Read Gangte 2 KHANGTHUBU 16 Bible Online

2 KHANGTHUBU 16 - Gangte bible

2 KHANGTHUBU 16

¹Leng Asa lal kum sawmthum leh gup kum in Israel leng Baasha’n Juda te a va do a, Juda gama lut ding leh pawt ding nanna ding in Ramah khuo a siem a.

²Khutichun, Asa’n Ho-In leh leng In a go dangkaguo leh sana te chu a la dawka, Damaska a Suria leng Benhadad kawmah,

³“Ka pa leh na pa kikal a thuthun a um mah bang in, I kal ah thuthun a um a, dangka guo leh sana ka hun thak hi; Israel leng Baasha’n ei taihsan theihna dingin a kawma na kizawppihna kha phel kit in,” ti’n a thak a.

⁴Khutichun, Benhadad in leng Asa thu chu a na zawp a; tichun, Israel khuote chu do dingin sepaih lawiupa te a sawl a; Ijon khuote, Dan khuote, Abelmaim khuote. Naphtali gama thuomphuo kawih na khuo chengcheng te a do tau a.

⁵Baasha’n zie thu chu a na zak phetin Ramah khuo a siem lai chuh a haihsan a, a nasep guot chu a haihsan tai.

⁶Khutichun leng Asa’n Juda mi chengcheng a pui a, Baasha gam a khuo siem na ding a suong leh thing a matte chuh a la vek a, zie chun Geba leh Mizpah khuo a siem ta a.

⁷Zie lai chun, thiemgau Hanani chu Juda lengpa Asa kawmah a chieh a, a kawmah, “LALPA na Pathien muong lo in Suria lengpa na muong a, Suria lengpa sepaih hawn te chu na pawtsak ta a.

⁸Chun, Ethiopia te leh Libia te chu sepaih hawn lientak, kangtalai leh sakawl chung chuong mite tamtak hilo ahiu hi? himahlele LALPA na muon ziek khan na khut a ahun piek ahi kha.

⁹A mah lama lunggil diktak pute chunga a hatna latsak dingin khawvel chengcheng ah LALPA’n a mit a tawl viel viel sek ahi. Ngawlhuoi taka thil a na hih na hi tai; tukhel chu galdo ding nei zing zing ta’n la,” a ti a.

¹⁰Tichun, Asa chu thiemgau pa chunga chun a lungna a, suongkul ah a khum ta a, chun, Asa’n mi khenkhat a sugimthei na lai set a.

¹¹Asa chanchin chu abul apat in a tâwp chan in Juda leh Israel lengte chanchin zikna bu a kizik ahi.

¹²Kum sawmthum leh kuo a lal kum in, Asa chu a keng a hungna ta a; a natna chu a khawk mah mah a; himahlele a natna achun LALPA dawng lo in damdawi thiem te a dawng zaw a.

¹³Chun, Asa chu a pute kawm achun a ipmu ta a, a vaihawm kum sawmli leh khat a lal kum in a thi ta a.

¹⁴David khawpi a amah thân dinga a kisiem suong a geikuok achun a vui tau a, Gimlimte, thau gimlim chi chuom chuom te chu a taksa vuih dinga guonggalhna achun a mang u a, a thihna sun na ding. chun meipi nasa takin a tik u a.