Read Gangte 2 LENGTE 9 Bible Online

2 LENGTE 9 - Gangte bible

2 LENGTE 9

¹Chun, thiemgau Elisha chun, thiemgau tangval haw laka khat a sama, a kawmah, “Na kâwng gâk inla, zie thau bawm hi chawi inla, Ramoth-gilead khuo ah va chieh in.

²Na va tun tak leh, Nimshi chapa Jehoshaphat chapa Jehu va hawl dawk inla; a suohpihte lak apat in sam dawk inla, indan sung gil ah lutpih in.

³Tichun, sathau bawm hi la’n la, a luchang ah sung inla, LALPA’n hiti hin a tii ti’n: ‘Israel te chunga leng hi dingin thau ka hun nuh ahi, ti’n’ hun ti’n. Tichun, kawt hawng inla, tai dawkin, um sawt ki’n,” a ti a.

⁴Khutichun, thiemgau tangval chuh, Ramoth-gilead achun a chieh ta a,

⁵Chun, a va tun chun sepaih lawiupa haw kikhawm khawm chu a va mu a, tichun amah chun, “Hepu, na kieng ah gen ding ka nei hi,” a ti a. Jehu chun, “A kuo pên kawma hin em?” a ti a. Amah chun, “Nang kawma hin ahi, hepu,” a ti a.

⁶Tichun, a nih u chun a lut u a, a luchang ah thau chu a sung a, a kawmah, “LALPA, Israel te Pathien in hiti hin a tii: ‘Ka mipi, Israel te chunga leng hi dingin sathau ka hun nuh hi.

⁷Ka thiemgaute leh, ka suok chengcheng te a thihna ziek u a, Jezebel chu ka gawt theihna dingin, na pu Ahab chapa, leng chuh that in na tin,

⁸Ahab inkawte kulh sung a kikulkhup a, kawt kikhakkhum a, Israel gama nutsieh a umte nasan le sattha vek ding ka hi.

⁹Chun, Ahab inkawte chu Nebat chapa Jeroboam inkawte leh Ahijah chapa Baasha inkawte bangin gawt ing ka;

¹⁰Chun, Jezebel chu Jezreel kulhpi bul achun ui in ne’n tin, a vui ding mawng mawng um puo’n a,’” a ti a. Zie thu chu a gen zawh phet chun, kawt a hawng a, a taimang tai.

¹¹Tichun, Jehu chu a milien chanpihte kawm achun a hungkit a; khat chun a kawmah, “A phalam thu ahim? Zie mingawlpa kha bang hih a na kawma hung ahim?” a ti a. Amah chun a kawmah, “Na mi het khak uh ahi a, a thugen khale na zau a puo!” a ti a.

¹²Amau chun, “Ka he kha puou hi, ei vak hilh tie!” a tiu a. Amah chun, “Hiti bang tak hin ei tii: ‘LALPA chun hiti hin ei tii; Israel te chunga leng dingin thau ka hun nuh hi’ ti’n,” a ti a.

¹³Chun, milien dangte chun kin takin a puon uh a suoh u a, kaltohna chungah a phah sak chiet uh a, “Jehu leng a hi tai!” ti’n pengkun a mût u a.

¹⁴Khutichun, leng Joram chu, Suria leng Hazael tawh Ramoth a a kido lai u a kisukliemna ki-enkawl dinga Jezreel a chieh chu Jehu chun a gûka thahna ding a ngaihtuoh a.

¹⁵Leng Joram chu vang Suria leng Hazael tawh a kidonau ah Suria te’n a sukliem u kha ahi a. Jehu chun a milien chanpihte kawmah, “Kei lama pang a hih u chun, Jezreel khuo a mite zie thu hi va hilh dingin kuomah Ramoth khuo apat hin pawtdawk hiel kiu in,” a ti a.

¹⁶Khutichun, Jehu chu kangtalai ah a chuonga, Jezreel ah a chieh a, Joram chu a na dam nai puoh a; Juda leng Ahaziah le Joram veh chun a na um a.

¹⁷Chun, Jezreel kulh a gâlveng a ding pa chun Jehu lawi hung chuh a vak mu a, “Mi khenkhat sakawl chunga hung ka mui,” a ti a. Joram chun, “Sakawl chung chuong mite sawl inla, guol pha ahiu em, melhet ahiu em tih va heu hen,” a ti a.

¹⁸Khutichun, mi khat, sakawl chunga chuong chuh a va chieh a, “Leng in hiti hin a tii: A phalam thu a hung na him?” a ti a. Ziephet chun, Jehu chun, “Zie thu chu nang buoipih ding ei puoi, ka nunga hin hung in,” a ti a. Gâlvengpa chun, “Ka mi sawlpau chun a kawm u chuh a va tung ngêi a, himahleh a hung vaikit ta puoh a,” ti’n a hilh a.

