Read Gangte 2 KHANGTHUBU 20 Bible Online

2 KHANGTHUBU 20 - Gangte bible

2 KHANGTHUBU 20

¹Chun zie nung chun hiti hi ahi a, Moab suonte leh Amon suonte chu Meun te khenkhat tawh Jehoshaphat do dingin a hung kuon u a.

²Chun, thangko khat a hung a leng Jehoshaphat kawmah, “Sepaih tamtak mai Tuipi Thi gâl apat in nang hun do dingin a hung ui. Hazazon Tamar a la vek tau ui” ti’n a hung hilh u a, (zie min dang chu En-gedi a hi)

³Chun, Jehoshaphat a lau a, LALPA puihna ngên in a paucham ta a. Juda gam chengcheng ah an ngawlh ding thu a phuong viel a.

⁴Juda khawpi cheng apat chun mipite chu Jerusalem ah LALPA ma puih na ngên ding in a tai khawm u a,

⁵Ziete chuleh Jerusalem a mite chu Ho-In huongsung thak sung achun a kikhawm u a. Leng Jehoshaphat chu a va chieh a, a masang u a chun a va ding a,

⁶ngeih tak in a paucham a, “Aw LALPA, ei suonteu Pathien, van a pata, khawvel a nam chengcheng te chunga vaihawm na hi a. Thilhihthei tak leh hattak na hi a, kuoma’n a hun do zo puou hi.

⁷Na mi Israel te zie gam ahi a chieh lai un, zie gama na cheng namte hi na nawhdawk a, a gam u hi na guolpa Abraham suonte kawmah a kumkhuo luoh ding un na pie ta a.

⁸Zie hin a na cheng tau a, nang a dingin Ho-In a sau a, amau haw gawtna ding a,

⁹thil phalo ahung tun a, gâl ahim, hipi ahim, kiel ahim a tun a, Nang hona mun Ho-In maia a hung khawm theih na dingun tih a het ziekun. A buoi nau a a hung paucham u a, Nangin ngaitha a na hukdawk theihna ding in.

¹⁰“Tuhin, Ammon suonte Moab te leh Edom ten ei do tau a, Israel te Aigupta gam apat a a hung pawt lai u a, a do uh na phal puoh a, amau a vaihkit san zawu a, amau a sumangthai puou hi;

¹¹Entie, ka neihlelam u leh ka gam uh susie ding a a hung kipat dân u hi, zie gam hi kei uh nei piek ngêi kha ahi ngâla.

¹²Aw ka, Pathien uh, a chung u a vaihawm lo ding na him? Mi zie zat zat ei do dinga hung kuonte chuh a na do thei ding hâwi ka hi puoh ngâl u a; a lawhngaihna himhim le ka he puou hi, Nang lam hung nga zaw mai ka hiu hi,” a ti a.

¹³Juda te chengcheng chu a cha neucha chateu, a zi teu, a chateu tawh Ho-In masang ah a ding u a.

¹⁴Khutichun, Zekaria chapa Jahaziel chungah LALPA thagau a hungtung a, amah chuh Benaiah chapa ahi a, amah chu Zeiel chapa ahi a, amah chu Mattaniah chapa ahi a, Asaph chate laka Levi chi ahi a, mipi kikhawmte lak achun LALPA Thagau chuh a hung tung ta a.

¹⁵Jahaziel, in, “Nang haw Juda gama mi chengcheng leh Jerusalem a um chengcheng te leh nang lengpa Jehoshaphat, a na ngaithau in; LALPA’n na kawm u ah hiti hin a tii, Lau kiu inla, zie mipi nasatak te ziek chun lungthuoi diek kiu in; kido na chu nang haw kido na a hi puoh a, Pathien kido na a hi zaw ngâl a.

¹⁶Zing leh va do un; Ziz zawt tohna ah a hung to u a, Jeruel gamthip mun guom tawp lam ah va mu’n lau.

¹⁷Zie kido na hi na do uh ngai puo’n a: pan mun khawh unla, ngak mai un, nang u lam a pang LALPA hukdam na chu en zing mai u, Juda mite leh Jerusalem mite: lau kiu inla, lung le lungthuoi diek kiu in, zing leh do ding inkuon dawk un, LALPA chu nang haw lam ah a pang ngâl a,” a ti a.

¹⁸Khutichun Jehoshaphat chu a mai a lei si’n a khun a; chun, Juda mite chengcheng leh Jerusalem mite chengcheng chu LALPA aho u a, LALPA masang ah a khun u a.

