Read Gangte 2 LENGTE 4 Bible Online

2 LENGTE 4 - Gangte bible

2 LENGTE 4

¹Thiemgau pawl khatte laka numei khat hin Elisha kawmah, “Hepu, ka pasal chu a thi ta a, amah khan LALPA chu a kihcha sek hi tih na he a; tuhin, a leibatna pa hi a hung a, ka chate nih hi suok a pui dingin a hung hi,” ti’n a lungzîn thu a gen a.

²Chun, Elisha’n a kawmah, “Banga ka hun hihsak ding? Na In ah bang na nei em, ei hilh in?” a ti a. Amahnu chun, “Na suoknu hin, sathau ûm khat mai lo chuh In ah bangmah ka nei puoi,” a ti a.

³Chun, Elisha chun, “Va chieh inla, na invengte chengcheng bel, bel hawm va khel khawm inla.

⁴Tichun, nang leh na chate chu In sung ah lut un la, kawt kikhak khum un la, zie belhaw chengcheng achun sathau chu sungin la; a dimna chu kawih dawk zelin,” a ti a.

⁵Khutichun, a kawm apat chun a pawt a, amah leh a chate chu In sung ah a lut u a, kawt a kikhakkhum tau a; belhaw chu a lau a, amah chun a na thun zel a.

⁶Chun, belhaw chu a dim nung chun, a chapate kawm achun, “Bel ei hun chawihsak kit un,” a ti a. Amau chun a kawmah, “Bel a um ta puoi,” a tiu a. Ziephet chun, sathau chu a kang ta a.

⁷Tichun, Pathien mi chu a va hilh a, amah chun, “Chieh in la, sathau chu va zuok in la, na leibat chu va din inla, a val cheng chun, na chapate tawh va khuosa tau un,” a ti a.

⁸Chun, ni khat chu, Elisha chu Shunem khuo ah a va chieh a, zie tak achun numei neizo tak hi a um a. Amah chun an ne dingin, a In ah a na kailut a. Zie a kipat chun, a chieh cheng leh, amahnu In a chu an ne dingin a lut sek a.

⁹Chun, amah chun a pasal kawmah, “Ngaitie, zie ei hung tawhtha zing sek pa hi, Pathien mi thiengtho ahi, tih ka hêi!

¹⁰Hung tie, insawng neucha siem sak hiting, tak achun zalkhunte, dawhkhângte, chutna te, thaumeite leh a tunna te kawih sak hiti; tichun, I kawma a hung cheng leh taka chuh a kichawlh theihna dingin,” a ti a.

¹¹Chun, ni khat chu, Elisha chu zie Shunem numeinu In achun a va chieh kit a; zie insawng chunga chun kichawl dingin a va kal to a.

¹²Chun, a suokpa Gehazi kawmah, “Zie Shunem numei hi vak sam tie,” a ti a. A va sama chieh chu a hungkit phet chun, a masangah a va dinga.

¹³Chun, amah chun a kawmah “Ngaitie, nangin theihtawp in nei duot a, nang bang ka hun hih sak die leh; leng ahim, sepaih lawiupa hun ho sak na nuom hi? gen tie,” a ti a. Chun, amah chun a dâwng a, “Ka chipihte laka chêng ka hi hila,” a ti a.

¹⁴Chun, amah chun Gehazi kawm achun, “Bang ahim ka hih sak ding?” a ti a. Gehazi chun a dâwng a, “Chapa a nei puoh a, a pasal chula a têk ta ngâl a!” a ti a.

¹⁵Chun, amah chun, “Va sam tie,” a ti a. Chun, a va sama, kawtkhak achun a ding a.

¹⁶Chun, Elisha chun a kawmah, “Kum kit tuhun vel mah hileh, chapa pawm ta’n la,” a ti a. Amahnu chun, “Khai, hepu! nang Pathien mi, na suoknu kawma hin lepchieh gen dah tang uo,” a ti a.

¹⁷Himahlele, numei chun nau a vawp a, Elisha’n a kawma a gen bang ngêi khan, zie hun a hungtun kit chun chapa a hing ta a.

¹⁸Chun, nausen chuh a hung khanglien a; a pa kawma buh âtte kawmah a chieh a.

¹⁹Chun, a pa kawm achun, “Ka luchang a nai, ka luchang!” a ti a. A pa chun a suokpa kawm achun, “A nu kawmah pui in,” a ti a.

²⁰Tichun, a pui a, a nu kawm a tun chun, sun tiengin, a nu pheichung ah a chu a, tak achun a thi den ta a.

²¹Amahnu chun Elisha umna pindan achun a puo to a, Pathien mi zâlkhun achun a vak kuol sak a, kawt a khakkhum a, a pawt ta a.

²²Chun, a pasal chu a sama, “Suok kuo ahim leh sabiltung khat ei hun ngaihtuoh sak tie! Thiemgau Elisha kawmah va tai ing ka ting, hungkit pai ing ka,” a ti a.

²³A pasal chun, “Bangati a, tuni khela a kawma chieh guo na hi? Tha thak la ahi nai puoh a, chawlhni Kut le ahi nai diek puoh ngâl a,” a ti a. Amahnu chun, “A khawk puoi,” a ti a.

