Read Gangte 2 LENGTE 15 Bible Online

2 LENGTE 15 - Gangte bible

2 LENGTE 15

¹Israel leng, Jeroboam nihna’n kum sawmnih leh kum sagih vai a hawm kum chun, Juda leng Amaziah chapa Uzziah chun vai a hawm pan a.

²A vaihawm pat kum chun kum sawm leh kum gup mi ahi a, Jerusalem ah kum sawmnga leh kum nih vai a hawm a; a nu min chu Jekoliah, Jerusalem mi ahi.

³Chun, a pa Amaziah thilhih bangte chu hihin, LALPA mitmuh in thil phatak a hih sek a.

⁴Himahlele, milim hona munte chu suksiet ahi diek puoh a; zie tak achun mite chun kithawi in, gimlimte a hâl zing sek u a.

⁵Tichun, LALPA’n, Uzziah chu phâk natna’n a hun gawt ta a, a thih ni tiengin a phâk den ta a. Amah In chuom ah a um zing ta a. Tichun, leng chapa Jotham chu, a gam u a mite vaihawm sak chun a pang ta a.

⁶Tichun, Azariah chanchin dang leh, a thilhih chengcheng chu, Juda lengte vaihawm lai thu zikna bu ah a kizik hilo ahim?

⁷Chun, Azariah chu a pilepute kawm achun a ipmu ta a; chun a pilepute laka David khawpi ah a vui u a; a chapa Jotham chun a thasang in vai a hawm ta a.

⁸Juda leng Azariah chun kum sawmthum leh kum giet vai a hawm kum chun, Jeroboam nihna chapa, Zakaria chun Israel te chungah, Samari khuo ah tha gup vai a hawm a.

⁹Chun, a pute hih mah bangin, LALPA mitmuh in thil phalo tak a hih sek a; Israel te thil hihkhiel dinga puipa, Nebat chapa Jeroboam gitlohnate kha a haihsan diek puoi.

¹⁰Khutichun, Jabesh chapa, Shallum in leng Zakaria chu a phielgu a, Ibleam ah a that a, a thasang in vai a hawm ta a.

¹¹Tichun, Zakaria chanchin dangte chuh Israel lengte vaihawm lai thu zikna bu ah a kizik hi.

¹²Zie chuh LALPA’n Jehu kawma, “Na chapate chu suon lina tiengin Israel te lalchutphah ah chu’n tin,” tih thu a gen khah a hung guitunna ahi.

¹³Juda leng Uzziah chun, kum sawmthum leh kum kuo vai a hawm kum chun, Jabesh chapa Shallum chun vai a hawm pan a; Samari khuo ah tha khat sung vai a hawm hi.

¹⁴Chun, Gadi chapa Manahem chuh Tirzah khuo apat in a va chieh to a, Samari khuo ah a chieh a, Jabesh chapa Shallum chuh Samari khuo ah a that a, a thasang in vai a hawm ta a.

¹⁵Tichun, Shallum chanchin dangte, a phielgukna thute chu, ngaitie, Israel lengte vaihawm lai thu zikna bu ah a kizik hi.

¹⁶Khuti- chun, Manahem in, Tirzah apat a chieh lai chun, Tiphsah khawpi leh, a sunga chêngte leh a gamte chu a hihsie a; amah kawma a kipiek loh ziek u a a do ahi; zie taka nauvawp lai numei chengcheng te chu, a gilpiu a phil zak sak a.

¹⁷Juda leng Uzziah chun, kum sawmthum leh kum kuo a vaihawm kum chun, Gadi chapa, Manahem chuh Israel te chungah vai a hawm pan a, Samari khuo ah kum sawm vai a hawm a.

¹⁸Chun, LALPA mitmuh in thil phalo tak a hih sek a; Israel te thil hihkhelh sak pa, Nebat chapa Jeroboam gitlohnate kha a dam sungin a hih sek a.

¹⁹Asuria te gam awptu khat, Tiglath Pileser chun Israel te chu a do a, Manahem chun a gamsunga a thuneihna sukhat na ding chun, dangkaguo talent sang khat a pie a.

