Read Gangte 2 LENGTE 11 Bible Online

2 LENGTE 11 - Gangte bible

2 LENGTE 11

¹Chun, Ahaziah nu Athalia chun, a chapa thah in a um tai tih a hun het chun, a kipana, leng chapate chengcheng chuh a that vek a.

²Ahazia chapa Joash chauh chu a suokcha a. Mi dangte tawh thah khawm ngêi ding a hi a, himahleh, leng Joram chanu, Ahaziah suohpihnu a ni chun a na hukdawk a. A puimang a, a enkawl ding tawh, Ho-In a zâlkhun pindan sung lam achun a sawl lut a. Athalia apat chun a selgu ta a.

³Chun, kum gup sung hiel chu Jehosheba chun a enkawl a, Athalia vaihawm sung cheng chu Ho-In achun a selgu ta a.

⁴Himahleh, a kum sagihna a chun, thiempu Jehoiada chun, leng vengtute chunga lawiupate leh leng In veng sepaih lawiupate chu a sap sak a, Ho-In a hung sak dingin thu a pie a, a thilhih guot chung thu achun kipautiemna a neih sak chiet a. Leng Ahaziah chapa Joash a etsak a,

⁵chun, zie thupiekte hi a pie a: “Chawlhni a leng In veng dinga na hung tieng u leh, mi, mun thuma hawp a mun khatin leng In chu veng un na tin uh;

⁶Chuleh, mun thuma hawp a mun khat mah chun, Shur kulh kawtkhak veng un na tin uh; mun thuma hawp a mun khat chu gâlvengte nung lam kulh kawtkhaka na um dinguh ahi.

⁷Chun, pawl nih, a nasepnau muna Chawlhni a chiehte chun, leng ven bitna dinga a ven dinguh ahi.

⁸Leng Joash chu, chemzâm zuk dawksa tawh, a chiehna lam chenga na umpih zel dinguh ahi. Kuole, a hun naih taphawt chu na thah zel dinguh ahi,” ti’n thu a pie a.

⁹Tichun, sepaih zalawiupa te chun, thiempu Jehoiada thupiek bang chun a hih u a; amau lawite chiet, Chawlhni a châwl dingte leh Chawlhni a nasem dingte chu a pui u a, thiempu Jehoiada kawmah a chieh u a.

¹⁰Chun, thiempu chun, sepaih zalawiupa chuh, Ho-In a leng David tiengcha leh phaw te chu a pie a.

¹¹Khutichun, gâlveng sepaihte chun gâlvan chawi chietin, In changlam pang apat veilam pang tiengin, leng veng ding chun In zul achun a din huol khum u a.

¹²Tichun, Jehoiada chun Joash chuh a hun puidawk a, lal lukhuk a khuk sak a, leng vaihawmna dante chuh a pie a. Tichun, sathau a nuh a, a khut uh a beng u a, “Leng chu damsawt hen,” ti’n a kiko u a.

¹³Gâlveng sepaihte leh mipite husa chuh Athalia’n a hun zak chun, Ho-In a mipite kikhawpna chun a va chieh a;

¹⁴Chun, a vak en a, leng chuh dân ngeina bangin khuom zul ah a na ding a, sepaih lawiupate leh pengkun mûtte chu a kieng ah a ding u a; tichun, zie gama mi chengcheng chuh a kipâk mah mah u a, pengkun a mût u a. Ziephet chun, Athalia chun a puonte a bawtthêk a, “Phielgukna! Phielgukna!” ti’n a kiko a.

¹⁵Thiempu Jehoiada chun sepaihte chunga lawiupa a a guot, sepaih zalawiupa te chu thu a pie a, a kawm u ah, “Mi veng sepaih nih kal ah puidawk un; kuole, a hun delh taphawt chu chemzâma satlup ding ahi,” a ti a. Thiempu Jehoiada chun Athalia chu Ho-In huongsung vela thah ding chu a nuom puoh a.

¹⁶Khutichun, a man u a, leng In ah a pui u a, zie taka sakawl kawtkhak kiti mun achun a that tau hi.

¹⁷Chun, Jehoiada chun leng Joash leh mipite chu LALPA mite a hih theihna dingun, LALPA tawh a kal u ah thugawlh a siem sak a. Leng leh mipite kal achun le a siem sak a.

¹⁸Tichun, mipite chu Baal In ah a chieh u a, a hihchim u a, a maichâmte leh a milim haw chuh a sunel dimdem u a, Baal thiempu Mattan chule maichâm mah ah a that u a. Jehoiada chun Ho-In chu vengtu sepaihte a ven sak a.

¹⁹Amah tawh, miliente tawh, leng inkawte vengtute tawh, leng In vengte chun leng chu Ho-In apat in, a leng In tiengin a thâk u a, mipite chun a zui u a. Tichun, Joash chu Gâlvengte Kawtkhak achun a lut a, leng chutphah mun chu a luoh ta a.

²⁰Khutichun, zie gama mi chengcheng chuh a kipâk u a, chun, khawpi chu buoi lo in a um ta a; Athalia chu leng In achun chemzâm in a that tau a.

²¹Chun, Joash in vai a hawm pat lai chun kum sagih mi ahi.