Read Gangte 1 LENGTE 8 Bible Online

1 LENGTE 8 - Gangte bible

1 LENGTE 8

¹Khutichun, Solomon chun Israel upahaw, a nam uh luchang cheng chengte, Israel suonte inkuon lawiupate chuh, Jerusalem khuo a leng Solomon kawm achun David khawpi Zion apat LALPA Thugawlh Bawm zawn to dingin a samkhawm a.

²Chun, Israel mi chengcheng te chu Ethanim tha, tha sagihna achun Kut na ah leng Solomon kawmah a kikhawm u a.

³Chun, Israel upahaw chengcheng chu a hung u a, thiempute chun Pathien bawm chu a zawn to u a.

⁴Chun, LALPA bawm leh kikhawp khâwmna puon-In leh a ûmlebel thiengtho chengcheng chu thiempute leh Levi chite chun a zawn to u a.

⁵Chun, leng Solomon leh Israel te kikhawm khawm chengcheng, a kawma hung kikhawmte chuh bawm masangah a umkhawm u a, belam leh bâwngchal haw chu a tam zieka simsenloh leh a zah het sen guolloh in a kithawi u a.

⁶Tichun thiempute chun LALPA Thugawlhna bawm chu a umna ding ah a lalut u a, insung a Munthiengtho pên, Cherub te tha nuoi ah chun a kawih tau a.

⁷Cherub te chun bawm umna chung zawn achun a thau a zak khum zing u a; chun Cherub te chun bawm leh a zawnna mawlhte chu a tha nih a zak khum u a.

⁸Chun, a zawnna mawlhte chu a sau bêk ziekin, a mawng lam chu indan mun thieng a kipatin a kimu thei a; ahinla, pawlama kipatin vang a kimu thei puoi; tuni tieng hin zie tak achun a um zing nalai hi.

⁹Aigupta gam apat a a hung pawt u a LALPA’n Israel chate kawma thu a gawlh lai a Mosi’n Horeb tânga suongpek nih a kawih tihloh kha chuh, zie bawm sung achun bangmah dang a um puoi.

¹⁰Chun, hiti hi ahi a, thiempute chu Mun thiengtho apat a a hung pawt phet u chun LALPA In chu meipi chun a hun luoh dim ta a.

¹¹Khutichun, thiempute chu meipi ziek chun nasem in a ding thei ta puou a, LALPA In chu LALPA lopina’n a luoh dim ta ngâl a.

¹²Chun, Solomon in hiti hin thu a gen a, “LALPA’n van haw a khun nisa a um saka, himahleh, thim sah tak achun cheng ding ahih zie a gena.

¹³Na chênna dingin In khat ka hun sak sak ta a, kumkhuo a na umna ding leh na chênna ding mun ngêi chuh,” a ti a.

¹⁴Chun, leng chu a kihei viel a, Israel te kikhawm khawm haw chengcheng chu a vangsak a; tichun, Israel te kikhawm khawm haw chengcheng chu a ding dup u a.

¹⁵Chun, amah chun, “LALPA Israel te Pathien, amah kam ngêi a ka pa David kawma a gen, hun pitin sak tu chuh vangsak in um hen.

¹⁶‘Aigupta gam apat ka mi Israel te ka puihdawk ni apat in, Israel te nam lak ah khawimah khawpi hi ka min umna ding In sakna dingin ka tel puoh a, amahvang chuh ka mi Israel te lawiupa dingin David hi ka tel hi,’” a ti a.

¹⁷“Ka pa David khan Israel te Pathien, LALPA a dingin In sak a lunggil in a na guo sek a.

¹⁸Chun, LALPA’n ka pa David kawmah, ‘Na lunggil in ka min dingin In sak na guo sek a, hitibang lunggil na put hi na hih phai.

¹⁹Himahlele, nangin vang in chu sa puo’n la; na chapa, na khalbe a pieng, amah chun ka min dingin In chu sa ding ahi,’ a na ti ta a.

²⁰“Khutichun LALPA’n a thu gen chu a hun hihdet ta a; LALPA’n a tiemsa bang ngêi in ka pa David mun chuh ka hun luoh a, Israel Lalchutphah achun ka hung chu ta a, Israel Pathien, LALPA min dingin In chuh ka hun sa ta a.

²¹Zie tak achun, thugawlh bawm unna ding mun chuh ka hun guot ta a, zie achun Aigupta gam apat a puihdawk laia I pulepateu kawma a na thugawlh, LALPA thugawlh bawm chuh a um a,” a ti a.

²²Chun, Solomon chuh LALPA maichâm masang, Israel kikhawm khawm haw chengcheng muh in a ding a, van lam ah a khut a zak a:

²³“Aw LALPA, Israel Pathien, nang tawbanga a ângsung a a lunggil chengchenga tawiviel zing a suokte dinga a thugawlh guitun saka lungsietna nei zing thei, chunglam van a leh nuoi lam lei ahin Pathien dang mawngmawng a um puoi.

