Read Gangte 2 KHANGTHUBU 25 Bible Online

2 KHANGTHUBU 25 - Gangte bible

2 KHANGTHUBU 25

¹Amaziah chu kum sawmnih lenga ahih in leng a hung hi a, Jerusalem ah kum sawmnih leh kuo vai a hawm a; a nu min chu Jehoadan, Jerusalem mi ahi.

²Chun, LALPA mitmuh in thilpha ahih a, himahleh a lungthim a pie bukim puoi.

³Chun, tihi ahi a, thuneihna a hun tûk det phet chun a pa na thatte, milien cheng chu a that ta a.

⁴Himahleh a chateu chu a that puoh a, Mosi dân a kizik, “Chate ziekin pate a thih ding uh a hi puoh a, pate ziekin chate le a thih ding uh a hi diek puoi, mitin amah gitloh ziekin a thih dinguh ahi,” ti a LALPA’n thu a piek bang khan a hih a.

⁵Ziehaw bana achun, leng Amazia’n Juda te a samkhawm a, Juda leh Benjamin mi chengcheng, a inkuon uh bang zelin sang chunga lawiupate, za chunga lawiupate haw a siem a: chun, kum sawmnih apat achunglam cheng, tiengcha leh phaw mang thei, galdo thei teldawk mi nuoithum a ting u a.

⁶Israel gam apat mihat hangsan nuoi khat dangka talent zakhat in a guoi na lai a.

⁷Himahleh thiemgau khat leng kawm achun a va chieh a, a kawmah, “Zie Israel sepaihte chengcheng hi na kawmah pui ki’n. Israel te lak ahin (Ephraim suonte cheng huom in) LALPA umlo ei ve!

⁸Kido na achun hat lawh dingin na kigingcha maithei a, himahleh Pathien chun zawhna leh lahna piek theihna nei hi zaw a, na melma te chu hun zawhsak tei tei ding ahi,” a ti a.

⁹Chun, Amazia chun thiemgaupa kawm achun, “A leh dangkaguo talent zakhat ka piek sa cheng chu bang lawh ding ka hi?” a ti a. Chun, thiemgaupa chun, “Zie sanga tamzaw chu a hun pie thei hi,” a ti a.

¹⁰Khutichun Amazia chun Ephraim gam a pata sepaih hungte chu vaikit dingin a sawl ta a; zieziekchun Juda te chungah lungna mah mah pum in a chieh kit tau hi.

¹¹Amazia chun a hansan na te suoh in, a sepaih te chu Chi Luiphai ah a pui ta a, zie tak achun a va do u a, Seir suonte singkhat a that u a,

¹²singkhat dang chu a hing mat u a. A hingmatteu chu Sela khawpi a suongkho sip sang tak ah a pui u a, a sawnthau a, tichun a nuoia suong chung achun a thi tau a.

¹³Himahleh, Amazia’n galkap dinga phal loh, sepaih a sawl kit te chun Juda gam khuo te, Samari a pata Beth-horon chanin a na do u a, mi sangthum a that u a, gâllâk sum tamtak a lau a.

¹⁴Amaziah chu Edom te zo a chieh kit phetin a milim pathien teu a hun puoh a, a pathien dingin a kawih a, a ho ta a, gimlim te le a hâl sak chiet hi.

¹⁵Zieziekchun Amaziah chungah LALPA a lungna ta a, a kawmah thiemgau a sawl a, zie pa chun a kawmah, “Na khut apat a mite le hukdawk theilo nam pathien te chu bang dinga ho na hi?” a ti a.

¹⁶A kawma thu a gen zing lai chun, Amaziah chun, “Lengpa vaihawm sak dingin ka hun siem u a ahim? Thip mai in; a hihloh leh hun that ding ka him?” a ti a. Tichun thiemgau chun, “Pathien in hiti bang a hi na hih ziek in leh ka lemguot na ngaihthak loh ziekin hun sukmangthai ding a ngaihtuoh hi tih ka hêi,” a ti a, a thip ta a.

¹⁷Juda leng Amazia leh a lemguot sak pa chun Israel te a phielgu tau a. Khutichun Israel leng Jehoash, Jehoahaz chapa Jehu tupapa kawm achun mi a sawl a, kido dingin a cho ta a.

¹⁸Israel lengpa Jehoash chun. Juda lengpa Amaziah kawmah, “Lebanon tânga lingbuk in Lebanon tâng sidar thing kawmah, ‘Na chanu ka chapa zi’n neihsak ah’ ti’n a thuthâk a; chun, Lebanon tânga gamsa a hung a, ling chu a hun tawh pêk zieng tai.

¹⁹Nang hin, ‘Ngaitie, Edom ka zo hi,’ na ti ngut a, na lunggil in na kisathei a, na In ah um hiet hiet mai ah, Nang leh Juda gam pumpi a sietna, nang a dinga khawk ding bang a ti a hihdawk ding na hi?” ti’n mi a sawl a,

²⁰Himahlele Amaziah chun a na ngaitha nuom puoh a; Edom te pathien te a ho zieka Juda gama a melmateu khuta a piek theihna dinga Pathien hih ahi.

²¹Khutichun Israel lengpa Jehoash chu a va chieh to a; Juda lengpa Amaziah tawh Juda gam Beth-shemesh kawmah kimaituoh in a kido ta ngêi u a.

²²Juda sepaihte chu zawhin a um tau a, mitin a mau in lam chietah a tai tau hi.

²³Israel lengpa Jehoash chun Juda lengpa Amaziah chu Beth-shemesh achun a man a, Jerusalem ah a pui a, Jerusalem kulh chu Ephraim kulh kawtkhak a pata kulh ning kawtkhak chan in tawng zali hiel a suchim a.

²⁴Chun, Ho-In leh leng In a go kawihkhawmna a, sana leh dangkaguo um chengcheng a la a, Obed Edom suonte venna mun a cheng chu a lau a, Samari khuo ah a kileh kit ta a.

²⁵Juda leng Joash chapa Amaziah chu Israel lengpa Jehoahaz chapa Jehoash thih nung in kum sawmlenga a dam na lai hi.

²⁶Tichun Amaziah thilhih dangte chu abul a pata a tawpchan in, Juda lengte leh Israel lengte vaihawm lai thu zikna bu ah a kizik vek hi.

²⁷Khutichun Amaziah chu LALPA zuih a haihsan nung in Jerusalem ah a phiel u a, Lakish khuo ah a tai a; Himahleh Lakish khuo a chun mi a delhsak u a, zie tak achun a that tau hi.

²⁸A luong chu sakawl in a puou a a pilepute kawmah Juda khawpi ah a vui tau hi.