Read Gangte 2 KHANGTHUBU 26 Bible Online

2 KHANGTHUBU 26 - Gangte bible

2 KHANGTHUBU 26

¹Chun, Juda mipi te cheng chun Amaziah chapa kum sawmlegup a upa Uzziah chu a pa thasang in leng dingin a siem tau a.

²(Amaziah thih nung chun ahi, Uzziah chun Elath khuo a laka, khawpia a siem phat kit chuh.)

³Uzziah a lal pat tûngin kum sawmlegup mi a hi a. Jerusalem ah kum sawmnga lehnih vai a hawm hi. A nu min chu Jekoliah Jerusalem mi a hi.

⁴A pa Amaziah thilhih bang taphawt hih in LALPA mitmuh in thilpha a hih seka.

⁵Pathien kilâkna hethiem Zekaria damsung in LALPA na ginum takin a sem a, Pathien in vang a sak zel hi.

⁶Chun, Uzziah chu Philistia te do dingin a kuon dawka, Guth kulh te, Jabneh kulh te, Ashdod kulh te a suchim a; chun, Ashdod naih leh Philistia te lak ah, khawpi a siem a.

⁷Pathien in Philistia te apat leh Gur-baal a um Arabia mite leh Meun te zo dingin a panpih hi.

⁸Ammonte’n Uzziah kawmah sieh a pie sek u a; tichun, a hung hât mah mah tâk ziekin Aigupta gam chanin a minthanna a hung zak tai.

⁹Uzziah chun Jerusalem ah Ningkawi kawt leh Guom kawt leh kulh kawina kawt haw ah insang a sa a, kulh in a um a.

¹⁰Gam awnghaw achun le venna In a sa a, tuikhuk te a lai a, tum lampanga tângbul te leh phaizawl achun gancha tampi a nei a. Lo neih lama lunglut ziekin mipi te chu tâng gama grep te chîng ding leh lei phatna te chu lo a bawl dingin a tîl a.

¹¹Uzziah in galdo mi leng sepaih lawiupa Hanania nuoi ah, lehkhazik mi Jeiel leh lawiupa Maaseiah te’n a guot bang bangun a pawl pawl a galkap mi le a nei hi.

¹²Mihat hangsan chiet, a inkuon upa te chengcheng chu sangnih leh zagup ahiu a.

¹³Amau nuoi achun sepaih sin thiem sa chiet nuoi thum leh sangsagih leh zanga, melma a pata leng panpih ding gâl bawl mi ngen cha a um ui.

¹⁴Uzziah chun sepaih chengcheng a ding in phaw te, tiengcha te, thik lukhuk te, thik puonâk te, thalpi te, vaisuongseh a dingin suongte a pie a.

¹⁵Jerusalem ah insang leh kulh ning cheng a chun a kapna ding thal leh a sehna ding suong lien tak tak, miching te hetdawk khawl te a siem a. A min chu gamtin muntin ah a thang ta a; a hung hât mah mah ta a Pathien apat a panpihna a muh ziekin.

¹⁶Himahleh leng Uzziah chu a hung hât phet chun a hung chapo ta a. zie chun puksietna ah a pui ta a. LALPA a Pathien musit in Ho-In a maichâm achun gimlim hâl dingin a chieh ta a.

¹⁷Himahleh, Thiempu Azaria chu mihat leh thiempu hangsan tak sawmgiet tawh kitawn in, leng khap guon a zui tau a.

¹⁸A kawm achun, “Uzziah; LALPA kawma gimlim hâlna dingin thuneihna na nei puoi. Aron suona thiempu te chauh chu zie hih ding a chu kawihchuom ahiu ui. Zie munthiengtho hi pawtsan vak in, LALPA Pathien na dodal a, a vangsakna le changlo na hi tai,” a tiu a.

¹⁹Uzziah chu Ho-In a gimlim hâlna maichâm kieng achun, gimlim hâlna ding chawi in a ding a. Thiempu te chung achun a lungna ta mah mah a, thakhat in a chalpâng chu phâk in a hun bawm ta a.

²⁰Azaria leh thiempu dangte chun leng chalpâng chu a en u a, tichun Ho-In chu kintaka pawtsan dingin a nawh tau a. LALPA’n a gawt tâk ziek chun, kintakin a pawtdawk ta a.

²¹Leng Uzziah chu a thih ni tiengin a phâk ta a, phâk ziekin In chuom ah a um sak u a. Ho-In apat nawhdawk in a um a, a chapa Jotham chu a gam a mite vaihawm sak in leng In enkawl in a um tai.

²²Chun, Leng Uzziah vaihawm lai a a thilhih cheng, abul apat a tâwp tiengin Amoz chapa thiemgau Isai in a zik hi.

²³Uzziah chu a thi a, lengte kivuihna mun ah a vui u a, himahleh a phâk ziekin lengte thân ah a vui puou hi. A chapa Jotham chu a thasang in leng in a pang tai.