Read Gangte 2 LENGTE 13 Bible Online

2 LENGTE 13 - Gangte bible

2 LENGTE 13

¹Juda leng, Ahazia chapa Joash in kum sawmnih leh kum thum a vaihawm kum chun, Jehu chapa Jehoahaz chuh Israel te chungah, Samari khuo ah vai a hawm pan a, kum sawm leh kum sagih vai a hawm a.

²Chun, LALPA mitmuh in thil phalo tak a hih sek a, Israel te thil gilo hih dinga pui sek pa, Nebat chapa Jeroboam gitlohnate khah a ma’n le a chîng a, a haihsan diek puoi.

³Tichun, LALPA lungnat na chu Israel chungah kuong dawk ta a, tichun, Suria leng Hazael leh, a chapa Benhadad khut achun a pie ta a.

⁴Chun, Jehoahaz chu LALPA kawmah a paucham a, LALPA’n, Israel te sukgimtheih a a um u a, Suria leng in amau haw a nuoisieh dân chu mu’n, a pauchamna chu a dâwng a.

⁵Tichun, LALPA’n Israel te chu Suria te haw nuoi apat a hukdawk dingin lawiupa a sawl sak a, tichun, tuma bangmah khan thamuong takin a khawsa tau a.

⁶Himahleh, leng Jeroboam in, Israel chate a gitlohna a a puih lutna thilte kha a haihsan diek puou a, a sunzawm zing u a; Asher pathien limte kha Samari khuo achun a um zing ta a.

⁷Jehoahaz chun sakawl chung chuong mi sawmnga leh sepaih singkhat tihloh chuh, neih a nei ta puoh a. Suria leng chun a sukmangthai sak vek a, leivui kichil nêl bang mai in a siem ta a.

⁸Tichun, Jehoahaz chanchin dangte, a thilhih chengcheng te, a thilhih theih ziete chuh Israel lengte vaihawm lai thu zikna bu ah a kizik hilo ahim?

⁹Chun, Jehoahaz chuh a pilepute kawmah a ipmu ta a, tichun, Samari khuo ah a vui u a; a chapa Joash chun a thasang in vai a hawm ta a.

¹⁰Chun, Juda leng Joash in kum sawmthum leh kum sagih vai a hawm kum chun, Jehoahaz chapa Jehoash chun Israel te chungah Samari khuo ah vai a hawm pan a, kum sawm leh kum gup vai a hawm a.

¹¹Chun, amah chun le, LALPA mitmuh in thil gilo tak a hih sek a; Israel te gitlohna a puilut pa, Jeroboam thilhihte kha a haihsan diek puou a, a sunzawm zing tau hi.

¹²Tichun, Jehoash chanchin dangte, a thilhih cheng chengte, Juda leng Amaziah a do laia a hansan ziete chuh Israel lengte vaihawm lai thu zikna bu ah a chuong hilo ahim?

¹³Chun, Jehoash chu a pilepute kawmah a ipmu ta a; chun, Jeroboam chuh a lalchutphah achun a chu a, chun Jehoash chu Samari khuo a Israel lengte lak ah vuih ahi a. A chapa, Jeroboam nihna kiti pa chuh a thasang in leng in a chu ta a.

¹⁴Chun, Elisha chu a thihpih ding natna’n a hung na ta a; tichun, Israel leng Jehoash chu a kawmah a va chieh a, a kah a, “Hepa! hepa! Israel te kangtalai leh sakawl chung chuong mite lawiupa!” a ti a.

¹⁵Ziephet chun, Elisha’n a kawmah, “Thalphel leh thalchang haw hun la tie,” a ti a. Jehoash chun thalphel leh thalchang haw chu a hun la a.

¹⁶Chun, amah chun leng kawm achun, “Thalphel kha vak tu tie,” a ti a. Tichun, a vak tu a. Elisha chun leng khut chung achun a khut a nga a.

¹⁷Chun, amah chun, “Suria te umna lam panga tukvan kha vak hawng tie,” a ti a. Thiemgaupa thupiek guolin leng chun Suria te umna lampanga tukvan chu a vak hawng a, ziephetchun, Elisha chun, “Kâp ah,” a ti a. Leng in a vak kâp zawh zawh chun Elisha chun, “LALPA guolzawhna thalchang a hi a, Suria te zawhna thalchang ngêi chuh; zie chun, Aphek khuo a Suria te chu zo thieng kêi ding na hi,” a ti a.

¹⁸Chun, Elisha chun, thalpi chang dang a hun la kit a, lei tuol vak sun dingin leng chu a hilh a. Leng chun lei tuol chu thum vei a vak sun a; a haihsan zieng a.

¹⁹Ziephet chun Pathien mi chu a lungna ta a, leng kawm achun, “Nga vei, gup vei na sut ding hi a, khutileh Suria te chu zo thieng kei ding na hi a; himahleh, tuhin, thum vei chauh zo ding na hi,” a ti a.

²⁰Tichun, Elisha chu a thi ta a, a vui tau a. Kum cheng leh, Moab te chun Israel gam a hung do sek u a.

²¹Chun, mi thi khat a vuih ding lai tak un hiti hi ahi a, ngaitiem u, mi lawikhat a vak muu a, tichun, zie pa chu Elisha thân achun a khethasuk zieng u a; a taihsan tau a. A luong chun Elisha guh chu a sukkhak phet chun, a hung hing kit a, a hung ding dawk ta a.

²²Chun, Suria leng Hazael chun Jehoahaz hun sung chun Israel te chuh a bawl gimthei zing a.

²³Himahlele, LALPA’n Abraham te, Isak te, Jakob te kawma thu a gawlh ziekin, amau haw chuh a lungsiet a, a lainat a, a ngaihsak a, amau haw chuh a sumangthai nuom puoh a, a kawm apat in a paih tha nuom puoh a.

²⁴Chun, Suria leng Hazael chu a thi ta a; a chapa Benhadad chu a thasang in a lal ta a.

²⁵Chun, Jehoahaz chapa Jehoash chun Hazael chapa Benhadad in a pa Jehoahaz a do a; khuo a lâksak haw kha a leh lâksak kita. Joash chun thum vei a zo a, Israel gama khuo haw chu a lehlak kit ta a.