Read Gangte 2 KHANGTHUBU 11 Bible Online

2 KHANGTHUBU 11 - Gangte bible

2 KHANGTHUBU 11

¹Chun, leng Rehoboam chu Jerusalem a tun in, Israel mâllam namte do a gam la kit ding in Juda leh Benjamin inkawte, mi hangsan chiet teldawk, nuoikhat leh singgiet zet a samkhawm a.

²Himahleh, thiemgau Shemaiah kawmah LALPA thu a hungtung a,

³Juda lengpa Solomon chapa Rehoboam kawmah leh Juda gam leh Benjamin gama Israel mi chengcheng te kawmah,

⁴“LALPA’n hiti hin a tii, ‘Na va chieh loh dinguh ahi, na suohpihteu le va do kiu: na In lam chiet u ah chieh kit u; zie hih keimah hih ahi’; ti’n gen ah,” a ti a. Khutichun LALPA thupiek a zawp u a, Jeroboam do dinga a chieh guot u chu a vaikit tau hi.

⁵Chun, Rehoboam chu Jerusalem ah a um a, Juda gam ah kiven na ding khawpite a siem a:

⁶Tichun, Bethlehem khuo te, Etam te, Tekoa te a tungdawk a,

⁷Chun, Bethzur te, Soko te, Adullam te,

⁸Gath te, Mareshah te, Ziph te,

⁹Adoraim te, Lakish te, Azekah te,

¹⁰Zorah te, Aijalon te, Hebron khuote; ziehaw chu Juda leh Benjamin gam a kulh nei khuo te ahiu hi.

¹¹Chun, zie kulh haw chu a hihdet a, lawiupa te a kawih a, nek ding te, thaute, uain te a kawihkhâwm a.

¹²Chun, khaw chengah phaw te, tiengcha te, a kawih a, khuo dettak in a siem a. chun, Juda leh Benjamin gam chu a mah a ahi ta a.

¹³Israel gamsung cheng a thiempu te leh Levi te chu a gam u apat chiet in Juda simlam achun a hung u a.

¹⁴Levi te chun a gam u leh a umnau chu a hun pawtsan u a, Juda gam leh Jerusalem ah a hung u a: LALPA dinga thiempu na sem lo dingin leng Jeroboam leh a chate chun amau chu a haihsak u a.

¹⁵Tichun, amah chun, munsang a ding leh thitha hona ding leh bâwngno lim a siemte ding chun thiempu a guot ta a.

¹⁶Khutichun, amau haw nung chun Israel nam laka a lunggil u a Israel te LALPA Pathien hawl taphawtte chuh a pulepateu LALPA Pathien kawma kithawi dingin Jerusalem ah a chieh uh a.

¹⁷Khutichun Juda gam chu a sudet u a, kum thum sung chu Solomon chapa Rehoboam chu a pan pih u a: kum thum sung chuh David leh Solomon lampite chuh a zuih ziekun.

¹⁸Chun, Rehoboam chun David chapa Jerimoth chanu Mahalath zi’n a nei a, zie chuh Jessai chapa Eliab chanu Abihail chanu a hi:

¹⁹amah apat chun chapa thum a nei a Jeush te, Shemariah te, Zaham te.

²⁰Chun, amah nung in Absalom chanu Maakah a nei a; a mah chun Abijah te, Attai te, Ziza te, Shelomith te a hinsak a.

²¹Chun, Rehoboam chun Absalom chanu Maakah chu a zite leh a meite chengcheng lak achun a hehpih chuom diek a; zi sawmlegiet leh mei sawmgup a nei a, chapa sawmnih leh giet leh chanu sawmgup a nei hi

²²Chun, Rehoboam in Maakah chapa Abijah chu lawiupa’n a siem a, amah chuh lenga siem ding dân a ngaihtuoh a.

²³Khutichun, chingthei takin a hun hih a, a chapa te chengcheng chuh Juda gam leh Benjamin gam chengcheng kulh nei khuo haw ah a um zak sak suok a; nek ding tamtak a pie a. Chun a mau dingin zi tamtak a hawl sak hi.