ah, “Mitin amah khuo lam chiet ah, mitin amah gam lam chiet ah chieh mai tau hen,” ti’n a kiko viel tau a.

³⁷Khutichun leng chu a thi ta a. Samari khuo lam ah a puou a; Samari khuo achun a vui tau hi.

³⁸Chun, kangtalai chu Samari khuo a dîl a chun a sawp u a; tichun LALPA thugen bang ngêi chun uicha ten a thisan chu a liek u a. Chun, nawhchizuokte le zie chun a kisil sek ui.

³⁹Chun, Ahab chanchin dangte, a thilhih chengcheng te, saiha a In a sakte, a khuo siem chengcheng te chuh Israel lengte vaihawm lai thu zikna bu ah a kizik hilo ahim?

⁴⁰Khutichun Ahab chu a pulepate kawm achun a ipmu ta a; a chapa Ahaziah chu a thasang in vaihawm in a pang ta a.

⁴¹Chun, Israel leng Ahab vaihawm a kum lina ah Asa chapa Jehoshaphat chu Judate chungah vaihawm in a um a.

⁴²Jehoshaphat chu a lal pat lai chun kum sawmthum leh nga ahi a; Jerusalem khuo ah kum sawmnih leh nga vai a hawm a. A nu min chu Azubah ahi a, Shilhi chanu ahi.

⁴³Chun, a pa Asa lampi hawh chengcheng chu amân le a hawh a; petsan lo hiel in LALPA mitmuh in thilpha a hih sek a; ahinla munsangte chu a suchim puoh a, munsang haw achun mite chu a kithawi sek u a, gimlim te a hâl zing sek ui.

⁴⁴Chun, Jehoshaphat chun Israel lengpa tawh kichamna a siem u a.

⁴⁵Jehoshaphat chanchin dangte, a thilhih theih zie a hihlat thu haw, a galdo thu haw chu Juda lengte vaihawm lai thu zikna bu ah a kizik hilo ahim?

⁴⁶Chun, a pa Asa damlai a pasal kizuok haw a na um nalai haw khah a gam apat a nawhdawk vek a.

⁴⁷Chun, Edom gam achun leng a um puou a, leng thasang te chun vai a hawm zawu hi.

⁴⁸Jehoshaphat chun Ophir a sana puo ding Tarshis kuongte a siem a; himahlele a chieh ta puou; Ezion-geber mun ah kuonghaw chuh a siet vek ziek in.

⁴⁹Tichun, Ahab chapa Ahaziah chun Jehoshaphat kawmah, “Ka mite hih na mite tawh kuong ah chieh khawm u hen,” a ti a. Himahlele Jehoshaphat chun pha a sa puoh a.

⁵⁰Chun, Jehoshaphat chu a pulepate kawmah a ipmu ta a, a pulepate lak ah a pu David khawpi ah a vui tau a; a chapa Jehoram chun a thasang in vai a hawm ta a.

⁵¹Chun, Juda leng Jehoshaphat vaihawm a kum sawm leh sagihna ah Ahab chapa Ahaziah chun Samari khuo ah Israel te chungah vai a hawm pan a, Israel te chungah kum nih vai a hawm hi.

⁵²Amah chun LALPA mitmuh in thil phalo a hih a, a nu leh a pa lampi hawhte chu a hawh sek a, Israel te gitloh sakpa Nebat chapa Jeroboam lampi hawhte chu a hawh hi.

⁵³Chun, a pa thilhih tawbang haw chu hih in Baal a ho a, a na a sem sek a, LALPA Israel te Pathien chuh a sulungna sek hi.