Read Gangte 2 KHANGTHUBU 3 Bible Online

2 KHANGTHUBU 3 - Gangte bible

2 KHANGTHUBU 3

¹Khutichun, Solomon in LALPA In ding chuh Jerusalem ah, Moriah tânga, a pa David kawma LALPA kilâkna, Jebus mi Ornan buhphuol, David na guonggalh na achun a sa pan ta a.

²Tichun, a leng hihna kum li na, tha nihna, ni nih ni’n a sa pan a.

³Ho-In sak dân ding Solomon in a guonggalh dân chu hitibang hi ahi. A dunglam chu tawng teh dân ngeina’n tawng sawmgup a hi a, a vailam tawng sawmnih ahi.

⁴A malam hulliep dunglam chu in vailam chan mah tawng sawmnih a hi a, a sânlam chu za leh sawmnih a hi a; a sung chu sana thieng in a luon khum a.

⁵Pindan lienzaw bang achun châk thing a belh a, zie chuh sana thieng in a luonkhum a, zie tak a chun tum thing leh thikkuol kikuoituoh lim a chuon sak a.

⁶Leng chun Ho-In chu suongmantam in a zem a; sana chu Parvaim gam apat a lak ahi.

⁷Ho-In kalvaite, bângte, a tuongte, kawtkhakte, chu sana’n a luonkhum a; bang haw achun cherub limte a chuon sak hi.

⁸Mun thiengtho pên chu, a dunglam chu in vailam chan mah, tawng sawmnih a hi a, a vailam chu tawng sawmnih a hi a, sana thiengkei in, a luonkhum a talent zagup a ting hi.

⁹A kilhna gikdan chu sana sekel sawmnga ahi. A indan chung nung haw chu sana’n a luonkhum hi.

¹⁰Chun, a In thiengtho pên a chun Cherub lim nih siem ding thu a pie a, ziehaw chu sana’n a luonkhum a.

¹¹Cherub thate chun tawng sawmnih a luoh u a, cherub khat tha tawng nga a hi a, banga va tung a; chun, a tha langkhat chu le tawng nga mah a hi a, cherub khat tha chu a va sukha a.

¹²Cherub khat tha chu le tawng nga a hi a, cherub khat tha chu a va sukhai.

¹³Zie cherub te chun tawng sawmnih luoh in a thau a zak u a, a ding u a, insung lam nga’n a ding ui.

¹⁴Munthiengpen a puon zak ding a dumbuong te, a sandup te, a sandâng te, pat ngat tak ten a siem a, zie tak achun cherub limte a chuon sak hi.

¹⁵Chun, leng chun Ho-In mai lam achun sumeng khuom nih tawng sawmthum leh nga a sang a phut a, zie sip chu tawng nga gêl gêl ahi.

¹⁶A sip a chun thikkuol kikuoituoh a siem a, bân sip haw chu a zem a; chun, vaimimthei zakhat a siem a, thikkuol kikuoituoh achun a khâi a.

¹⁷Chun, Ho-In malam a chun khuom haw chu a phut a, changlam ah khat, veilam ah khat, chun, changlam a chu Jakin a sa a, veilam a chu Boaz a sai.