Read Gangte 2 LENGTE 16 Bible Online

2 LENGTE 16 - Gangte bible

2 LENGTE 16

¹Remalia chapa Pekah chun, kum sawm leh kum sagih vai a hawm kum chun, Juda leng Jotham chapa Ahaz chun vai a hawm pan a;

²A vaihawm pat lai chun kum sawmnih mi a hi a; Jerusalem ah kum sawm leh kum gup vai a hawm hi. A pu David bangin, LALPA a Pathien mitmuh in thilpha a hih puoh a.

³Hih tâk sangin, LALPA a Pathien deih loh lam in thil a hih a, Israel lengte thilhihte kha a hih zaw ta a. LALPA’n Israel chate masanga apat a a nawhdawk namte thilhih, kihdak-um takte chu entawn in, a chapa nasan chule milim pathien masang ah mei ah a lut saka.

⁴Chun, milim hona mun leh tângte ah, thing lim tin nuoi haw achun a kithawi a, gimlim a hâl sek a.

⁵Tichun, Suria leng Rezin leh Israel leng Remalia chapa Pekah chun, Jerusalem a do tau a, himahlele, Ahaz chu a zo thei puou ui.

⁶Zie lai mah chun, Suria leng Rezin chun Elath khuo chu a la kit a, Judate chu Elath khuo apat in a nawhdawk a. Suria te chun Elath khuo chu a va luoh u a, tuni tieng hin a um zing tau hi.

⁷Khutichun, Ahaz chun Suria leng Tiglath Pileser kawmah, “Na suok ginum tak ka hi a puo! Ei do dinga hung kuon, Suria leng leh, Israel leng khut apat hin ei hukdawk in,” ti’n mi a sawl a.

⁸Chun, Ahaz chun, Ho-In a dangka leh sana um taphawt, leng In a go khawlkhawmna a tawh a la a, Asuria leng kawmah kipahman in a thâk ta a.

⁹Chun, Suria leng chun Ahaz ngetna chu a pawm a, a sepaihte tawh a kuon u a, Damaska chuh a do u a; a la tau a, leng Rezin chu a that u a, a mite chu Kir gam lam ah salin a pui tau a.

¹⁰Chun, Leng Ahaz chu, Asuria leng Tiglath Pileser hopih dingin, Damaska khuo ah a chieh a, Damaska khuo a maichâm chu a va mu a; tichun, leng Ahaz chun, zie maichâm lim leh a siem dân bang tak chu va la dingin thiempu Uria a sawl kit a.

¹¹Khutichun, thiempu Uria chun, zie bang tak chun maichâm chu a siem a, Ahaz kilehkit ma chun a na zo ta a.

¹²Chun, Damaska khuo apat a a kilehkit phet chun, Ahaz chun maichâm chu zawhsa’n a mu ta a, maichâm chu a vak naih a, a vak kalto a.

¹³Chun, maichâm achun a hâlmang thilpiek gancha chu hâl in, changbuong thillat te a lân a, dâwn ding thillat a sung a, kivawpkhawmna thillat thisante chu a theh a.

¹⁴Chun, LALPA kawma lat thiengtho sa, sumeng maichâm chu, Ho-In leh maichâm a siemthak uh kikal achun a um a, zie chu Ahaz chun, a siem thak zawk maichâm, mâllam pang achun a kawih chawn a.

¹⁵Chun, Uria kawm achun, “Zie, ka maichâm lien hi, zingkal lama hâlmang thillat te, nitâk lam changbuong thillat te, lengte leh mipite hâlmang thillat leh, an thillat te leh, mipite’n dâwn ding thillat te latna dingin mang in. Kithawihna gan thisan cheng chu na sun khum ding ahi. Chun, sumeng maichâm hi, aisânna dingin mang in,” a ti a.

¹⁶Tichun, thiempu Uria chun leng Ahaz thupiek guol chun a hih ta a.

¹⁷Chun, leng Ahaz chun, Ho-In a kimang, thil luihna gei haw chu a la khen a, a chunga kisilna bel chu a kawih chawn a; a luihna, sumeng bâwngchal sawmlenih lim chung apat tuibel chu a latha a, suong kilem chungah a lui ta a.

¹⁸Chun, Asuria leng suklungkimna ding chun, Ahaz chun, lalchutphah zawtna dinga khang dawh sang kibawl chu, Ho-In apat chun a ladawk a, Ho-In a leng lutna lampi chuom chule a khâk sak ta a.

¹⁹Tichun, Ahaz thilhih chanchin dangte chu Juda lengte vaihawm lai thu zikna bu ah a kizik hilo ahim?

²⁰Chun, Ahaz chu a pilepute kawmah a ipmu ta a, David khawpi ah a vui tau a; chun, a chapa Hezekia chun a thasang in vai a hawm ta a.