¹⁹Tichun, mi khat sakawl chunga chu hi a sawl kit a, zie pa chun le a kawmuh a va tung a, “Leng in hiti hin a tii: ‘A phalam thu a hung na him?’ ti’n,” a ti a. Jehu chun a dâwng a, “Zie lam thu chuh nang buoipih ding ei puoi, ka nunga hin hung in,” a ti a.

²⁰Gâlvengpa chun, “Amah le a tung ngêi a, amah chule a hung kîkkit ta hiel puoi. A kangtalai tawldan le Nimshi chapa Jehu tawldan ngêi ngêi ahi, mingawl bang mai in a tawl sek hi,” a ti a.

²¹Chun, leng Joram chun, “Kangtalaite guonggalh un!” a ti a. A kangtalai teu chu a siem u a, Israel leng Joram leh Juda leng Ahaziah chu a mau kangtalai gel ah a va pawt a, Jehu muok ding chun a va chieh a. Jezreel mi Naboth huon ah a va tuok u a.

²²Joram in Jehu a vak muh chun, “A phalam thu ahim le, Jehu?” a vak ti a. Jehu chun a dâwng a, “Na nu Jezebel hin zawlsaih leh dawi thilte leh milim hona te a chîn lai chanin a phalam thu bang a him um thei ding?” a ti a.

²³Chun, Joram chun sakawl a kaih hêi kawm chun, “Kithepna a um ahi hi, Ahaziah,” a ti a, a tai ta a.

²⁴Chun, Jehu chun a thalpi chu theihtawp in a zuk a, Joram dâk leh dâk kikal ah a kap a, thalchang chu a lungchang ah a let pai a, a kangtalai ah a awptha suk tai.

²⁵Tichun, Jehu chun a sepaih lawiupa Bedkar kawmah, “Pawm inla, Jezreel mi Naboth huon mun ah paih tha’n; tuma a nang tawh a pa Ahab nunga I chut khawm lai u a LALPA’n Ahab chungchâng thu kha hiti hin a na gen kha:

²⁶‘Thangni khan Naboth thisan leh a chapate thisan ka mu ngêi a puo! zie mun ngeia hin hun din ding ka hi,’ ti’n,” a ti a. “Zieziekchun, Joram luong hi paih dawk inla, Naboth lo ngei ah hun paih in, LALPA thutiem a guitunna dingin,” ti’n Jehu chun a panpihpa chu thu a pie ta a.

²⁷Himahlele, Juda leng Ahazia chun zie chu a muh phetin, a sakawlkangtalai chun Beth-Haggen khawpi lam ah a tai ta a, Jehu chun a delh a, “Amah le kangtalai a khan that ngâl un,” a ti a; tichun Ibleam khuo leng, Gur chieh tohna lampi a a chieh lai chun a suliem tau a. Khutichun Megiddo khuo ah a tailut a, zie tak achun a thi ta a.

²⁸Chun, a mite chun Jerusalem ah kangtalai in a puou a, amah thân ah, a pilepute lak ah David khawpi ah a vui tau hi.

²⁹Chun, Ahab chapa Joram in kum sawm leh kum khat vai a hawm kum in, Ahaziah chuh Judate chungah leng a hung hi ta a.

³⁰Chun, Jehu chu Jezreel khuo ah a va lut a. Jezebel in a na he a; tichun, a mit haw a na nuh a, a samte a hiet a, tichun, tukvan ah a na dâk dawka.

³¹Chun, Jehu chu kulh kawtkhaka a hung lut lai takin, “A pu that, nang Zimri, a phalam thu ahim le?” a ti a.

³²Chun, amah chu tukvan lam achun a vak dâk to a, “Kuo a kei lama pang, kuote a?” a ti a. Mi tilgeh nih ahim, thum ahim hi, amah lam nga’n a hung dâk suk u a.

³³Chun, amah chun, “Hun paih tha suk un,” a ti a. Khutichun a paih thau a; a thi chun bâng leh sakawlte chu a theh khum zeng zung a. Jehu chun a sakawl leh kangtalai chu a chung achun a taih sak a,

³⁴chun, In a chun a lut a, an a ne ta a, zie zawh chun, “Zie a hansie thuok nu khah va ladawk unla, va vui un, leng chanu ahi ngâl a,” a ti a.

³⁵Chun, a vui dinga va chieh u a, himahleh, a luguhte, a kengpekte, a khutbawmte tihloh chu a mu ta puou hi.

³⁶Khutichun, a hungkit u a, a hung hilh u a. Amah chun, “Zie hih LALPA’n Tishbe-mi, Elija manga, LALPA’n ‘Jezreel kulh kawmah uicha’n Jezebel chuh hun neu un tin,

³⁷Jezebel luong chu Jezreel khuo kulh kawmah, êk bang pheta theh zak hi’n tin, tichun, ziehi, Jezebel ahi hi tih het theih loh khawp in,’ tih thu a gen khah ahi hi,” a ti a.