Read Gangte 2 LENGTE 1 Bible Online

2 LENGTE 1 - Gangte bible

2 LENGTE 1

¹Chun, Israel leng Ahab thih nung in, Moab te chu Israel te chungah a hel tau a.

²Chun, Ahaziah chu Samari khuo ah, a indan chungnung a tukvan, vathangkalh âwng ah a kie tha a, nasa takin a kisuliem ta a. Tichun, a dam dawk zawh ding leh dam dawk zawh loh ding chu, Ekron a Philistia te khuo pathien, Baal-zebub dawng ding chun mi a sawl ta a.

³Himahlele, LALPA vânsâwlchâk in, Tishbe-mi thiemgau Elija kawmah, Kipan inla, Samari khuo leng Ahaziah mi sawlte na hopih dingin va chieh inla, a kawm u ah, “Israel gama hin Pathien a um takloh ziekin ahim, Ekron khuo pathien, Baal-zebub dawng dinga na chieh tâk mai uh?

⁴LALPA’n hiti hin a tii, ‘Na kisukliemna apat khan dam dawk kit ta puo’n la, thi tei tei inla, a tii’ va tiu,” a ti a. Chun Elijah chu LALPA thupiek bang chun a chieh ta a.

⁵Chun, a mi sawlte chu leng kawmah a vaikit u a, amah chun a kawm u ah, “Bangti dana hung vaikit mai na hiu hi?” a ti a.

⁶Chun, amau chun a kawmah, “Mi khat ei hopih dingin a hung a, ka kawm u ah, Chieh kit unla, nanguh hun sawlpa leng kawm achun chieh kit tau unla, a kawmah, LALPA’n hiti hin a tii: ‘Israel gama hih Pathien a um takloh ziek ahim Ekron khuo pathien Baal-zebub chu dawng dinga na sawl tâk mai chuh? Na kisukliemna apat khan dam dawk puo’n na tin, thi tei tei inla, ti’n, hun tiu,’ a tii,” a tiu a.

⁷Chun, amah chun a kawm u ah, “Nanguh hun hopih dinga hung, zie thu hun hilhpa chuh mi bang tawbang ahi?” a ti a.

⁸Chun, amau chun a dâwng u a, “Samul puo’n a kivan a hi a, a kâwng savun kâwnggak in a gâk hi,” a tiu a. Leng chun, “Tishbe-mi Elijah ahi chu,” a ti a.

⁹Ziephet chun, a milienpa khat, mi dang sawmnga tawh, Elija pui dingin a sawl ta a. Tichun, a kawmah a va chieh u a, tângsip a chu chuh a va muu a, “Nang Pathien mi, ‘leng in hung suk hen,’ a tii,” a tiu a.

¹⁰Chun, Elija chun a dâwng a, sepaih sawmnga chunga lawiupa kawm achun, “Pathien mi ka hih takzet chun, van apat mei hung kie hen la, nangmah ngêi leh na lawite sawmnga kha hun katum hen,” a ti a. Tichun, van apat in mei a hung kie a, a lawiupau chuleh, a lawite sawmnga chu a katum suok kêi ta a.

¹¹Chun, Leng chun mi lien dang khat leh sepaih sawmnga mah tawh a sawl kit a, amau chun Elija kawmah, “Nang Pathien mi, ‘leng in hung suk hen’ a tii” a tiu a.

¹²Chun, Elija’n a dâwng a, “Pathien mi ka hih takzet chun, van apat in mei hung kie hen la, nangmah leh na lawite sawmnga kha hun katum suok kêi hen,” a ti a. Tichun, Pathien mei chu van apat in a hung kie tha a, amah leh a lawite sawmnga chu a katum suok kêi ta a.

¹³Chun, leng chun a milien khat leh sepaih sawmnga mah a sawl kit zel a. Zie sepaih sawmnga lawiupa pa chu tâng achun a va chieh to a, Elija masang a chun a va khupdin a, a kawmah, “Aw Pathien mi, zahngai inla, ka hinna leh zie ka mi sawmngate hinna hi hawih sak in.

¹⁴Ngaitie, van apat in mei a hung kie a, sepaih sawmnga lawiupate nih kha, a lawite sawmnga kha tawh a hun katum ta a; himahleh, ka chunguh ahin zahngai tei in,” ti’n a vak ngên a.

¹⁵Tichun, LALPA vânsâwlchâk chun Elija kawmah, “Amah hi tawh kitawnsuk un, lau ki’n,” a ti a. Tichun, a kipan a, leng kawma ding chun a kitawn suk tau a.

¹⁶Chun, amah chun a kawmah, “LALPA’n hiti hin a tii: ‘Ekron khuo a pathien Baal-zebub dawng dinga mite na sawl a, Israel gama hi Pathien dawt ding um talo guol maia na hih ziek chun, dam dawk puo’n na tin, thi tei tei inla,’ ti’n” a ti a.

¹⁷Elija manga LALPA thugen guol chun Ahazia chu a thi ta a, chapa a neih loh ziekin, a suohpihpa Joram chun, Juda leng Jehoshaphat chapa Jehoram in kum nih vai a hawm kum chun, a thasang in vai a hawm ta a.

¹⁸Ahaziah thilhih dangte chuh; Israel lengte vaihawm lai thu zikna bu ah a chuong hilo ahim?