¹⁹Kohath suon leh Korah suon Levi te chuh aw ngeihtak a LALPA Israel te Pathien pakcha’n a ding u a.

²⁰A zingkal kit matak chun, mipite chu Tekeo gammâng achun a chieh u a. A kipatdawk lai u chun, Jehoshaphat chun zie thu hin a na hopih a; “Juda leh Jerusalem a mite haw, LALPA na Pathien uh chung a chun na ginnau ngau inla, dettak in dingun. A thiemgau in a hun hilh chu gingchau inla, lawhting ding na hiu ui,” tin.

²¹Chun, mipite tawh a kiho zawh un, amah chun sepaihte ma a chiehkhawma, Thiengtho kilawmna pakcha ding leh, LALPA chuh pakchau un, a zahngaihna chu kumkhuo’n um ding ahi ngâla, ti a lasa ding leh LALPA min pakcha dingin lasa thiemte a guot a.

²²Chun, la a hun pan u a, pahchakna la a sak phet u chun, Amon suonte, Moab suonte leh Seir tânga mite, Juda te do dinga hung kipante chuh a lambut dingin LALPA’n ana kawih a, tichun, a that chimit tau hi.

²³Ammon te leh Moab sepaih te chun Seir tânga cheng te chu a do u a, nasa takin a that u a, a suchimit vek tau a, Seir tânga mite a thah zawh phet u chun, amau leh amau kisumang dingin a kisuol tau hi.

²⁴Tichun, Judate chu thalek a gâlven insang a tun phet u chun, a melmateu lam chu a vak en u a, chun, ngaitie, mithi luong chuh tuol achun a chap zieng a, khatchale a suok cha a um puou hi.

²⁵Tichun, Jehoshaphat leh a lawite chu gâllâk sum la ding in a va chieh u a, alak u achun sumlepaite, silhlechen te, suongmantamte, tamtak a muu a, a puok zawh loh khawp un a lau a. A tam bêk a, ni thum hiel gâllâk sum chu a thak ui.

²⁶Tichun a ni li ni chun Berakah lui phai ah a kikhawm u a, zie tak a chun a thilhihte ziek chun LALPA a pakchau a; zieziekchun zie mun min ding chun Berakah tih a hi tai.

²⁷Tichun, Juda leh Jerusalem a mite chuh Jehoshaphat in ma a pui a, Jerusalem ah a chieh kit tau hi, LALPA’n a melmateu chunga kipâk dinga a siem tâk ziekin.

²⁸Khawpi a tun phet u chun, tumgitte, pengkun te leh kingkang te tawh Ho-In achun a kizawt lut tau a.

²⁹LALPA’n Israel chate melma te chunga a thilhih a het phet un zie gamsung a mite chun Pathien a lau tau hi.

³⁰Khutichun Jehoshaphat chun muong tak in vai a hawm a, ning tin achun Pathien in bitna a pie a.

³¹Chun, Jehoshaphat chu kum sawmthum leh nga ahih in Juda te chung ah a lal pan a, Jerusalem ah kum sawmnih leh nga vai a hawm hi. A nu chu Shilhi chanu Azubah ahi.

³²Chun, amah chun LALPA mitmuh in thilpha a hih a, a pa Asa lampi a zuia, a nusieh ngei puoi.

³³himahleh, milim pathien hona munte chu suksiet ahi diek puoi. Mipite chu a pileputeu Pathien hona lam achun a lungthim pumpiu in a kihei diek puou hi.

³⁴Chun, Jehoshaphat thilhih chengcheng te chu abul a pata a tawpchan in Hanani chapa Jehu chanchin zikna ah a kizik a, zie chuh Israel lengte chanchin bu ah a kizik hi.

³⁵Zie nung chun, Juda leng Jehoshaphat chun, thil gilo nasa taka hih sek pa, Israel leng Ahaziah chu a kizawp pih a.

³⁶Tichun, Tarshis lama chieh ding lawng siem in a kizawppih a, chun, amau chun Ezion-geber achun lawngte chuh a siem u a.

³⁷Himahleh, Mareshah khawpi a um, Dodavah chapa Eliezer in Jehoshaphat chu a gaih hilh a, “Ahazia tawh kizawpna na siem ziekin, na thilhihte chu LALPA’n susie vek ding ahi,” ti’n. Tichun lawng chengcheng chu a sie vek ta a, Tarshis ah a chieh thei ta puou hi.