Read Gangte 2 KHANGTHUBU 23 Bible Online

2 KHANGTHUBU 23 - Gangte bible

2 KHANGTHUBU 23

¹Thiempu Jehoiada chun kum gup a ngak nung in, thilhih ding chun thupukna a siem ta a. Sepaih lawiupate mi nga: Jehoram chapa Azaria te, Jehohanan chapa Ishmael te, Obed chapa Azaria te, Adaiah chapa Maaseiah te leh Zikri chapa Elisaphat te tawh thutiem a bawl u a.

²Juda gam khawpi haw achun a chieh viel u a, Levi te leh a behteu cheng chu Jerusalem ah a puikit vek u a.

³Ho-In ah a chieh khawm u a, tak achun leng chapa Joash chu tawh thugawlh a siem tau a. Jehoiada chun a kawm u ah, “Leng a na thi ta pa chapa chu ziehi a hi a! LALPA’n leng David kawm a a suonteu chu leng a um ding ahiu a na tih bang khan tuhin leng a a pan ding ahi.

⁴Na hih ding u chu hiti bang hi a hi: Thiempu te leh Levi te chawlhni a a hung tieng u leh, mun thuma khen a mun khat vengpawl hi’n na tin uh;

⁵chun, mun thuma khena mun khat chu leng In ah um un na tin uh; chun, mun thuma khen a mun khat chu kulh kawtkhak ah; chun, mipi chengcheng chuh Ho-In huong sung ah um un au.

⁶Himahleh thiempu te leh nasemte Levi te ngâllo kuomah Ho-In sunga lut kiu hen; a mau chu a thientho ziekun lut untin, mipi chengcheng chu vang LALPA thupiek ngaka a um ding uh ahi.

⁷Chun, Levi te chun a gâlvan uh chawiin, leng chiehna cheng ah zui untin, chun, kuole Ho-In a hung lut guo chu thah ding ahi a; chun, leng chuh a lut leh a pawt inle na ven zing dinguh ahi,” a ti a.

⁸Levi te leh Juda mipi te chun Jehoiada thupiek bang chun a hih u a, chawlhni a mi veng dingte a pawtdawk tieng u leh mipite chu a kikhenzak sak puou ui, khutichun lawiupa pên chu a veng a pang ding leh a chiehdawk ding te a muh zel theihna ding in.

⁹Jehoiada chun Sepaih za lawiupa te chuh Ho-In a um lengpa David tiengcha leh phaw neu leh phaw lien te chu a pie a.

¹⁰Mite chu chemzâm zuk dawksa chawi chiet in, Ho-In kimvel achun leng veng ding chun a kawih a.

¹¹Tichun, amau chun leng chapa chu a hun puidawk u a, lallukhuk a khuksak u a, lengte vaihawm dân bu chu a pieu a, khutichun, leng in a siem u a, tichun, thiempu Jehoiada leh a chate chun sathau a nuh u a, mi chengcheng chu a kiko u a, “Pathien in leng chu humbit hen” a tiu a.

¹²Athalia chun mipi leng pakcha a husa chu a zak phet chun, Ho-In a mi kikhawmte lak achun a va chieh a.

¹³Zie taka Ho-In lutna a leng khuom, lengte a dinga siem bula leng ding leh a kimvel a sepaih lien leh pengkun mûtte ding chu a mu ta a, mipi chengcheng chu kipâk a kiko in, pengkun mût in, Ho-In a lasa te chun a matchâk teu chawiin, ma a pui u a. Amahnu chun a puon a bawtthêk a, lungkham a kiko in, “Phielgukna, phielgukna,” a ti a.

¹⁴Jehoiada chun Athalia chu Ho-In huongsung a thah chu a nuom puoh a, Khutichun sepaih miliente chu a sama a kawm u ah, “Sepaih nih in laihtat in puidawk unla, kuole amahnu hung hukdawk guo taphawt chu that un,” a ti a.

¹⁵Tichun a man u a leng in a chun a pui u a, zie tak a sakawl kawtkhak kiti mun achun a that tau a.

¹⁶Thiempu Jehoiada chun leng Joash leh mipite chu LALPA mipi te hi dinga thugawlh siemna a pang dingin a sam khawm ta a

¹⁷Mipi chengcheng Baal in ah a chieh u a, a susieu a, Maichâm te, a lim te a sugawp dimdem u a, Baal thiempu Matan chu Maichâm ma ah a that tau a.

¹⁸Jehoiada chun thiempu te leh Levi te chu Ho-In nasepna a mawhpuo ding chun a kawih ta a. A mau haw chu leng David in sep ding a piek te sem dawk ding leh, Mosi dân bu a zik guola, LALPA kawma kithawihnate hâl ding ahiu ui. Thil githeite leh thil lawpna te chunga mawhpuo le ahiu ui.

¹⁹Jehoiada chun sakhuo dana thienglo te a lut loh na ding in Ho-In kawtkhak vengte le a kawih a.

²⁰Sepaih liente, khawpi upate, miliente, mi pawimawhte, leh mipi vantâng cheng chu kizawt in Jehoiada chu a zui u a, leng chu Ho-In apat chun leng in ah a pui tau a. Kawtkhakpi pên ah a lut u a, tichun leng chun a mun ding lalchutphah chu a luoh ta a.

²¹Mipi te chengcheng chu kipakna’n a dim u a, Athalia chuh chemzâma thah ahih tâk ziekin khawpi chu gâlmuong takin a um tai.