Read Gangte 2 LENGTE 20 Bible Online

2 LENGTE 20 - Gangte bible

2 LENGTE 20

¹Zie lai chun, Hezekia chuh thih ngam in a na a. Tichun, Amoz chapa thiemgau Isai chu a kawmah a chieh a, a kawmah, “LALPA chun hiti hin a tii, ‘Na insung hihtup in; dam dawk zo ding na hi puoh ngâl a, thi ding na hi,’ ti’n,” a ti a.

²Ziephet chun, Hezekia chu bâng lam nga’n a kihei a, LALPA kawmah a paucham a,

³“Aw LALPA, Nanga dinga thutak leh, lunggil phabukim pua na ka sep sek zie leh, na mitmuha thilpha ka hih sek dân te kha, lungsiet takin hezing in!” a ti a. Tichun, Hezekia chu hah kah in a kap ta a.

⁴Chun, Isai chun leng chu a taihsan a, himahleh, leng In huongsung lailung a khelh ma chun, LALPA thu chu a kawmah a hungtung a.

⁵“Vaikit in la ka mite lawiupa Hezekia kawmah zie thu hi gen in; LALPA na pu David Pathien chun hiti hin a tii, Na pauchamna kha ka za a, na mittui kie le ka mûi. Ngaitie, hun sudam ing ka ting, ni thum sungin Ho-In ah chieh inla.

⁶Chun, na damsung kum haw hi kum sawm leh kum nga hih sau ing ka ting; chun, nang leh zie khawpi hi Asuria lengpa apat in hukbit ing ka ting; chun keimah ziek leh ka suokpa David ziekin zie khawpi hi hum ing ka,” a tii, ti’n.

⁷Chun, Isai chun, “Theipi gah bawk khat hun lau in,” a ti a. Tichun, a hun chawi u a uilut achun a belh u a, ahung dam kit ta a.

⁸Chun, Hezekia’n Isai kawmah, “LALPA’n ei hihdam a, LALPA Ho-In a ni thum ni a ka chieh kit ding melchikna chu bang ahi dem?” a ti a.

⁹Chun, Isai chun, “LALPA’n a thil gen hi hih ngêi ding ahi, tih ziehi nanga dingin melchikna ding chu a hi: nisa lim chu kalbi sawm tienga a kitawl toh ahim, na deih, a hihloh leh, kalbi sawm tienga a kinungtawl?” a ti a.

¹⁰Chun, Hezekia chun a dâwng a, “Nisa lim chu kalbi sawm tienga a kitawl toh chu a baihlam taluo a, zie chu hilo in, lim chu kalbi sawm tiengin kinungtawl kit zaw hen,” a ti a.

¹¹Tichun, thiemgau Isai chun LALPA kawmah a paucham a, Ahaz dâkkâl chin hetna chu, kalbi sawm tiengin a kileh tawl sak kit ta a.

¹²Zielai chun, Baladan chapa Babulon leng, Merodak-Baladan chun, Hezekia chu a dam puoi tih a he a, lehkhate leh thilpiekte a thâk a.

¹³Tichun, Hezekia chun amau haw chu a na lawp a, a thil mantam kawihna In chengcheng te, dangka te, sana te, thil gimlim te, sathau mantamte, a gâlvan kawihna insung te, a go um chengcheng te chu a etsak a. A In leh a gamsung a thil, Hezekia’n a etsak loh himhim a um puoi.

¹⁴Zielai chun, thiemgau Isai chu leng Hezekia kawmah a chieh a, a kawmah, “Zie mite khah, khawitak apat a hung ahiu hi? Na kawma banga a hung gen uh?” a ti a; Hezekia chun, “Gam gamla tak Babulon apat a hung ahiu hi,” a ti a.

¹⁵Ziephet chun, amah chun, “Na In a hin banga a muh uh?” a ti a. Hezekia chun, “Ka insung a um chengcheng chu a mu suok kêi ui, ka go lak ah ka etsak loh himhim a um puoi,” ti’n a dâwng a.

¹⁶Ziephet chun, Isai chun Hezekia kawmah, “LALPA, Bangakai-hihtheipa chun hiti hin a tii:

¹⁷Ngaitie, na In sunga um chengcheng leh, tuni tieng a na pilepute’n a na khawlkhawmteu chu Babulon khuo a a chiehpih niu hungtung intin; bangmah nutsieh um puo’n a.

¹⁸Chuleh, nangmah ngêi in na hun hin ding, na chate lak ngêi ale chiehmangpih un tin, Babulon leng In achun mitilgeh hung hi’n au,” a tii, ti’n.

¹⁹Tichun, Leng Hezekia chun, zie thu chu, a dam sunga muonna leh bitna um ding genna’n a ngai a, a kawmah, “LALPA apat a thu nei hun hilh hi aphai,” a ti a.

²⁰Chun, leng Hezekia chanchin dangte, a thilhih theih dân te, dîl leh tui lâkna a siem a, khawpi sunga tui a lâklut te chu, Juda lengte vaihawm lai hun zikna bu ah a kizik hilo ahim?

²¹Tichun, Hezekia chu a pilepute kawmah a ipmu a, tichun, a chapa Manasseh chun a thasang in vai a hawm ta a.