Read Gangte 2 KHANGTHUBU 14 Bible Online

2 KHANGTHUBU 14 - Gangte bible

2 KHANGTHUBU 14

¹Khutichun leng Abijah chu a thi ta a, David khawpi ah a vui u a, A thasang in a chapa Asa a lal tai. A mah hun in gam chuh kum sawm zet gâlmuong in a um tai.

²Chun, Asa’n LALPA a Pathien mitmuh in thilpha leh thil dik a hih sek a:

³gamdang pathien maichâm te leh milim pathien hona te a sumang a, suong milim te a suchim a, Asher pathien limte a phuk hi.

⁴Chun, Juda mipite chu LALPA a pileputeu Pathien hawl ding leh a dân leh a thupiek haw zawp dingin thu a pie a.

⁵Juda te khuo chengcheng a milim pathien hona um leh milim te le a sukmang ziekin, amah nuoi a gam chu gâlmuong in a um ta a.

⁶Khutichun, Juda gam achun kulh nei khuote a siem a; gam chu gâlmuong in a um a, zie kum chun kuomah do a nei puoi, LALPA’n gâlmuonna a piek ziekin.

⁷Juda mipite kawmah, “Zie khuo haw hi sa dawk phai tiu, kulh in ûm hi ting un, in sangte, kulh kawtkhakte, a kamnate siem hitiu; LALPA I Pathien uh I hawl tak ziekun gam chu ei u khuta um a hi tai; a mah chu I hawl u a, ning tina gâlmuong a umna ei pie ta ahi,” a ti a. Khutichun, a sa phau a, a lamzang zel tau hi.

⁸Chun, Asa chun Juda mi phaw leh tiengcha chawi sepaih nuoi thum a nei a; chun, Benjamin in mi phaw leh thalpi mang mi nuoi nih leh singgiet a nei a, ziehaw chengcheng chuh mihat hangsan ngen ahiu hi.

⁹Tichun, Ethiopia mi Zerah chuh sepaih maktaduoi khat leh kangtalai zathum tawh a mau do dingin a hung kipan dawka; Mareshah tieng a hungtung a.

¹⁰Tichun, Asa chuh a do dingin a kuon dawka, Mereshah a Zephathah guom ah panmun a khawh gel tau a,

¹¹Chun, Asa chu LALPA a Pathien kawmah a paucham a, “LALPA chauh lo chu mi hattak a pata hatlo panpih ding a um puou hi; Aw LALPA ka Pathien uh, ei pan pih in; nangmah muong in na min in zie mipite hi ka hun do uh ahi. Aw LALPA, ka Pathien uh na hi a, mihing in nang hun zawh kinem kiheh,” a ti a.

¹²Khutichun LALPA’n Asa leh Juda te ma achun Ethiopia mite chu a do a; tichun, Ethiopia mite chuh a taise tau hi.

¹³Asa leh a lawite chun Gerar chanin a delh u a; Ethiopia mite chuh a thi a tam beksek ziekun a pang thei ta puou hi, LALPA leh a sepaih te masang achun a guollah tau a; sepaih te chun gâllâk sum tamtak a lau a,

¹⁴Chun, Gerar vela khuo cheng pheng te chuh a susie thei tau a, LALPA chu a lau tau a. Khuo chengcheng chu a buluh u a, gâllâk sum tamtak a lau a.

¹⁵Khutichun, gan chingte puon-In haw le a susieu a, belam leh sangawngsau tamtak a man u a, Jerusalem ah a chieh kit tau hi.