Read Gangte 1 KHANGTHUBU 26 Bible Online

1 KHANGTHUBU 26 - Gangte bible

1 KHANGTHUBU 26

¹Ziehaw hi, Levi chite, Ho-In kawtkhak veng dinga nasep kihawp dân chu a hi: Kora chapate lak achun, Asaph inkuonte laka Kore chapa Meshelemiah a tel a.

²Chun, Meshullam chapate chuh a upapen Zekaria, a nihna Jabdial, a thumna Zebadiah a lina Jahniel

³a ngana Elam, a gupna Jehohanan, a sagihna Eliehoenai te ahiu ui.

⁴Zielo chun Obed Edom chapate chu a upapen Shemaiah, a nihna Jehozabad, a thumna Joah, a lina Sacar, a ngana Nethanel te ahiu hi,

⁵a gupna Ammiel, a sagihna Issakar, a gietna Peullethai te a hiua, amah chuh Pathien in a vangsak ahi.

⁶Chuleh, a chapa Shemaiah inle chapa li a nei a, amau chun a pa inkuon sung ah vai a hawm ui, amau chuh mihat leh hangsan ahih ziekun.

⁷Shemaiah chapate chuh Othni, Raphael, Obed, Elzabad ahiu a, a suohpihteu Elihu leh Shemakia chuh mihat ahiu hi.

⁸Zie Obed Edom chapate cheng chuh amau leh a chapateu tawh nasepna lama mihat thilbawl thei ahiu a, Obed-Edom apat in mi sawmgup leh nih ahiu hi.

⁹Chuleh, Meselemia chun chapa leh unau mi hattak tak sawm le giet a nei hi.

¹⁰Chun, Merari suonte laka Hosah chun le chapa li a nei a: Shimri chu (a upapen a hi puoh na a, a pa’n lawiupa pên in a siem hi)

¹¹a nihna chu Hilkiah a hi a, a thumna chu Tebalia a hi a, a lina chu Zekaria ahi; Hosah chapate leh a unaute chu a bawn un sawm le thum a hiu ui.

¹²Ho-In vengte chu, a inkuon uh bang zelin a khenzak u a. Ho-In achun Levi dangte bangin nasep ding a pieu a.

¹³A lien a neu in, a inkuon uh bang zelin, kawtkhak chenga um dingin phun a san u a.

¹⁴Chun, suohlam panga dinga phunsân chu, Shelemiah chungah a chu a. Chun, vaihawm thiem tak, a chapa Zekaria dingin phun a san u a, amah chan ding chun a aisân u chu mâllam pang ah a chu a.

¹⁵Chun, simlam panga dinga a phunsân u chu, Obed-Edom chungah a chu a, chuleh, Assupim, thil kawihkhawmna In chu, a chapa chan dingin a puk a.

¹⁶Chun, tumlam panga dinga a phunsân u chu, a chieh tohna lampi a Shalleket kawtkhak venna tawh, Shuppim leh Hosah a chan dingin a puk a.

¹⁷Tichun, suohlam pang ah gup a um u a, ni chengin mâl lam ah li, sim lam ah li zelin. Thil kawihkhawmna In ah nih gel in a um ui.

¹⁸Tumlam a in huongsung zawtna ding chun a lutna li; in huongsung achun nih tawh.

¹⁹Ziehaw hi ahiu hi, Kore chapate leh Merari chapate, kawtkhak veng lawi a a pan sak teu chuh.

²⁰Chun, Levi te laka chun Ahija chu, Ho-In a sum kawihna leh, Pathien kawma thillat kipiete kawihkhawmna, go bawm enkawl dinga guot ahi.

²¹Gershon chapate laka khat, Ladan chu, a chapa Jehiel inkawte leh a inkuonpihte danghaw hun suontu chu ahi.

²²Ladan chapa nih te, Zetham leh Joel chu Ho-In sum kawihna leh thuomphuo kawihkhawmna in enkawl ahiu a.

²³Amramte haw, Izhar te haw, Hebron te haw, Uziel te haw suonte chule nasep ding piek ahiu hi.

²⁴Mosi suona Gershom chapa Shebuel chu, Ho-In sum kawihkhawmna in enkawl ahi.

²⁵A unaute chu Eliezer chapa Rehabia te, Jeshai te, Joram te, Zikri te, Shelomith te ahiu hi.

²⁶Shelomith leh a unaute chu leng David leh a inkuon uh lawiupa sepaih sangkhat chunga lawiupa leh, zakhat chunga lawiupa leh, sepaihhawn lawiupate’n a hih thientho sau, thil thiengtho kawihkhawmna in cheng cheng enkawl ahiu hi.

²⁷Kidonaa gâllâk thil haw chu, Ho-In siemphatna a mat dingin a lân thiengtho uh a.

²⁸Chun, thiemgau Samuel te, Kish chapa Saul te, Ner chapa Abner te, Zeruiah chapa Joab te’n a thilpiekteu leh, Ho-In siemna ding a piekteu taphawt chu, Shelomith leh a unaute a etkawl sak u a.

²⁹Chun, Izhar suonte lak achun, Kenania leh a chapate chu, vaihawmna lam thil leh, thil zikkhawmna vawp leh, Israel mipite kinakna thu a thutan dingin a guot u a.

³⁰Chuleh, Hebron suonte lak achun, Hashabia leh a unaute, mi hangsan sangkhat leh zasagihte chu, Jordan gâl tumlam a Israel te lawiupa ahiu a; LALPA nasepna lam chengcheng leh, leng vaihawmna lama hotu ahiu hi.

³¹Hebron suona Jerijah chu, a suon uh chungchâng thu achun, Hebron te lawiupa pên ahi. Leng David leng a hung hihna, kum sawmli a hih kum a, Hebron suona inkuon a etnau achun, sepaih hangsan, zie suona mi, Gilead gama Jazer a cheng chu a mudawk u a.

³²Leng David chun Jeriah inkawte lak apat chun inkuon lawiupa mi, sangnih leh zasagih a teldawk a, Jordan suohlam panga Reuben te, Gad te leh suohlam a Manasseh te gama, Israel chate chunga sakhuo lam leh mipi vaihawm dingin a tel ta a.