Read Gangte 1 KHANGTHUBU 10 Bible Online

1 KHANGTHUBU 10 - Gangte bible

1 KHANGTHUBU 10

¹Khutichun, Philistia mite chun Israel te chu Gilboa tâng achun a do u a. Tichun, Israel mite chu, zie tak a chun tamtak thah in a um tau a, a dangte chu, leng Saul chu tawh a taisie tau a.

²Himahlele, Philistia mite chun Saul leh a chapate chu a delh zui u a; Saul chapa thum te, Jonathan, Abinadab leh Malkishua te chu a that tau a.

³Saul kimvel achun kidona chu a nasa ta mah mah a, melmate thal kap mite thalchang chun a kap kha ta a, a hihliem tau a.

⁴Ziephet chun, Saul chun, a gâlvan chawipa kawm achun, “Na chemzâm kha bawt dawk inla, ei hun sunlet in; khutilochun, zie zektan loh te hi hung untin kichiemna’n ei mang kha’n au,” a ti a. Himahleh, a gâlvan puopa tangval chun a sun nuom puoh a, a lau mah mah ngâl a. Ziephet chun, Saul chun a chemzâm chuh a la a, a bawh ta a.

⁵A gâlvan puopa chun Saul chu a thi tai tih a het phet chun, amah chun le a chemzâm chu a bawh a, a thi ta a.

⁶Khutichun, Saul chuh a thi a, a chapa thum te chule a thi tau a; tichun, a lalgam chuh a tâwp tai.

⁷Chun, Jezreel luiphai a mi chengcheng chun, Israel sepaih te chu a taisieu ui tih leh, Saul leh a chapate a thi tau hi tih a het phet u chun, a khuou chu a taihsan u a, a tai mang tau a; tichun, Philistia mite chun a va luoh tau a.

⁸Kido zawh a zing chun, Philistia te chu, a gâl thahteu van haw suoh sak dinga a va chieh u chun, Gilboa tânga Saul leh a chapate thi chu a va muu a.

⁹A van a sut sak u a, a luchang a tan u a, a gâlvan chu a lau a, a pathien limteu leh a miteu kawma chanchin-phuon dingin, Philistia te gam achun a thak viel tau a.

¹⁰A gâlvan chu, a pathienteu In ah a kawih u a, a lu chu Dagon In ah a tâk u a.

¹¹Gilead gama Jabesh mite chun, Philistia mite’n Saul a bawl dân cheng cheng teu chu a na het u chun,

¹²Mi hangsan chengcheng te chu a kipan dawk u a, Saul luong leh a chapate luong chu a lau a, Jabesh khuo ah a puou a, chun, a guhhaw chu Jabesh khuo a gangpi thing nuoi ah a vui u a, ni sagih an ngawlin a sun u a.

¹³Khutichun, Saul in LALPA thu a zawp nuom puoh a, LALPA chunga a gitloh ziek leh, LALPA dawng lo a, thitha zawlnei te a dawng a, phunsan a a dawt ziekin a thi ta a.

¹⁴Tichun, LALPA’n a that a, a lalgam chule Jessai chapa David kawmah a pie tai.