²⁰Chun, Manahem chun Asuria leng piek ding, dangka chu Israel mi neizo chengcheng lak achun, dangka sekel sawmnga chiet a pawng lâksak a. Khutichun, Tiglath Pileser chu amah gam lam ah a kilehkit ta a.

²¹Tichun, Manahem chanchin dangte, a thilhih chengcheng te chu, Israel lengte vaihawm lai thu zikna bu ah zik hilo ahim?

²²Chun, Manahem chu a pilepute kawmah a ipmu ta a, chun, a chapa Pekahia chun a thasang in vai a hawm ta a.

²³Chun, Juda leng Uzziah chun, kum sawmnga vai a hawm kum chun, Manahem chapa, Pekahia’n Israel te chungah vai a hawm pan a; Samari khuo ah kum nih vai a hawm a.

²⁴Chun, LALPA mitmuh in thil gilo tak a hih sek a; Israel te thil hihkhiel sak dinga puipa, Nebat chapa Jeroboam gitlohnate khah a taihsan puoi.

²⁵Chun, Pekahia sepaih hotu lien, Remalia chapa Pekah chun, Gilead gama a mi sawmngate chu tawh, Pekahia thahna ding a ngaihtuoh tau a, Pekahia chu, Samari khuo a kulh sungnung lama leng insung achun a that u a, a thasang in vaihawm in a pang ta a.

²⁶Tichun, Pekahia chanchin dangte, a thilhih chengcheng te chu, Israel lengte vaihawm lai thu zikna bu achun a kizik hi.

²⁷Juda leng Uzziah chun, kum sawmnga leh kum nih vai a hawm kum chun, Remalia chapa Pekah chun Israel te chungah, Samari khuo ah, vai a hawm pan a, kum sawmnih vai a hawm a.

²⁸Chun, LALPA mitmuh in thil phalo tak a hih sek a; Israel te thil hihkhiel dinga puipa, Nebat chapa Jeroboam gitlohnate kha a haihsan diek puoi.

²⁹Israel leng Pekah vaihawm lai in ahi, Asuria gam awptu lien, Tiglath Pileser in Ijon khawpi te, Abel-Bethmaakah te, Janoah te, Kadesh te, Hazor te, Gilead leh Galili gam te, Naphtali gam chengcheng te a lâk a, Asuria mipite chule a puih mang vek tâk chuh.

³⁰Chun, Uzziah chapa Jotham in Judate chunga vai a hawm, kum sawmnih kum chun, Elah chapa Hosea chun leng Pekah chu phielgu’n, a that ta a, a thasang in vaihawm in a pang ta a.

³¹Tichun, Pekah chanchin dangte, a thilhih chengcheng te chu, Israel lengte vaihawm lai thu zikna bu ah a kizik hi.

³²Israel leng, Remalia chapa Pekah chun kum nih vai a hawm kum chun, Juda leng Uzziah chapa Jotham chun vai a hawm pan a.

³³A vaihawm pat lai chun kum sawmnih leh kum nga mi ahi; Jerusalem ah kum sawm leh kum gup vai a hawm a; a nu min chu Jerusha, Zadok chanu a hi.

³⁴A pa Uzziah thilhih taphawt a hih a, LALPA mitmuh in thil phatak a hih sek a.

³⁵Himahleh, milim honate chu suksiet ahi puoh a, zie tak achun mite chun kithawihnate leh gimlim te a hâl zing sek u a. Ho-In mâllam kawtkhak chu a siempha a.

³⁶Tichun, Jotham chanchin dangte, a thilhih chengcheng te chu, Juda lengte vaihawm lai thu zikna bu ah a kizik hilo ahim?

³⁷Zielai chun, Suria leng Rezin leh, Remalia chapa Pekah chu, Judate do dingin LALPA’n a sawl pan ta a.

³⁸Chun Jotham chu a pilepute kawmah a ipmu a, David khawpi ah a vui tau a; tichun, a chapa Ahaz chun a thasang in vai a hawm ta a.