Read Gangte 1 KHANGTHUBU 24 Bible Online

1 KHANGTHUBU 24 - Gangte bible

1 KHANGTHUBU 24

¹Chun, Aron chapate laka lawi khenkhat kikhen dân chu hitibang hi a hi: Aron chapa lite chu, Nadab, Abihu, Eliezer leh Ithamar te ahiu hi.

²Nadab leh Abihu chu vang, a pau sang chun a thi masau a, suon a nei puou hi, zieziekchun, Eliezer leh Ithamar chu thiempu’n a hung pang tau a.

³Leng David chun Aron suonte chu, a nasep dân dungzui zel un a pawl in a khen a. Zie a chun Eliezer suon, Zadok in a panpih a, Ithamar suona Ahimelek in tawh a kithuohpih hi.

⁴Eliezer suonte chu pawl sawm le gup in a khen a, Ithamar suonte chu pawl giet in a khen zak a; zie chu, Eliezer suonte laka pasal a tam zawk ziek u a a hih ahi.

⁵Eliezer leh Ithamar suonte lak achun Ho-In nasem miliente leh Thagau lama puitu a um gel ziekun, a nasep ding u chu phunsân in a hawm u a.

⁶Eliezer suonte leh Ithamar suonte chu a banin phunsân in a bawl u a. Levi te laka lehkhazik a pang, Nethanel chapa Shemaiah chun a na ziklut zel a. Leng leh a miliente cheng, Thiempu Zadok leh Abiathar chapa Ahimelek leh thiempute inkuon lawiupa cheng leh, Levi inkuon cheng chu a hetpih in a pang u a.

⁷Tichun, a phunsân masak pên u chu Jehoiarib chungah a chu a, a nihna chu Jedaia chungah a chu a.

⁸A thumna chu Harim chungah a chu a, a lina chu Seorim chungah a chu a.

⁹A ngana chu Malkijah chungah a chu a, a gupna chu Mijamin chungah a chu a;

¹⁰A sagihna chu Hakoz chungah a chu a, a gietna chu Abijah chungah a chu a;

¹¹A kuona chu Jeshua chungah a chu a, a sawmna chu Shekania chungah a chu a;

¹²A sawm leh khatna chu Eliashib chungah a chu a; a sawm leh nihna chu Jakim chungah a chu a.

¹³A sawm leh thumna chu Huppah chungah a chu a, a sawm leh lina chu Jeshabeah chungah a chu a.

¹⁴A sawm leh ngana chu Bilgah chungah a chu a, a sawm leh gupna chu Immer chungah a chu a.

¹⁵A sawm leh sagihna chu Hezir chungah a chu a; a sawm leh gietna chu Happizez chungah a chu a.

¹⁶A sawm leh kuona chu Pethahiah chungah a chu a; a sawmnih na chu Jehezkel chungah a chu a.

¹⁷A sawmnih leh khatna chu Jakin chungah a chu a, a sawmnih leh nihna chu Gamul chungah a chu a.

¹⁸A sawmnih leh thumna chu Delaiah chungah a chu a, a sawmnih leh lina chu Maaziah chungah a chu a.

¹⁹Amau haw hi nasep ding pieka a um guol u a, Ho-In a chieh a, nasem dinga a suonpau Aron in LALPA Israel te Pathien thupiek zawpa, a na guot bangin zik ahiu hi.

²⁰Chun, ziehaw hi, Levi apat a suon, inkuon dangte lawiupate chu ahiu hi: Amram chate lak achun Shebuel a hi a, Shebuel chate laka chun Jedeiah a hi a.

²¹Rehabia suona chun, Ishia ahi.

²²Izhar, Shelomith suonte laka achun Jahath ahi.

²³Hebron chapate chu, a upapen Jeriah a hi a, a bana chu Amaria a hi a, a thumna chu Jahaziel a hi a, a lina chu Jekameam ahi.

²⁴Uziel chapate lak ah Mika; Mika chapate lak ah Shamir ahi.

²⁵Mika suohpihpa chu Ishia a hi a, Ishia chapate lak achun Zekaria ahi.

²⁶Merari suonte chu Mahli leh Mushi ahiu hi: Jaaziah chun chapa thum a nei a: Shoham, Zakar leh Ibri ahiu hi.

²⁷Merari suonte chu Jaaziah laka Beno te, Shoham te, Zakar te, Ibri te ahiu hi.

²⁸Mahli lak ah Eliezer a hi a, amah chun chapa a nei puoi.

²⁹Kish laka chun, Kish chapa chu Jerahmeel ahi.

³⁰Mushi suonte chu, Mahli te, Eder te, Jerimoth te ahiu hi. Ziehaw chu Levi te suon laka a inkuon uh lawiupate chu ahiu hi.

³¹Amau haw chule, a unauteu, Aron chapate mah bangin, leng David te, Zadok te, Ahimelek thiempute leh, Levi te inkuon lawiupate chu a hetpih in a pang u a; inkuon lawiupa pên leh a unauteu tawh kithuguol takin a hih u a.