²⁴Ka pa David na suok kawma na thutiem chu na vawp zinga, na kam in na gen a, na khut in na hun subuting ta a, tuni a hung um tâk ngêi bang hin.

²⁵Zieziekchun, tuhin, Aw LALPA Israel Pathien, na suok ka pa David kawma, ‘Na suonte chuh ka mitmuha na um banga a umdan u a a chittheih phawt u chun, Israel te lalchutphah a chu ding kitasam puo’n a,’ ti a na tiem tâk sa kha guitun sak in.

²⁶Tuhin, Aw Israel Pathien, na suok ka pa David kawma thu na na gensa kha namdet a guitun sak dingin ka hun ngên hi.

²⁷“Himahlele, Pathien chu lei ahin a cheng taktak thei ding a ahim? Ngaitie, van leh vante van inle nang a hun dawl puoh a; zie ka In sak hi bangti tiengin a neu ta dem!

²⁸Ahinla, Aw LALPA ka Pathien, tunia na suok hin a hun uou na leh pauchamna hi a na ngaihthak sak in; na ânga na suok ngetna hi limsak in:

²⁹Zie mun lam hi nga a na suok hin pauchamna a neih ding chu ngaitha a, nangin, ‘Zie tak achun ka min chu um in a,’ na tih na mun ngêi In lam ahin sun leh zan a na mitte na hah zing theihna dingin.

³⁰Chun, na suok leh na mi Israel te hin zie mun lam hi ngaa a paucham tieng u leh a ngetna hawu a na ngaihthak sak sek in; na umna mun van apat in a na ngaitha’n la, ngaidam in.

³¹“Mi kuole a invengte chunga thil hihkhiel in, kihâksiel sak hiel hung ngai in, zie In a na maichâm masang ahih kipautiem dinga a hung tieng;

³²Nangin van apat in a na ngaitha’n la, migilo chuh amah lu chung ngêi ah a hihkhelh bangin thiemloh chan sak in la, mi dik chu a dikna bangin thiemchan sak in, na suokte hi vaihawm sak in.

³³“Na mi Israel te hin na chunga thil a hihkhelh ziek u a melmate laka nuoisieh a a hung um tieng u leh, nang lam a hun ngat kit u a, na min a hun lam u a, zie In a hih paucham a thil a hun nget u chun;

³⁴Nangin van apat in a na ngaihthak sak inla, na mipi Israel te gitlohna chu ngaidam inla, a pulepateu gam na piek achun puikit in.

³⁵“Na chunga thil a hihkhelh ziek u a van kawt a kikhak a, guoh a zuk loh tieng leh, zie mun lam nga a na min lam a, a hung paucham tieng u leh, amau haw na sukgimtheih zieka a gitlohna hawu a kisik u chun,

³⁶Nangin van apat in a na ngaitha’n la, na suok leh na mi Israel te gitlohna hi ngaidam inla; a chiehna dinguh lampi pha kâwkmuh inla, a goluoh ding u a na mite na piek na gam ahin guoh hun zuk sak kit in.

³⁷“Gam a kiel a kiek a, hite a lên a, gawtna ahim, muotna ahim, khaupepi ahim, lungte ahim a hung um a, melmate’n a kawtkhak vel u a a hun huol u a, bang hi hitaleh, bang natna hitaleh a hung tun chun;

³⁸Bang tawbang pauchamna leh ngetna hitaleh, mi khat pauchamna ahim, na mipi Israel te pauchamna hitaleh, kuo hileh a lunggil a natna nei a kihe a, zie In lam hi ngaa khut zak a a hung paucham tieng.

³⁹Na umna van ah a na ngaihthak sak inla, ngaidam inla, mitin a umdan dungzui un bawlsak in; a lungthim uh nang na he ngâl a (nangmah, nang mai in mihingte lungthim na he ngâl a).

⁴⁰Ka pulepateu kawma na piek gamsunga a chen sung cheng uh a a hun kihchak theihna ding un.

⁴¹“Ziehaw bân achun na mi Israel te tihloh nam dang mi, na min zieka gam gamla taka kipata a hung uh a;

⁴²ziehaw chun zie In lam hi nga a a hung paucham tieng u leh, (na min lopi tak leh, na khut hattakte, na bân na zak thute hi hun he hawn ding ahi ngâl u a;)

⁴³Nangin na umna van apat in na ngaitha’n la, nam dang mi chun a hun nget bang u chu a na hihsak in; na mi Israel te bangmah a khawvel a namtin in na min a het u a, a hun kihchak u a, zie In ka sak hin na min pu ahi tih a hun het theihna dingun.

⁴⁴“Na mite hi a melmateu do dinga na sawlna lam taphawt a a chieh u a, a umnau apat a na khawpi na tel chuom lam ngaa LALPA kawma a paucham u chun;

⁴⁵A pauchamnau leh a ngetnau chu nangin van ah a na ngaihthak sak inla, a thuu bangin umsak in.

