Read Gangte 2 KHANGTHUBU 1 Bible Online

2 KHANGTHUBU 1 - Gangte bible

2 KHANGTHUBU 1

¹Chun, David chapa Solomon chu a gamsung achun sukdet a hung hi ta a. LALPA a Pathien chuh a kawmah a um a, nasatak in a hih lopi ta a.

²Chun, leng Solomon chun Israel te chengcheng, sepaih sang chunga lawiupa te, za chunga lawiupa te, vaihawm te, Israel gamsung cheng chenga milien, inkuon lawiupa cheng chengte kawm achun thu a gen a.

³Amah leh a mipi kikhawm khawm chengcheng te chuh Gibeon a Pathien hona muna va chieh dingin thu a pie a. LALPA suok Mosi’n thalek muna a siem LALPA umna puon-In kha taka chuh a um ziekin.

⁴(Thugawlh kawihna thingkuong chuh Jerusalem ah a um a, David in Kiriath-Jearim apat a na pawto a, a umna dinga a siemna mun akhan kawih in a um ta ngâl a.)

⁵Zie ban achun, Hur chapa, Uri chapa Bezalel siem sumeng maichâm chu LALPA umna puon-In mai achun a um a. Leng Solomon leh a mipite chun zie tak achun Pathien a va ho u a.

⁶Chun, Solomon chuh puon-In a mipite Pathien hona a sumeng maichâm achun a kalto a, kithawihna te lân in, hâlmang thilpiek in gancha sangkhat a lân ta a.

⁷Zie zan chun Solomon kawmah Pathien a kilak a, tichun a kawmah, “Banga ka hun piek ding ei ngên in?” a ti a.

⁸Solomon in Pathien kawmah, “Ka pa David kawm akhan lungsietna nasatak na na latsak ta a, a thasang in leng in nei siem ta a.

⁹Tuhin aw LALPA, ka pa David kawma na thutiem kha sukpitit hi hen la; leia leivui zah hiela tam mipite chung ahin leng in nei siem ta ngâl a.

¹⁰Ka lut ka pawt a, zie mipite hi vai ka hawm sak theihna dingin chitna leh hetna ei pie’n. Na mi zie zah lâwm lâwm hi kuo’n vai a hawm sak thei dinga ahim?” a ti a.

¹¹Pathien in Solomon kawmah, “Zie hi na lunggil a a um ziekin leh, neihzawhna te, hauhsakna te leh zahumna te ahim, na melmate thihna ding le ngên lo a, damsawt na ahim le ngên lo a; a chunguh a lenga ka hun siem a, ka mite vai na hawm sak theihna dinga nangmah a ding ngeia chitna leh hetna na nget zawk ziekin;

¹²Chitna leh hetna chu piek na hi tai! Chun, na masanga lengte kuoma’n ana neih khâk loh uh, chun, na nunga le kuoma’n zie chuh a neih loh dinguh hauhsakna te, neihzawhna te, zahumna te ka hun piei,” a ti a.

¹³Khutichun, Solomon chuh Gibeon a Pathien hona mun puon-In apat chun Jerusalem ah a vaikit ta a, Israel te chungah vai a hawm ta a.

¹⁴Chun, Solomon in kangtalai te leh sakawl chung chuong mite chu a kai khawm a; kangtalai sang khat leh zali leh, sakawl chung chuong mi singkhat leh sangnih a nei a. Ziehaw chuh kangtalai kawihna khawpi haw leh Jerusalem achun a kawih a.

¹⁵Chun, leng chun dangka leh sana chu Jerusalem a suong tawbang hiela tam leh, Sidar thingte chu phaigam theipi thing banga ngaih khawp hiela tamin Jerusalem achun a kawih a.

¹⁶Solomon sakawl leh patngat puon neih haw chu Aigupta gam apat a tawl dawk ahiu a; leng sumkawlveite chun a hawn hawn in a na khâk sek uh a, a hawn hawn a a châwk zel ahi.

¹⁷Aigupta gama kangtalai haw chu dangkaguo zagup zelin a ava chaw sek u a, chun, sakawl haw chu dangkaguo sekel za leh sawm nga zelin; khutibangmah chun Hit mite lengte cheng leh Suria leng ten le a va chaw sek ui.