Read Gangte 1 KHANGTHUBU 29 Bible Online

1 KHANGTHUBU 29 - Gangte bible

1 KHANGTHUBU 29

¹Chun, leng David in mipi cheng chengte kawm achun, “Pathien teldawk, ka chapa Solomon hi a naupang nalai a, bangmah a he thei nai tadih puoh a, a sep ding chula a nasa ngâl a; Ho-In chu mihiemte ding a hi puoh a, LALPA Pathien a ding a hi zaw ngâl a.

²Tichun, Ho-In sakna dingin sana te, dangkaguote panna a dingin dangkaguote, sumeng te panna ding chun sumeng te, thik lam thilte ding chun thikte, thing lam thila ding chun thingte chu theihtawp in ka na guonggalh ta a. A kal a zeh ding Onuk suongte, suong zem hawih te, a belh thawh dingin suong vak chi chuom chuomte leh, suongmantam chitin chengte leh marble suong tamtak te tawh.

³Zie chauh chu hilo in, ka Pathien Ho-In hih ka deih mah mah ziekin, keimah sum, sana leh dangkaguote le, khutthiemte na guonggalh sate tihloh in ka pie a,

⁴Sana talent sangthum leh dangkaguo thiengtho talent sangsagih tawh ka pie a.

⁵Chuleh, thil chuom chuom a mi khutthiemte mat dingin, sana pawimawhna a mat dingin sanate, dangkaguo matna dinga mat dingin dangkaguo te le ka pie a. Tuhin, LALPA dinga kipâk taka pie phal na um u?” a ti a.

⁶Tichun, Israel inkuon khat laka lawiupate, Israel nam lawiupate, sangkhat chunga lawiupate, zakhat chunga lawiupate, leng nasem lawiupate chun kipâk takin,

⁷Ho-In sakna dingin sana talent sangnga leh darik singkhat, dangkaguo talent singkhat leh sumeng talent singkhat leh sanggiet leh thik, talent nuoikhat a pieu a.

⁸Suongmantam neite chun, Gershon mi Jehiel etkawlna, Ho-In sum In a chun a kawih u a.

⁹Tichun, mipite chu a kipâk mah mah u a, lunggil kibang pua, kipâk taka LALPA a piek ziekun; leng David le nasatak in a kipâk ta a.

¹⁰Khutichun, David in mipi chengcheng te ma achun LALPA chu a pakcha a, “Aw LALPA, ka puu Jakob Pathien, kumlekhuo a pahchak in um in.

¹¹Aw LALPA, lopinate, thilhih theihna te, limbawlna te, guolzawhna te, lalnate, nanga a hi a; lei leh van a um chengcheng hi nanga ahi ngâl a; aw LALPA, gam chu nanga ahi a, mi chengcheng laka chungnung pên na hi.

¹²Hauhsakna leh limbawlnate hi na kawma kipan a hi a, bang cheng chungah thu na nei a; thilhih theihnate na khut ah a um a; mi chengcheng suklopina leh hatna piek theihna na nei hi.

¹³“Tuhin, ka Pathien uh, kipahthu gen in, na min lopi chu ka pakchau hi.

¹⁴Himahlele, zie tawbang lâwm lâwma thalawp taka ka hung kipiek theih u hi, kei hi kuo ka hi a, ka mipite hile bang a hiua ahim? Thil cheng cheng hi nanga kipat ahi a, nanga mah chu ka hun pie kit chauh uh ahi zaw ngâl a.

¹⁵Ka pileputeu bang khan keihaw vang, na masanga hih malzin, mi kawma tham maimai bang ka hiu hi. Lei chunga damsung nite chu lim bang phet a hi a, thihna pumpelhna ding him a um puoi.

¹⁶Aw LALPA ka Pathien uh, na min thiengtho limbawlna dinga Ho-In ka sakna dingun, zie hauhsakna thilte hi ka hun chawi khawm ui. Ziehaw hile nangmah apat vek ahi a, nanga vek ahi.

¹⁷Ka Pathien uh nangin lunggilte na patep sek a, diknate le na kipahpih hi tih ka heu a. Kei hin vang lunggil tak takin, zie thil haw hi kipâk takin ka hun pie a, zie a na mipite hin le, kipâk taka na kawma hun lân ka muh hin ka kipâk mah mah hi.

¹⁸Aw LALPA, ei suontuu Abraham te, Isak te, Jakob te Pathien, na mite’n hitibang lunggil hi a put zing theihna dingun, a lunggil teu hi nanga dinga ginum zing dingin siem inla.

¹⁹Ka chapa Solomon hi, na thupiekte, na thu hetsak te, na dante, zawp a, ziehaw chengcheng hi hih ding leh, ka na guonggalh masaksa, Ho-In sa. ding hin lunggil phabukim put sak in,” a ti a.

²⁰Chun, zie zawh chun David in mipi cheng chengte kawm achun, “Khaile, LALPA na Pathien u chuh pakchau un,” a ti a. Tichun, mipi chengcheng chun LALPA, a pileputeu Pathien chu a pakchau a, a khun u a, LALPA leh leng chuh chibai a bûk u a.

²¹A zing chun, LALPA kawma kithawihna dingin leh hâlmang thillat dingin gancha a that u a, mipite kawma le nek ding a pieu a. Zie bân achun bâwngchal sangkhat, belamchal sangkhat leh belamno sangkhat kithawihna dingin a pieu a, maichâm achun a hâl u a.

²²Zie ni chun, LALPA masang achun kipâk takin a neu in a dâwn u a. A nih vei na ding chun “Solomon chu leng ahi,” ti’n a phuong kit u a, a leng dingun LALPA min in sathau a nuh u a; Zadok chu a thiempu dingun a siem tau a.

²³Khutichun, Solomon chu, LALPA lalchutphah tundawk achun, a pa David thasang in leng in a chu ta a. Leng lawhting tak ahi a, Israel nam cheng cheng chun a thu a zawp u a.

²⁴Lawiupate cheng leh, mihat hangsante leh leng David chapa cheng chengte chu, leng Solomon kawmah a kitulut u a.

²⁵Chun, LALPA’n Solomon chu Israel te chengcheng mitmuh in nasatak in a a chawisanga, Israel gama a masanga lengte laka kuoma’n a na chan khâk loh uh, leng hihna lopitak a chan sak ta a.

²⁶Khutichun, Jessai chapa David chun Israel te chungah vai a hawm a,

²⁷Chun, Israel te chunga a vaihawm sung chu, kum sawmli a hi a. Hebron ah kum sagih vai a hawm a, Jerusalem ah kum sawmthum leh kum thum vai a hawm hi.

²⁸Tichun upa tak leh têkkûn dam in, hausa tak leh pahchak lawh in a thi ta a, a chapa Solomon chun a thasang in vai a hawm tai.

²⁹Chun, leng David chanchin chu, abul apat a tâwp gei in, thiemgau Samuel lehkhabute, thiemgau Nathan lehkhabute, thiemgau Gad lehkhabute haw ah a kizik hi.

³⁰A vaihawm thute, a thilhih theih ziete, amah leh Israel te chung leh, gam chengcheng chunga thil hung um dante tawh a kizik hi.