Read Gangte 2 LENGTE 23 Bible Online

2 LENGTE 23 - Gangte bible

2 LENGTE 23

¹Chun, leng chun Juda gam leh Jerusalem khawpi a upa chengcheng chu a kawmah a sam khawm a.

²Chun, leng chu Juda gama mi chengcheng tawh, thiempute leh thiemgaute tawh, mipi chêngte chu tawh, a lien a neu in, Ho-In achun a va chieh to u a. Leng chun, a lehkhabu muhna sung u a thugawlh chuong chengcheng chu, ngeih tak in a zaknau ah a sim a.

³Chun, leng chu bân zul ah a ding a, lehkhabu a chuong, thugawlh chu sudet dingin, lunggil chengcheng leh, thagau chengchenga zui dingin leh, a thupiekte, a thuguot te zawp dingin, LALPA kawmah thu a gawlh a. Mipi cheng chun le, thugawlh chu zawp dingin thu a tiem tau a.

⁴Chun, Josia chun thiempu lienpen Hilkiah te, a bana thiempu, kawtkhak ngakte chu LALPA Ho-In sunga Baal leh Asher pathien limte leh, van a aksite hona dinga siem, ûmlebel haw chu ladawk vek dingin thu a pie a. Tichun, Leng chun, khawpi pawlam ah, Kidron kawmah a hâl a, a vamte chu Bethel ah a chieh pih a.

⁵Chun, milim hote thiempu haw, Juda lengte’n, Juda gam khawpi milim hona mun leh, Jerusalem tuoma gimlim hâl dinga a na guotteu chu a haihsak a; Baal ding, nisa ding, thapi ding, aksi lien haw ding leh, van a um cheng chengte dinga gimlim hâla pang te chu tawh a haihsak vek a.

⁶Chun, LALPA In a Asher pathiente chu Jerusalem pawlam, Kidron lui kawmah a ladawk a, Kidron luiphai achun a hâl ta a, a sunel dimdem a, a nêl chu mi vantâng te thân ah a theh a.

⁷Chun, Asher puon-gânte numei umna, temple a pasal kizuok haw umna chuh a suksiet saka.

⁸Chun, Juda khawpihaw apat chuh, thiempu chengcheng chuh a puidawk a, gamsung pumpi a thiempute haw hâlmang thillat hâlna munsangte chu a hihbuok sak suok kêi a. Khawpi kawtkhak lutna veilam panga, khawpi puopa Joshua kawtkhak lutna a kawtkhak haw a maichâm umte chu a hihchim vek a.

⁹Zie thiempute chu, Ho-In a a nasep u chu phal a hi puoh a, himahleh, a thiempu chanpihteu kawma, chângthâk chawl sawhloh a nek u vang chu phal ahiu ui.

¹⁰Chun, leng Josia chun, kuoma’n a chapau ahim, a chanuu ahim, Molek pathien kawma kithawihna dinga a piek lohna dingun, Ben-hinnom guoma milim pathien hona, Topheth chu a hihbuok sak a.

¹¹Chun, Juda lengte’n nisa hona dinga sakawl a latdawkteu chu a la mang vek a, zie hona dinga kangtalai kimang cheng chu a hâl tum suok sak a. (Zie chu, Ho-In huongsung kawtkhak kienga, leng in vengpa, Nathan Melek chênna apat a gamla lo cha a um ahi.)

¹²Chun, Ahaz insawng chunga Juda lengte’n maichâm a siemteu leh, Manasseh in, Ho-In huongsung nih a maichâm a siemte chu Josia chun a suchim a, a khên sie dimdem a, a them haw chu Kidron lui ah a paih a.

¹³Chun, Jerusalem kienga Sietna Tang changlam panga Sidon Pathien kihdak-um tak, Asteroth a ding te, Moab te pathien kihdak-um tak Kemosh a ding te, Ammon suonte pathien kihdak-um tak Milkom a ding te, Israel leng Solomon in munsang a siem haw chu lengpa chun a subuok a.

¹⁴Leng Josia chun suongphuh te chu a sugawp suok kêi a, milim, Asher pathien kawma latte chu a sat pai a, a dinna mun achun mihiem guhte a kawih a.

¹⁵Chun, zielo chu le, Josia chun, Israel te thil hihkhiel dinga puipa, Nebat chapa Jeroboam in Bethel a maichâm a siemte chule a hihchim a. Tichun, maichâmte chu a luoi chima, a suongte chu a sunel dik dek a, Asher lim chule a hâl tum ta a.

¹⁶Chun, Josia chu a vak kihei leh, tânga thân te chu a vak mu a; tichun, thân a guhte chu a va lâk sak a, maichâm achun a hâl ta a. Kut laia, leng Jeroboam, maichâm bula a din a, thiemgau in sawttak apat a a na genlawk bang khan, maichâmte chu a subuok vek ta a. Leng Josia chu a vak dâk viel a, zie thu a na genlawk pa thiemgau thân chu a mu a.

¹⁷Chun, amah chun, “Zie a thân ka vak muh khu kuo thân a?” ti’n a dawng a. Bethel khuo a mipite chun, “Juda gam apat a thiemgau, zie maichâm sukbuok a um ding ana genlawk pa thân kha ahi,” ti’n a dâwng u a.

