Read Gangte 1 LENGTE 3 Bible Online

1 LENGTE 3 - Gangte bible

1 LENGTE 3

¹Chun, Solomon in Aigupta leng Pharaoh tawh kichênna lam ah kizawpna a siem a, Pharaoh chanu chu a kichênpih a. Amah In leh LALPA In ding a sak zawh macheng leh Jerusalem khuo kulh a um suok macheng chun David khawpi a um dingin a pui ta a.

²Zie masang chun LALPA min a In kisa a um nailoh ziekin, mipi haw chu mun sang haw a chun a kithawi sek ui.

³Chun, Solomon chun LALPA a hehpih a, a pa David thuguot haw chu a zawp sek a; mun sang haw achun a kithawi a, gimlim haw a hâl sek a.

⁴Chun, leng chu kithawi dingin Gibeon khuo ah a chieh a; zie chu mun sang lien tak ahi ngâl a. Solomon chun zie maichâm chung achun hâlmang thillat sangkhat zet a pie ta a.

⁵Chun, Gibeon khuo achun LALPA chu zan in Solomon kawmah a mang in a hung kilak a; Pathien chun, “Banga ka hun piek ding, ngên in?” a ti a.

⁶Chun, Solomon chun, “Na suok ka pa David kha na mitmuh in thutak leh kitûp leh lunggil diktak pu a a um bang khan nangin a chungah zahngaihna nasatak na na sulang a; nangin zie phatna nasatak chu amah dingin na kawih sak a, a lalchutphah a chu ding chapa na pie a, tuni a a hung um tâk ngêi bang hin.

⁷Tichun, tuhin Aw LALPA ka Pathien, nangin na suok hi ka pa David thasang in leng in na hun siem ta a; kei vang naupang cha ka hi a; thu lut leh pawt bang ahim tih ka he puoi.

⁸Na suok hi na mipi na tel haw, mi tamtak, a tam ziek u a simsen guolloh leh a zah het sen guolloh haw laka hi um ka hi a.

⁹Khutichun na mipi haw vaihawm sak na dingin na suok hi chitna lunggil ei pie’n, a sie leh a pha ka khen theihna dingin; na mipi haw hiti zo zai hi kuo’n vaihawm sak thei ding ahim?” a ti a.

¹⁰Chun, Solomon in zie thil chu a nget ziekin, LALPA a sukipak ta a.

¹¹Chun, Pathien in a kawmah, “Nangin nanga dinga damsawtna ngên lo a, na melmate thihna ding le ngên lo a, nanga dinga vaihawm thiemna na nget zawk ziekin,

¹²Ngaitie, na thu bang chun ka hih ta a; ngaitie, chitna leh hetna lunggil ka hun piei; khutichun na masanga nangmah tawbang mawngmawng kuomah a um puou a, na nung ale nangmah tawbang mawngmawng kuomah hung um diek ta puo’n a.

¹³Na nget loh, hauhsakna leh lopina le hun pie’ng ka; tichun na damsung in leng chengcheng lak achun nangmah tawbang mawngmawng chu kuomah um ta puo’n au.

¹⁴Na pa David in a zuih banga ka thuguot haw leh ka thupiek haw zawp dinga ka lampite na hawh chun dam le hun damsawt sak ing ka,” a ti a.

¹⁵Tichun Solomon chu a hung khanglo a, ngaitie, a mang lam in, Pathien in a kawmah thu a gen hi tih a he ta a, chun, Jerusalem ah a chieh a,LALPA thugawlhna bawm masang ah a dinga, hâlmang thillat leh chamna thillat haw a lân a, a suokte chengcheng a dingin guolvakna a siem a.

¹⁶Chun, numei nih, nawhchizuok hi leng kawm achun a hung u a, a ma ah a va ding u a.

¹⁷Chun, numei khat chun, “Aw lalpa, zie numei hi tawh in khat a um khawm ka hiu a; zie In a ka um lai u chun nau ka hun hing a.

¹⁸Chun, hiti hi ahi a, ka nau neih apat ni thum nung chun zie numei hin le nau a hun nei a, umkhawm ka hiu a; zie In achun kei uh nih tihloh chu kuomah midang a um puoi.

¹⁹Chun, zan kâl in zie numeinu hin a cha chuh a delhden kha a, a thi tai.

²⁰Tichun zankhang lai in a tho a, na suoknu hi ka ihmut kâl in, ka chapa ka kawma um chu a la a, amah cha thisa chu ka ânga a siel ahi.

²¹Chun, zingkal a nau nawi pie dinga ka va thawh chun, ngaitie, a thisa a na hi ta a; himahlele, zingkal a ka vak etchet phet chun, ngaitie, ka cha ka hin kha a na hi hiel puoh a,” a ti a.

²²Chun, Numei khat zaw chun le, “Hilo e, a dam zaw hi kei chapa ahi a, a thi hi nang chapa ahi,” a ti a. Khat chun “Hilo e, a thi hi nang chapa ahi a, a dam hi kei chapa ahi zawi,” a ti tei tei a. Khutichun leng masang achun a gen gêl gêl tau hi.

²³Tichun leng chun, “Khat in a dam zaw hi kei chapa ahi a, a thi hi nang chapa ahi, a ti a; khat in, Hilo e, a thi hi nang chapa ahi a, a dam zaw hi kei chapa ahi zawi na ti gel ngâl u a,” a ti a.

²⁴Chun, leng chun, “Chemzâm ei hun lak sak tiem u,” a ti a. tichun, Chemzâm chu leng masang achun a hun chawi tau a.

²⁵Leng chun, “Nausen dam zaw kha tum nih suoh unla, a langkhat chu khat pieu inla, a langkhat chu khat pieu in,” a ti a.

²⁶Ziephet chun, nausen dam zaw neinu chun, a cha chu a lainat mah mah a, leng kawm achun, “Aw lalpa, nausen dam hi amahnu pie mai zaw’n, that vang that hiel ki’n,” a ti a. A khat zawk chun lah, “Kei a le hi diek kihen la, nang a le hi diek kiheh; kimkhen mai ah,” a ti a.

²⁷Ziephet chun leng chun a dâwng a, “Nausen chu a nu kawm achun pieu in, that hiel kiu in; amah ngêi kha a nu ahi kha,” a ti a.

²⁸Chun, Israel te chengcheng chun zie chung thu a leng thutan dân chu a na zau a; leng chu a kihcha tau a; vaihawmna dingin Pathien chitna chu amah achun a um hi tih a mu ta ngâl u a.