Read Gangte 2 LENGTE 25 Bible Online

2 LENGTE 25 - Gangte bible

2 LENGTE 25

¹Chun, Zedekiah chu Babulon leng, Nebuknezar chung achun a kiphin a. Khutichun, Zedekiah vaihawm, kum kuo na, tha sawmna, ni sawm ni chun, Nebuknezar chu a sepaihte tawh a hung u a, Jerusalem chu a hun do tau a. Khawpi pawlam achun panmunte khawh in, a ûmkimvel tau a.

²Khutichun, Zedekiah vaihawm, kum sawmlekhat na achun khawpi chu lâk in a hung um ta a.

³Tichun, tha lina, a ni kuo ni tieng chun, kiel a nasa mah mah ta a, a gamsung a mipite nek ding a um ta puoh a.

⁴Tichun, khawpi kulh bâng chu a vitvang u a. Babulon te chun khawpi um kimvel suok mahleu, zan lai chun sepaih chengcheng chu a taidawk tau a. Leng huon kawma bâng nih kikal achun a taidawk u a, Jordan luiphai lam achun a taisie tau a.

⁵Himahlele, Babulon sepaihte chun Zedekiah chu a delh u a, Jerikoh phaizawl ah a delh pha tau a; a sepaihte cheng chun a taihzak san tau a.

⁶Tichun, Zedekiah chu Riblah khuo a leng Babulon lengpa kawmah a pui u a; a chungchâng thu a tan sak ta a.

⁷Chun, Zedekiah chapate chu a mitmuh ngêi chun a that u a, Zedekiah mit haw chu a kheuhdawk sak a, kawl a buhsak a, Babulon lam ah a pui tau a.

⁸Tichun, Babulon leng, Nebuknezar vaihawm, kum sawm leh kum kuo na, tha ngana, ni sagih ni chun Babulon leng mivengte lawiupa Nebuzaradan chu Jerusalem ah a lut a.

⁹Ho-In leh leng In te leh, Jerusalem a miliente chênna In chengcheng chu a hâl tum vek ta a;

¹⁰Chun, mi veng pawl lawiupa kawma um Kaldai sepaihte chengcheng chun Jerusalem kimvel a kulh chu a suchim vek u a.

¹¹Chun, khawpi sunga nutsieh a umte leh Babulon leng kawma kipie te leh mipi um nalaite chu miveng lawiupa Nebuzaradan chun Babulon ah a pui veka.

¹²Himahleh, Juda gam achun a chagah diekte, bangmah neilote chu, grep huon enkawl ding leh, lo nasem dingin a nusieh a.

¹³Tichun, Ho-In a sumeng khuomte leh, thil luihna leh sumeng kuongte chu, Babulon sepaihte chun a sukêk suok kêi u a, a sumeng chu Babulon lam ah a puou a.

¹⁴Chun, bel te, vutluokna te, thaumei phita chehna te, thikkhe te leh sumeng bel cheng, Ho-In nasepna a matchâkte chu a kilak u a.

¹⁵Chun, sana leh dangkaguo a kisiem, thil chengcheng, kuongte leh mei lâkna dinga kimang sana kuong te nasan chu a puo mang vek tau a.

¹⁶Solomon in Ho-In a dinga khuom a siem nih leh, sumeng kuong leh, thil luihnate, sumeng te chu a gik dân chu teh theih ding guol ahi puoi.

¹⁷Khuom khat san lam chu tawng sawm leh tawng giet a hi a, a sip achun sumeng lûm a um a; zie lûm san dân chu, tawng thum a hi a; a lûm kimvel chun, pawl chilchel in, vaimimthei chang lima zemhawih ahi.

¹⁸Chun, sepaih hotu lien, Nebuzaradan chun, thiempu lien Seraiah te, a bana thiempu Zephania te leh mi dang, Ho-In a milien thum te chu salin a pui a.

¹⁹Chun, sepaihte puitu khat leh, leng panpih sek mi nga, a na um nalai te leh sepaihte hotu haw panpih sek, sepaih lam thil zikna chunga mawhpuo leh mi pawimawh dang sawmgupte chule a pui a.

²⁰Chun, Nebuzaradan chun Hamath gama, Riblah khuo a Babulon leng kawm achun a pui a.

²¹Zie tak achun leng chun a zêp diek a, a that ta a. Khutichun, Judate chu, a gamsung uh apat, sala puih dawkin a hung um tau hi.

²²Chun, Babulon leng Nebuknezar in Judia gama a nutsieh te ding chun Shaphan chapa Ahikam chapa Gedalia chu vaipuo’n a kawih a.

²³Khutichun, Juda gama miliente leh sepaihte, a na kipielote chun zie thu chu a het phet u chun, Mizpah a Gedalia kawmah a chieh u a. Amau haw chu: Nathaniah chapa, Ishamel te; Karea chapa, Johanan te; Tanhumeth chapa, Netophat khawpi a um, Seraiah te leh Maakah mi chapa Jaazaniah te ahiu ui.

²⁴Gedalia chun, zie mite leh a lawiteu kawm achun a kihâksiel a, a kawm u ah, “Kaldai te suok a um hi lau kiu in; zie gama khuo haw ahin um zing un la, Babulon lengpa thunuoi ah um un; tichun, nanguh dingin pha ding ahi,” a ti a.

²⁵Himahlele, a tha sagihna achun, leng suona mi, Elishma cha, Nathaniah chapa chu, mi sawm khat pui in, Mizpah a chun a chieh u a, Gedalia chu a va do tau a, a that tau a. Zie muna a umpih Judate leh Kaldai mite chule a that vek tau a.

²⁶Tichun, mi chengcheng alien aneu in sepaih lawiupate tawh a pawt u a, Babulon te a lauh ziek un Aigupta gam ah a chieh tau a.

²⁷Chun, Juda leng Jehoiakim sala a tân kum sawmthum leh sagihna, tha sawm leh tha nihna, ni sawmnih leh ni sagih ni’n hiti hi ahi a; Babulon leng Evil-merodak a lal tûng kum in Juda leng Jehoiakim chu suongkul apat in a puidawk a.

²⁸A kawmah phatak in thu a gena, Babulon sala puih a um, leng dang chengcheng sanga dinmun sangzaw leh limbawlna phazaw a pie a.

²⁹A suongkul van silhlechente chu a theng a, a damsung chengcheng chun, leng dawhkan ah an a ne zing ta a.

³⁰Tichun, a damsung cheng chu, nicheng in a lawh ding chu leng chun a pie zing tai.