Read Gangte 2 KHANGTHUBU 18 Bible Online

2 KHANGTHUBU 18 - Gangte bible

2 KHANGTHUBU 18

¹Tichun Jehoshaphat chu ahung neizo a a hung lopi mah mah phet chun, Ahab inkawte tawh kichênna a kizawpmatna a siem a.

²Kum bang zah ahim nung in Samari khawpi a Ahab veh dingin a va chieh a. Ahab in amah leh a lawite zahna chun belam leh bâwngchalte tamtak a na thah a, Ramoth-gilead khuo a galdo pih dingin thuzawh hâm a na guo ta a,

³Israel lengpa Ahab chun Juda lengpa Jehoshaphat kawmah, “Ramoth khuo nei hung do pih puoh die maw?” a ti a. Jehoshaphat chun a dâwng a, “Na kisak zawh hun hun a ding chun kei leh ka sepaih te chu kiguo zo sa ka hiu ui, hun kithuohpih ing kau,” a ti a.

⁴“Amahvang chuh LALPA vak dawng phawt hitiu,” a ti kit a.

⁵Khutichun Ahab chun thiemgau zali a sam khawm a, a kawm u ah, “Ramoth khuo do dingin ka va kuon ding um, kuon lo ding?” a ti a. A mau chun, “Va kuon to ah, Pathien in lengpa khut ahi pie ding ahi,” a tiu a.

⁶Himahlele Jehoshaphat in, “LALPA ei vak dawtsak thei ding thiemgau kuo ahim umlo maw?” a ti a.

⁷Ahab chun Jehoshaphat kawmah, “LALPA ei dawtsak ding mi khat chuh a um kha uo; himahleh amah chu vang ka muhdah lam tak ahi; ka chungchâng thu hi a phalam himhim a gen kha puoh a; a sie lam chauh in a gen hi amah chu Imlah chapa Mikaiah ahi,” a ti a. Chun, Jehoshaphat in, “Lengpa’n khutia chu na tihloh ding ahi,” a ti a.

⁸Tichun leng Ahab chun miliente khat a vak sama, “Imlah chapa Mikaiah hun pui vak tie,” a ti a.

⁹Chun, Israel lengpa leh Juda lengpa chuh Samari kulh kawtpi lutna bul huongsung ah a leng puon uh a kivan in a lalchutphah gel u ah a chuu a, chun thiemgau chengcheng in a masang u ah thu a gen u a.

¹⁰A lak u a khat Kenaanah chapa Zedekia chun thik kite a siem a, “LALPA’n hiti hin a tii: ‘Ziehaw hin Suria te mangthai kei hielin si’n la,’ ti’n,” a ti a.

¹¹Khutibang mah chun thiemgau dangte’n le, “Ramoth chu va do in, va lamzang in; LALPA’n zawhna hun pie ding ahi,” ti’n a gen u a.

¹²Zie lai tak chun Mikaiah sam dinga a sawlpau chun, “Thiemgau ten kithuguol in a phalam in thu a gen chiet u a; zieziekchun, nang inle a gen mah bangun a phalam in thu gen mai ah,” ti’n a gen a.

¹³Himahleh Mikaiah chun, “LALPA hinna sâm in ka gen ahi, ka Pathien in a gen bang bang in ahi ka gen ding,” a na ti a.

¹⁴Chun, lengpa kawm a va tun phetin lengpa chun a kawmah, “Mikaiah, Ramoth khuo do dingin ka va kuon dingu, kuon lo ding?” a ti a. “Ama’n va do un, zo ding na hiu hi, LALPA’n zawhna hun pie ding ahi,” a ti a.

¹⁵Himahleh Ahab chun a dâwng a, “LALPA min a ka kawma thu na gen tieng leh, thu diktak gen sek in! zie guola hih ding chun bang zat vei ahim ka hun hilh tâk?” a ti a.

¹⁶Chun, amah chun, “Israel te chu Belam a chingtu neilo bang in tânghaw a kithehzak in ka mu a; LALPA’n, ‘Ziehaw hin lawiupa a nei ta puou a, amau In lam chiet ah lungmuong takin chieh mai u hen,’ a tii,” a ti a.

