Read Gangte 2 KHANGTHUBU 19 Bible Online

2 KHANGTHUBU 19 - Gangte bible

2 KHANGTHUBU 19

¹Tichun, Juda lengpa Jehoshaphat chu bit takin Jerusalem ah a In ah a chieh kit ta a.

²Thiemgau Hanani chapa Jehu’n a na muok a, leng Jehoshaphat kawmah, “Migilo chu panpih a, LALPA hawte chu hehpih ding na hi maw? Zieziek hin LALPA lungnatna na chunga hung um a hi tai.

³Himahleh zie gam apat hin Asher pathien na lamang a, LALPA na hawl ziekin phatna lam bang ahim na nei na lai hi,” a ti a.

⁴Chun, Jehoshaphat chu Jerusalem ah um mahleh, Beer-sheba apat a Ephraim gam chan in LALPA a pileputeu Pathien lam ah mipite pui ding in a chieh viel a.

⁵Tichun, Juda gama kulh neite khuo haw chengcheng achun vaihawmte a kawih a,

⁶Chun, vaihawmte kawm achun, “Na thilhih u chu guntaka ngaihtuoh in hih u, mihing dinga vaihawm na hi puou a, LALPA ding ahi zaw ngâl a; vaihawmna ah na kawm u ah a tel zel hi.

⁷Zieziekchun LALPA kihchau inla, chingthei takin hih u; LALPA I Pathien u achun manlohna leh khenchuom neihna leh gawlhguk thil lak te umlo ahi,” a ti a.

⁸Zielo chun le, Jehoshaphat in Jerusalem a ahung vaihkit nung in Levi te lak apat leh thiempute lak apat, chun Israel inkuonte laka alienpente apat in LALPA dân bawhsiete vaihawm ding leh thu buoite lem dingin a kawih a.

⁹“LALPA kihcha kawmin ginum takin, lunggil diktak pu’n na hih ding uh ahi.

¹⁰Khawitak khuo a mi’n le thubuoi a hun gen u a, thisan suoh thu ah, dân leh thupiek thu ah, thuguot leh vaihawm thu haw a a hung kilân u chun, LALPA chunga thil a sukkhelh loh na ding un chingthei dingin hilh un, nangmau haw leh na suohpih teu chungah lungnatna hung tung khawm khan a; khutibanga chuh na hih u chun, thiemloh chang puo’n lau.

¹¹Chun, ngaiun, LALPA lam thu taphawt achun thiempu lalpen Amaria chu na lawiupau ahi a; chun, gamsung vaihawmna lam thu cheng achun Judate inkuon chunga vaihawm Ishmael chapa Zebadiah a hi: Levi te le na lawiupau ahiu ui ti’n. Hangtak in hih unla, LALPA’n miphate umpih ding ahi,” ti’n thu a pie a.