Read Gangte 2 KHANGTHUBU 12 Bible Online

2 KHANGTHUBU 12 - Gangte bible

2 KHANGTHUBU 12

¹Chun, Rehoboam in gam chu ahung kiphuhdet a, mi hattak a hung hih phet chun, amah leh a mipi te chengcheng chun LALPA dân chu a kiheimangsan tau a, Israel mi cheng inle amah a zui tau hi.

²Chun, hiti hi a hi a, leng Rehoboam lal kum nga kum in LALPA chunga a gitloh ziekun Aigupta leng Shishak chu Jerusalem do dingin a kuon to a.

³Kangtalai sangkhat leh zanih, sakawl chung chuong mi sang sawmgup tawh, chuleh, Aigupta gam apat a hung mipi simsenloh tawh; Lub te, Sukite, Ethiopia sepaih te tawh ahiu ui.

⁴Juda gama kulh nei khaw haw a lau a, Jerusalem tiengin a va tung u a.

⁵Thiemgau Shemaiah chu Rehoboam leh Juda te lawiupa Shishak a pata suohchak guon Jerusalem a kikhawmte kawm achun a va chieh a, a kawm u ah, “LALPA chun hiti hin a tii: ‘Nei hengilh tau a, zieziekchun ken le Shishak khuta ka hun kawih na hi tau hi,’ ti’n,” a vak ti a.

⁶Khutichun Israel te lawiupa te leh leng chuh a hung kikhieniem u a, “LALPA chu a thilhih a hin a dik ahi,” a tiu a.

⁷Chun, LALPA’n a kikhiekniem u chu a muh in LALPA thu chu Shemaiah kawmah a hungtung a, “A kikhieniem tau a; zieziekchun sumangthai suok puo’ng ka ting, a bang hukbit ing ka ting, Shishak mang in Jerusalem chungah ka lungnatna sungtha puo’ng ka.

⁸Himahleh, a suokte hung hiu untin, zie gam haw a lal gam nasepna leh ka nasepna chu bang tawbang ahih hethei un au,” ti’n.

⁹Khutichun, Aigupta leng Shishak chu Jerusalem do dingin a va chiehto a, Ho-In a go haw leh leng In a sum haw a la a, a la suok kêi a; Solomon siem sana phawte le a la vek a.

¹⁰Chun, Leng Rehoboam chun ziehaw thasang chun sumeng phawte a siem a, leng in kawtkhak veng sepaih lawiupa te a vawpsak a.

¹¹Leng chu Ho-In a a lut cheng leh a vengte chun a chawi u a, chun a vengte pindan achun a kawih kit zel sek ui.

¹²Chun, LALPA kawma a kikhiekniem tâk ziek chun a sukmangthai loh na ding in a chunga LALPA lungnat na chu a kithiel dawk ta a; chun, Juda gam ale thil chieh dân chuh a pha zing tai.

¹³Khutichun leng Rehoboam chun Jerusalem ah vai a hawm a, a thuneihna chu a kihihdet a. A lal tûngin kum sawmli leh khat a hi a, LALPA’n a mah hona dinga Israel nam chengcheng laka a tel khuo Jerusalem ah kum sawmlesagih vai a hawm a; a nu min chu Naamah, Ammon mi ahi.

¹⁴LALPA hawlna dinga a lunggil a mat loh ziekin thil phalo a hih a.

¹⁵Tichun Rehoboam chanchin chu abul apat a tawpchan in thiemgau Shemaiah zik chanchin bu ah leh thiemgau Iddo zik chanchin bu ah a khangthu chanchin lak a zik a hi a, Rehoboam leh Jeroboam chu a kido zing zing tau hi.

¹⁶Chun, Rehoboam chu a pulepate kawmah a ipmu a, tichun, David khawpi ah vuih ahi a; a thasang in a chapa Abijah in vai a hawm tai.