¹⁷Chun, Ahab chun Jehoshaphat kawmah, “Ka chungchâng thu hi a sie lam tihloh chu a phalam himhim gen puo’n a tih ka hun hilh hilo ahim!” a ti a.

¹⁸Mikaiah chun a gen zawm a, “Tuhin LALPA thugen hi ngaithau in! LALPA chu a lalchutphah a chu a, van mipi chengcheng a sika ding le ka mui.

¹⁹Chun, LALPA chun, ‘Israel lal Ahab hi Ramoth Gilead do dinga va chieh to ding leh va thi dinga kuo a va thêm ding?’ a tih lai chun khatin thuchuom a gen a, midang in thuchuom a gen u a.

²⁰Chun, thagau khat a hung pawt a, LALPA masang ah a dinga ‘Ken va thêm ing ka,’ a ti a. Chun, LALPA chun a kawmah, ‘Bangti’n na va thêm die?’ a ti a.

²¹Chun, thiemgau chun, ‘Chieh ing ka ting, a thiemgaute kam achun thagau lepchieh in va um ing ka ti’n,’” a ti a,

²²“Khutichun LALPA chun zie na thiemgau te kam a hin thagau lepchieh a kawih a; na chungchâng thu LALPA’n sietna na tuok ding thu a gen tai,” a ti a.

²³Ziephet chun Zedekiah chun a va naih a, Makaiah mai ava benga, “Na kawma thu gen dingin LALPA thagau in khawilam ah ahim ei pawtsan?” a ti a.

²⁴Mikaiah chun, “Pindan sunggil a kisil dinga na lut ni’n hun henla,” a ti a.

²⁵Khutichun Israel lengpa chun, “Mikaiah hi man unla, khaw sung vaihawm Amon leh leng chapa Joash kawmah leh puihkit un;

²⁶Chun, ‘Lengpa’n hiti hin a tii, zie pa hi suongkul ah khum unla, lungmuong taka ka hungkit ma cheng gimtheihna an leh gimtheihna tui a na pieu in, a tii,’ ti’n,” a ti a.

²⁷Mikaiah chun, “Lungmuong taka na hung vaihkit chun kei ei mang in LALPA’n thu a gen lo hi’n a,” a ti a. Mikaiah mah in, “Nang haw mipi te chengcheng inle ka thugen hi a na ngaithau in,” a ti a.

²⁸Chun, leng Ahab leh Juda lengpa Jehoshaphat chu Ramoth-gilead khawpi do ding chun a va kuon to u a.

²⁹Ahab chun Jehoshaphat kawmah, “Kisiem zatchuom ing ka ting, kido na a chun le chieh ka ting, nang vang na lal puon silh in,” a ti a. Khutichun Israel lengpa chu a kisiem zatchuom a kido na ah a va chieh a.

³⁰Chun, Suria leng in a kangtalaite chunga lawiupate kawm achun, “Israel lengpa tihloh chu mi neu le milien le do kiu in,” ti’n thu a pie a.

³¹Chun, hiti hi a hung hi a, kangtalai chunga lawiupate chun Jehoshaphat a muh un, Israel lengpa a hi khu, a tiu a, do guo’n a um tau a; himahleh, Jehoshaphat chu a kiko a, chun, LALPA’n a panpih ta a, amah chu a nutsieh sak tai.

³²Chun, kangtalai tawl lawiupa te’n Israel lengpa a hi puoi tih a het phet un delhzui lo in a vaihkit san tau hi.

³³Tichun, Suria sepaih te khat in tup chuom nei diek lo in a thal a vak kap leh, Israel lengpa chu a awmphaw kisuktuohna kikal tak a kap kha a; tichun, a kangtalai tawlpa kawm achun, “Sepaih lak apat hin tawl dawk inla, lehtawl inla ei chiehdawk pih ah, liem natak ka tuok hi,” a ti a.

³⁴Kidona a chuh a huoisie mah mah a, himahleh, Israel leng Ahab chu Suria te lam nga’n a kangtalai ah nitâk lam chan in a ding a, chun, ni tum ding kuon in a thi tai.