Read Gangte 1 KHANGTHUBU 5 Bible Online

1 KHANGTHUBU 5 - Gangte bible

1 KHANGTHUBU 5

¹Ziehaw hi Jakob chapa upapen, Reuben suonte chu ahiu hi: (A pa zalkhunpi a kaih ziekin, chapa upapen hihna chu a chan ta a, zie chu Israel chapa Joseph chapate kawma piek in a um a, khutichun, pien dân dungzui a khanggui sutna achu tel sak loh ahi.

²Juda phung chu a suohpihte laka chun a thupi pên a, nam chengcheng laka vaihawmtu ding chu, amah apat chun a hung pawtdawk a, bang cheng hileh, cha upa hihna chuh Joseph insung ah a um hi)

³Jakob cha upapen, Reuben chun chapa nga a nei a: Hanok te, Pallu te, Hezron te, leh Karmi te ahiu hi.

⁴Joel chapa chu Shemaiah ahi a, Shemaiah chapa chu Gog ahi a, Gog chapa chu Shimei a hi a;

⁵Shimei chapa chu Mika ahi a, Mika chapa chu Reai ahi a, Reai chapa chu Baal ahi;

⁶Baal chapa chu Beera, Asuria leng Tiglath Pileser in sala a puih chu ahi, zie pa chu Reuben nam a luchangpen chu ahi.

⁷A inkuon uh kizik dân dungzuia, Reuben te phung luchang chu ziehaw hi ahiu ui: Jeiel te, Zekaria te,

⁸Azaz chapa Bela te, Shema tupa Joel inkawte chu ahiu hi. Ziete haw chu Aroer leh, a gam bung khen, mâllam apat Nebo leh Baal Meon tiengin a cheng u a.

⁹Gilead gam achun, ganguol a hauh ziekun, suohlam a Euphrates lui apat a thalek lutna tiengin a luoh suok tau a.

¹⁰Saul dam lai chun Reuben te chun Hagri te chu a do u a, kidona chun a that u a, tichun, Gilead suohlam gam tungtawn in, a gam u chu a luoh tau a.

¹¹Gad suonte chu, Bashan gama Reuben te umna mâllam panga, Salekah suohlam tiengin a cheng u a.

¹²Zie phung a luchang chu, Joel a hi a. a bana chu Shapham a hi a, Janai leh Shaphat chu Bashan gama phung dangte luchang chu ahiu hi.

¹³Mi dang khenkhatte chu, zie phung sagihte apat hi ahiu ui: Mikael, Meshullam, Sheba, Jorai, Jakan, Zia leh Eber phungte hi ahiu ui.

¹⁴Ziete chu Huri chapa Abihail suonte ahiu a, a pileputeu chu hitibang a hi sut kit ahiu ui: Abihail, Huri, Jaroah, Gilead, Mikael, Jeshishai, Jahdo Buz,

¹⁵Abdiel chapa Ahi leh Guni tupa chu zie phungte luchang chu ahiu ui.

¹⁶Tichun, Gilead gama Bashan leh a khawpihaw leh, Sharon phaizawl gam chengcheng, a gamgi tiengin a luoh u a.

¹⁷(Ziehaw chengcheng chu, Juda gam leng, Jotham vaihawm lai leh, Israel gam leng Jeroboam vaihawm laia suonte sutna a zik ahiu hi.)

¹⁸Reuben te, Gad te, Manasseh nam kimkhatte laka hangsan chiet, phaw leh chemsau chawi thei, thal kap thiem, kido thiemte chu, singli leh sangli leh zasagih leh sawmgup ahiu hi.

¹⁹Hagri te, Jetur te, Naphish te, Nodab te chu a do u a.

²⁰Pathien achun a ginnau a ngau a, a kawma chun panpihna a ngên u a, tichun, Pathien in a ngetnau chu a dâwng a, Hagri te leh a kithuohpihteu chunga chun zawhna a pie ta a.

²¹A melmateu apat chun, sangawngsau singnga, belam nuoi nih leh singnga, sabiltung sangnih leh mihing nuoikhat chu a man tau a.

²²Zie kidona chu Pathien phasakpih a hih ziekin, mi tamtak a that u a. Sala puih manga a um macheng u chun, zie gam achun a cheng zing tau hi.

²³Manasseh suon, nam kimkhatte chu, Bashan apat a Baal-hermon mâllam pang, Senir te, Harmon tâng tiengin a cheng tau a.

²⁴Ziete haw hi, a inkuon uh lawiupateu chu ahiu hi: Hepher te, Ishi te, Eliel te, Azsriel te, Jeremia te, Hodavia te, Jadial te, mihat hangsan, mi minthang, a puteu inkuon lawiupa ti a het ahiu hi.

²⁵Himahleh, a pileputeu Pathien chungah thil a hihkhiel u a, a masang uh a Pathien in a sukmang sa, zie gama pathiente lak achun a zawlsai tau a.

²⁶Khutichun, Israel Pathien chun, Asuria gam awptu Pul (Tiglath Pileser le kiti) lunggil chu a chawktho ta a, amah chun Reuben te, Gad te leh Manasseh nam kimkhatte chu a man a, Halah, Habor leh Hara leh Gozan lui haw achun a puimang a, tuni tiengin a um tau hi.