²⁴Tichun, sabiltung a van a, a suok kawmah, “Taih sak inla, chieh kin in, thu ka hun piek loh chun awl chiehsak hiel ki’n,” a ti a.

²⁵Khutichun, a chieh ta a, Elisha umna Karmel tâng achun a chieh ta a. Elisha chun gamla tak apat a a na muh chun, a suok Gehazi kawmah, “Entie, zie khun, Shunem numeinu kha a hung hi!

²⁶Amah muok dingin va tai inla, ‘Na dam na’m? na pasal leh naupang khale a dam nau em?’ va ti’n,” a ti a. Numei chun Gehazi kawma chun, “Bangkim a phâi,” a na ti a.

²⁷Himahlele, Elisha kawm a va tun chun, a keng bul ah a bawkkhup a, a keng a tuchak kêi a. Amah chu hun nam dawk guo’n Gehazi chun a va zuon a, himahlele, Elisha chun, “Amah mai in nusieh in, a lungthim a lungkham ahi hi, tih helo na him? LALPA’n a chanchin hi ei na hilh nailo ahi,” a ti a.

²⁸Tichun, amahnu chun, “Ka pu kawma hin chapa ka hun ngên a ahim? Ei thêm ki’n ka ti hilo ahim?” a ti a.

²⁹Tichun, Elisha chu, Gehazi lam achun a kihei a, a kawmah, “Na puon chêng inla, ka mawlh hi na khut in chawi inla, kin takin chieh inla, mi na kituokpih ahim, a hun hopih ahim chule, kihopih sawt ki’n. In chu zang takin zuon inla, ka mawlh hi naupangpa maichang achun zam in,” a ti a.

³⁰Chun, naupangpa nu chun Elisha kawmah, “LALPA hinna leh na hinna sâlin ka gen hi, hun taihsan hiel puo’ng ka,” a ti a. Tichun, a nih u chun a kipan dawk khawm tau a.

³¹Chun, Gehazi chun amah chu a na makhelh a, mawlh chu naupang mai chung achun a kawih a; himahleh, aw leh hinna him a kilang puoh a. Khutichun, Elisha hopih dingin a vaikit a, “Naupang chu a tho hiel puoi,” ti’n a hilh a.

³²Chun, Elisha chu In a va tun chun, amah mai in pindan achun a va lut a, zâlkhun a naupang chu a thi ana hi a, amah kuolna a chun a na kuol sak u a.

³³Khutichun, kawt a khâk a, LALPA kawmah a paucham ta a.

³⁴Chun, a vak kaldawk a, naupang chuh a bawhkhum a, a mûk leh a mûk, a mit leh a mit, a khut leh a khut a sutuoh a. Naupang chunga a bawhkhum chun, naupang taksa chu a hung lum hiei hiei a.

³⁵Tichun, Elisha chu a tho a, In sung achun a vakviel a; chun naupang chu sagih vei a hung chi a, a mit a hun hak ta a.

³⁶Elisha chun Gehazi a sama, naupang nu chuh sam dingin a hilh a. Khutichun, a vak sama, A kawm a va lut chun, “Na chapa hi pawm in,” a ti a.

³⁷Tichun, amahnu chu Elisha keng bul ah a bawkkhup a; a maia lei si’n chibai a bûk a; a chapa chu a pawm a, a pawt ta a.

³⁸Khatvei chu gam pumpi a kiel a kiek lai chun, Elisha chu Gilgal ah a vaikit ta a. Thiemgau pawl khat a sinsak lai chun, a suokpa khat chu, mei chunga bel suong a, amau haw a dinga anchîm huon sak dingin a hilh a.

³⁹A lak uh a khat chu lo a ancheh hawl dingin a va pawt a. Gam-ûm gui hi a va mu a, gam-ûm gui chu puona chûn in, puok theih chin chun a hun puo ta a. A hun puok tun chun a sat nel a, bang khaugui a hih helo chun anchîm lak achun a thâk ta a.

⁴⁰Khutichun, zie mite haw nek ding chun a thuk dawk sak tau a. Khutia, anchîm chu a vak nek phet u chun, Elisha kawm achun, “E khai, gu ahi, nek theih ei puoi,” a ti tau a.

⁴¹Ziephet chun, Elisha chun, changbuong neukhat a vak ngên a, bel achun a sep lut a, “Mipite nek dingin thûkdawk un,” a ti a. Ziephet chun, bel sung achun thihna a um ta puoh a.

⁴²Chun, Baal-shalisha apat in mi khat a hung a, Elisha ding chun, buh tung masapen a siem buhmanpawl chângthâk sawmnih leh, buh thak vui, a dip in a hun chawih sak a. Amah chun, “Ziete haw nek ding hin pie tau u,” a ti a.

⁴³Chun, suokpa chun, “Ziehi, mi zakhat nek ding hin a kiting dinga mawh?” a ti a. Elisha chun, “Zie mite haw nek ding hin pie’n; LALPA’n hiti hin a tii: ‘Neu in tin, nek le ne seng puo’n au,’ a tih ahi,” a ti a.

⁴⁴Khutichun, a suokte chun a vak luih sak u a, a neu a, LALPA tih bang ngêi chun nek le a ne val tau hi.