⁴⁶“Na chunga thil a hihkhelh u a, (kuomah gitlohna neilo a um puoh ngâla) a chung u a na lungnat a, melma khuta na piek a, melmate’n gamla tak ah ahim, naicha ah ahim sala a puih u a,

⁴⁷Sala a umna gam u a a kingaihtuoh dawk u a, a kisik u a, thil ka na hihkhiel u a, diklo takin leh gilo takin ka na hih tau, ti a sala puite haw gama a hun nget u chun,

⁴⁸A melmau sala puite gama a lunggil tak u leh a ngaihtuohnau taka nang lam a hun ngat u a, a pulepateu na piek gam leh, na khawpi tel lam leh na min dinga ka In sak lam hi hun ngaa na kawma a paucham u chun,

⁴⁹A pauchamnau leh a ngetnau chu nangin na umna van ah a na ngaitha’n la, a ngetnau chu hihsak in;

⁵⁰chuleh na mite na chunga thil a hihkhelhteu leh a na bawhsietnau chengcheng haw chu ngaidam inla; sala puite haw chun amau haw a lungsiet theihna dingun lungsietna neih sak in.

⁵¹Na mi na goluoh, Aigupta gam apat, thik hâltuina sung apat a na puihdawkte ahi ngâl u a.

⁵²“A hun sap cheng u a na na ngaihthak dinga na suok ngetna leh, na mipi Israel te ngetna lama na mit na hah theihna dingin.

⁵³Aw Pathien, ka pulepateu, Aigupta gam apat a na puihdawk laia na suok Mosi manga na gen bangin, na goluoh dingin khawvel namtin lak apat na kawihchuom ahi ngâl a,” a ti a.

⁵⁴Chun, Solomon in LALPA kawma a pauchamna leh ngetna chengcheng a gen zawh chun, LALPA maichâm masanga khupdin a, van lam bana khut zaka a um chuh a hung tho dawk a.

⁵⁵Chun, a dinga, aw ngeih tak in, Israel te kikhawm khawm haw chu vangsakna dingin hitihin a gen a;

⁵⁶“A thutiem bang ngeia a mipi Israel te chawlhna piepa LALPA chuh pahchak in um hen. A suok Mosi manga a thutiem pha chengcheng kha khatchale a thâwn puoh a.

⁵⁷LALPA I Pathien u chuh I pulepateu kawma a um bang khan ei uh haw kawm a le um henla; ei taihsan in, ei thahtham kihen.

⁵⁸Tichun, a lampi chengcheng hawh ding leh, I pulepateu thu a na piek tâk banga a thupiek haw, a thuguot haw, a vaihawm haw pawm ding a I lunggilteu amah lama a ngat sak theihna dingin.

⁵⁹Chun, LALPA hi Pathien ahi a, kuomah dang a um puou hi tih khawvel a namtin in a hun het theihna ding u a a suok chung thu ahin leh,

⁶⁰a mi Israel te chung thu ahin amah theih dân bang zela a tawih theihna dingin zie ka thugen haw, LALPA masanga ngetna ka tut hi sun leh zan in LALPA I Pathien uh masanga chun châm zing hen.

⁶¹Khutichun a thuguot banga um ding leh a thupiek haw zawp dingin LALPA I Pathien uh lam achun na lunggilteu phabukim hen, tuni bang hin,” ti’n Israel te kikhawm khawm haw chengcheng chuh a vangsak a.

⁶²Leng Solomon leh Israel te mipite chengcheng chun LALPA masangah kithawihna a lân khawm u a.

⁶³Chun, Solomon in LALPA kawma chamna thillat a lat chu, bâwngchal singnih leh sangnih leh belam nuoikhat leh singnih ahi. Khutibang chun leng Solomon leh Israel chate chengcheng chun LALPA In chu a lân ui.

⁶⁴Zie ni mah chun leng chun LALPA In masanga huongsung chu a hih thiengtho a; zie tak achun hâlmang thillat te, an thillat te, chamna thillat sathaute chu a lân ngâl a. LALPA masanga um, sumeng maichâm chu hâlmang thillat te leh chamna thillat sathaute kawihna dingin a neu takluot ziekin zie mun achun a kawih ahi.

⁶⁵Khutichun zie chung chun, Solomon leh Israel te chengcheng mipi kikhawm khawm haw tamtak, Hamath khuo lutna apat Aigupta gam lui tiengin mipi haw chu LALPA I Pathien uh masang achun ni sagih leh ni sagih, ni sawmleli sung zet guolvakna a nei u a.

⁶⁶A ni giet ni chun Solomon in mipi haw chu a kikhen sak a, chun, leng chu vang a pieu a, tichun LALPA’n a suok David leh a mi Israel te chunga a phatna khuti lâwm lâwm a a latsak ziek chun lungthim kipâk leh thanuom takin a puonbuk lam chiet u ah a chieh tau hi.