¹⁸Chun, amah chun, “Bangmah lawh kiu; kuoma’n a guhhaw chu la chawn kiu hen,” a ti a. Khutichun, a guhte chu Samari apat a thiemgau hung pa guhhaw chu tawh bangmah a lawh ta puou a.

¹⁹Ziehaw cheng bana chun, Israel lengte’n, LALPA lungnat chawktho dinga milim hona maichâm a siemteu chengcheng chu, leng Josia chun a hihchim vek a. Bethel khuo a a hih bang mah khan, zie maichâmte chu a hihchim vek ta a.

²⁰Tichun, zie taka milim thiempute chu, a nasepnau maichâm chung chiet achun a that a, maichâm chung chiet achun mihiem guhte chu a hâl a. Tichun, Jerusalem ah a chieh kit ta a.

²¹Chun, leng Josia chun, mipite chengcheng chu, thugawlhna bu a kizik guolin, LALPA a Pathien uh limbawlna dinga Chiehkân Kut mang vek dingin thu a pie a.

²²Israel te chunga vaihawmte’n vai a hawm u apat leh, Israel lengte vaihawm sung chengcheng leh, Juda lengte vaihawm sung chengcheng in, khuti bang taka Chiehkân kut chu, kuoma’n a na mang kha puou ui.

²³Leng Josia vaihawm, kum sawm leh kum giet kum chun, zie Chiehkân Kut chu Jerusalem ah LALPA dingin a mang thei chauh ui.

²⁴Chun, thiempu lien Hilkia’n, Ho-In a lehkhabu a muh sunga dân kizikte sukpitinna dingin, leng Josia chun Jerusalem leh, Juda gam khuo danga, thitha phunsânte, aisânthiemte, In bîk pathiente, milim te leh, Judia gam leh Jerusalem a thil kihdak-um kimu sek haw chengcheng chu Josia chun a sumang vek a.

²⁵Mosi Dan banga lunggil chengcheng leh, hatna chengcheng a LALPA nasem, a masang in leng dang kuomah a um puou a; a nunga le amah bang chu kuomah a um kit diek ta puou ui.

²⁶Khutisa chun le, LALPA lungnatna nasa tak, leng Manasse’n ana suklungnat chengcheng zieka Judate chunga a lungnatna kuong chu a hai diek puoi.

²⁷Chun, LALPA chun, “Israel chate chunga ka hih bang chun, Judate chungah hih ing ka: Ka mitmuh apat in Judate chu nawhmang ing ka ting, Jerusalem khawpi, ka tel ngêi leh, zie tak achun ka min chu um ina ka tih In hi thehzak ing ka,” a tii.

²⁸Tichun, Josia chanchin dangte, a thilhih chengcheng te chu, Juda lengte vaihawm lai chanchin zikna bu ah a kizik hilo ahim?

²⁹Josia vaihawm lai chun, Aigupta leng Pharaoh-nekoh chu sepaihte pui in, Asuria leng tawh kido dingin Euphrates lui ah a chieh to a; leng Josia chun Aigupta sepaihte chu Megiddo mun ah dal a na guo a; tichun, kidona achun thah in a um ta a.

³⁰Chun, a mite chun Migiddo apat chun a luong chuh kangtalai in a puou a, Jerusalem ah a puo lut u a, a pilepute thân ah a vui tau a. Tichun, Juda mite chun Josia chapa, Jehoahaz a pui u a, thau a nuh u a, a pa thasang in leng in a siem tau a.

³¹Chun, Jehoahaz chu a vaihawm pat tûng chun, kum sawmnih leh kum thum a hi a, Jerusalem ah tha thum vai a hawm a; a nu min chu Hamutal, Libnah khawpi a Jeremia chanu ahi.

³²Chun, a pilepute hihdan zui in, LALPA mit muhin thil phalo tak a hih sek a.

³³Chun, Aigupta leng Nekoh chun Hamath gama Riblah khuo a suongkul a khum dingin a puimang a, Judate chu, dangka, talent za khat leh sana talent khat lei mana chawi dinga a siem phet chun, a vaihawmna a tâwp ta a.

³⁴Aigupta leng Nekoh chun Josia chapa, Eliakim chu, a pa Josia thasang chun leng in a pan sak a, a min chu Jehoiakim ti’n a theng a, Jehoahaz chu Aigupta gam ah a puimang a, tak achun a thi ta a.

³⁵Chun, Jehoiakim chun dangka leh sana chuh Pharaoh a pie phawt a, Pharaoh thupiek bangin a dangka a pie dingin sieh a chawih saka; Pharao-neko kawma piek dingin mitin lieu ding phut zat bang zel in, zie gama mite chu sana leh dangka a lieu saka.

³⁶Jehoiakim chu a vaihawm pat lai chun kum sawmnih leh kum nga a hi a; Jerusalem ah kum sawm leh kum khat vai a hawm a. A nu min chu Zebidah, Rumah khawpi a Pedai chanu ahi.

³⁷Tichun, a pilepute hihdan cheng hihin, LALPA mitmuh in thil phalo tak a hih sek a.