Read Gangte 2 LENGTE 7 Bible Online

2 LENGTE 7 - Gangte bible

2 LENGTE 7

¹Chun, Elisha chun, “LALPA thu hi a na zau in! LALPA’n hiti hin a tii: Zing leh tu phat ding vel hin, Samari kulh kawtkhak bul ahin changbuong nêl zat, dan khat chu sekel khat a zawk hi’n tin, buhmanpawl dan nih chu sekel khat mah in zawk hi’n a,” ti’n a gen a.

²Chun, sepaih lawiupa leng kithuohpih pên pa chun Pathien mi chu a dâwng a, “Ngaitie, LALPA’n van ah tukvan hawng ding ahi chu uo; zie bang thil chu ahi thei maizen dinga ahim?” a ti a. “Ngaitie, na mit in vang mu ngêi in na tin, a nek chu vang nelo ding na hi,” ti’n, Elisha chun a dâwng a.

³Chun, kulh lutna kawtkhak bul ah phâk li a um u a; amau haw chun, “Bang dinga thih ngak maia chu zing ding I hiu hi?

⁴Khuo sung ah va lut mai hitiu, ti leuhing la, khuo sung a kiel ngâl u a, va thi mai ding I hi ngâl u a; chun, zie tak a hin chu zing leuhing la, thi tho ding I hi ngâl u a. Zieziekchun, hung tiem u! Suria sepaihte giehmun lam ah chieh mai hitiu; I hinnau ei hawih u leh hing hi tingun, ei na thah u leh la a thi hi mai hiting un,” ti’n a kiho u a.

⁵Tichun, Suria te giehmun lama chieh ding chun mielzul in a kipan dawk tau a; Suria te giehmun tuohtil a va tun u chun, ngaitie, kuomah cha a na um ta puou a.

⁶LALPA’n Suria sepaihte chu kangtalai gitte, sakawl taih git te, sepaih tamtak husa bang mai a zak sak ahi a; chuleh, Suria te chun, “Israel leng hin Hit lengte haw, Aigupta lengte haw, eihaw do dingin a hun gawih ahi,” ti’n a ngaihtuoh u a.

⁷Khutichun, a kipan u a, mielzul chun a taisie tau a, a puon-In teu, a sakawlteu, a sabiltungteu leh a giehmunteu chu a um ngei bang bangin a taihsan u a, a taisie tau a.

⁸Chun, zie phâk lite chun giehmun chu a va tun u chun, puon-In khata hin a va lut u a, a neu in a dâwn u a, zie taka dangkaguote, sana te, silhlechente chu a lau a, a va selguu a; chun a chieh kit u a, puon-In dangah a lut kit u a, zie taka chule a lau a, a va selgu kit tau hi.

⁹A zawh chun, “I hih dik hiel puou hi, tuni hi chanchin kipah-um tun ni ahi a, eihaw hi I thip hiet hiet u a; khawvak I ngak u chun gawtna tuok ngêi hitiu; zieziekchun, hung tiem u! Leng miliente va hilh hitiu,” ti’n a kiho u a.

¹⁰Khutichun, Suria te giehmun chu a taihsan u a, Samari khawpi achun a chieh tau a, khawpi kawtkhak ngakpa chu a sam u a, “Suria te giehmun ah ka va chieh u a, kuomah a na um puou a, mihing husa mawngmawng le a kiza puoi; sakawlte leh sabiltungte le kihên lo in a um u a, puon-In haw chule a um ngei ngei in a um zing mai hi!” ti’n a hilh u a.

¹¹Chun, kulhkawt ngakte chun thu a than viel u a, tichun, amau haw chun leng In sunga mite chu a va hilh tau a.

¹²Chun, lengpa chu zan chun a tho a, a miliente kawm achun, “Suria te haw ei bawl dân hi hun hilh ing ka. I gilkiel danteu hi a heu a, tichun, ‘Khawpi apat a hung pawt tieng u leh a hing in man hi tingun, khuo sung ah lut hitiu,’ ti a phul laka kisel dingin a giehmun uh a taihsan uh ahi hi!” a ti a.

¹³Chun, a miliente khat chun a dâwng a, “A bang hileh, khawpi sunga mipite hi mi thisa tawbang tho I hiu ui. Zieziekchun, mi khenkhat, sakawl nga hi tawh sawl hi tingun; thil umdan chu va en chien u hen,” a ti a.

¹⁴Tichun, sakawlkangtalai nih a pui u a, lengpa chun “Va entiem u leh!” ti’n Suria sepaihte chunga thil umdan chuh en dingin a sawl ta a.

¹⁵Tichun, Jordan lui tiengin a va delh u a; chun, ngaitie, Suria te’n a kinawh bêk ziek u a, a paihmang uh, silhlechen leh thuomphuo te chu lam tungtawna um chu a muu a. A mi sawlte chu a hung vaikit u a, leng chu a hilh tau a.

¹⁶Khutichun, Samari khawpi sunga mite chu a va tai u a, Suria te giehmun chu a va tung tau a. Khutichun, LALPA thugen bang ngêi khan, changbuong nêl zat tehna khat chuh sekel khatin a zuok u a, buhmanpawl tehna nih chu sekel khat mah in a zuok tau a.

¹⁷Chun, Elisha’n leng a kimuhpih dinga a hung suk laia a kawma a gen bang khan, lengpa’n a miliente laka a ginchak pên kulhkawtkhak ngaka a kawihpa chuh mipite chun kulhkawtkhak bul achun a tawhlum tau hi.

¹⁸Chun, Elisha chun leng kawmah, “Zing, tuphat vel hin, Samari kulh kawtkhak bul achun buhmanpawl tehna nih chu sekel khatin kizuok in tin, changbuongnel zat tehna khat chu sekel khat mah in kizuok in a,” ti a a gen lai khan,

¹⁹sepaih lawiupa khatin Elisha chu a dâwng a, “Zie chu tung thei puo’n tin, LALPA’n le guoh hun zuk sak diek puo’n a,” ti a a gen guol leh; Elisha chun, “Na mit in vang mu’n na tin, a nek vang ne lo ding na hi,” ti a a gen guol khan.

²⁰Khutibang tak chun a chungah a hungtung a, mipite chun kulh kawtkhak bul achun a tawh lum tau hi.