Read Gangte 2 KHANGTHUBU 30 Bible Online

2 KHANGTHUBU 30 - Gangte bible

2 KHANGTHUBU 30

¹Mipite chun, thiempute kisuthiengtho atawm ziek u leh Jerusalem a mi a kikhawpkhawm tam nailoh ziekun a tha khatna a chun ahun takin Chiehkân kut a mang thei ta puou hi.

²Khutichun leng Hezekia leh a miliente leh Jerusalem a mipite chun tha nihna a mat ding chu lem a sa tau a, tichun leng in Juda leh Israel mipite kawm achun thu a than viel ta a.

³LALPA Israel te Pathien limbawlna a, Chiehkân Kut mang ding leh, Jerusalem khuo a Ho-In a hung dingin Ephraim leh Manasseh namte chiel na ding chun chingthei takin lehkha a thak a.

⁴Leng leh mipite chun a thiltup u chu dik a sau a,

⁵tichun Israel te chengcheng mâllam pang a Dan a kipat simlam pang a Bersheba tiengin Jerusalem a hung khawm a dân dungzui taka, maa sanga tamzaw a Chiehkân kut mang dingin a chiel tau a, zie tawbang chuh hun sawttak bawllo a um ahi tau hi.

⁶Khutichun, lehkha taihpih vielte chun leng leh a miliente lehkha chawi in Israel leh Juda gam achun leng thupiek in a pawtdawk u a, “Nang haw Israel mite haw, Asuria ten na gam uh a lak nau apat in na suokcha tau a. Tuhin LALPA, Abraham te, Isak te, Jakob te Pathien kawmah hungkit un, tichun a mah chu nang haw lam ah hung kihei kit in a.

⁷Nang haw vang, na pileputeu leh na suohpihteu, LALPA a Pathien ding u a ginumlo te bangin um kiu in.

⁸A gen hak bangun um kiu inla, LALPA thu hi zawp un, LALPA na Pathien un a sukthienthona, Jerusalem a Ho-In ah hung unla, Amah chu ho unla, tichun na chung u a a lungnat na hi hai ina.

⁹LALPA lam na hung ngat kit u chun; na suohpihteu leh na chateu sala mante chun lungsiet untin, zie gam ahin hungkit sak ding ahiu hi: LALPA na Pathien u chu mi lungsiet thei tak leh zahngai thei tak ahi ngâl a, amah lam na ngat phawt u chun hun na lungsiet ngêi ngêi ina” ti’n a va chiel u a.

¹⁰Khutichun lehkha taihpih mite chu khaw chengah Ephraim leh Manasseh gam chengcheng ah mâllam a Zebulun chanin a chieh u a: himahlele a mau chun chiemnuih bawlna a mang in a na simmawh u a.

¹¹Himahleh Aser te leh Manasseh te leh Zebulun te tamtak chu a na kingainiem u a, Jerusalem ah a chieh u a.

¹²Juda gam te vang chuh LALPA thu a lengpa leh milien haw thupiek chu zawp dingin Pathien in lunggil kibang a put sak a.

¹³Tichun tha nihna achun, chângthâk chawl sawhloh kut nei ding in mi tamtak Jerusalem ah a hung khawm u a.

¹⁴Khutichun a kipan u a, Jerusalem a maichâm te chu a lau a, chun, gimlim hâlna maichâm te le a lau a, Kidron lui ah a paih tau a.

¹⁵Tichun, tha nihna, ni sawm leh ni li ni chun Chiehkân kut gancha chu a that u a. Zielai chun Thiempute leh Levi chite chuh a zak cha u a hiel, tichun, amau chuh a hung kilân thak u a, tichun Ho-In a hâlmang kithawihna chu a lân thei tau hi.

¹⁶Pathien mi Mosi dân bu a thuhilhna bang chun Ho-In achun a mun chiet uh a luoh u a. Levi te chun thisan chu thiempu te kawmah a pieu a, amau chun maichâm achun a theh kit u a.

¹⁷Mipite lak a chu sakhuo dana thienglo tamtak a um ziekun, chiehkân kut belamno chu a that thei puou a, tichun Levi te chun amau haw ding chu a hihsak u a, belamno chu LALPA kawmah a lân u a.

¹⁸Zie ban achun, Ephraim nam apat te, Manasseh nam apat te, Issakar nam apat te leh Zebulun nam apat hung tamtak te chun le kithiensakna kithawihna a bawl puou a, Chiehkân kut chu diklo takin a mang tau a. Leng Hezekia chun a mau haw dingin hiti hin a paucham sak ta a:

¹⁹“Aw LALPA, ka pileputeu Pathien, a lungthim tak u a hun hote chu, sakhuo dana thienglo himahleu le na phatna chun ngaidam in,” a ti a.

²⁰Tichun, LALPA’n Hezekia pauchamna chu a dâwng a, mipite chu a sudam ta a.

²¹Israel mi Jerusalem a umte chun chângthâk chawl sawhloh kut chu kipâk takin ni sagih a mang u a; chun, Levi te leh thiempute chu kingkang ngeihtak tawh theihtawp a la sa’n ni chengin LALPA a pakchau a.

²²Hezekia chun Levi te chu LALPA hona ma a puihthiem ziek u chun a pakcha a. Chun, amau chun Kut ni sagih sung chun, kithawihna te lân in, a pileputeu LALPA Pathien kawma suol thuphachawihna nei in ante a neu hi.

²³Mipite chun ni sagih dang kut matbeh dingin a kithuguol tau a, tichun ni sagih dang chu kipâk takin a mang kit tau hi.

²⁴Chun, Juda lengpa Hezekia chun mipite nek dingin bâwngchal sangkhat leh belam sangsagih a pie a, milien ten le mipite chu bâwngchal sangkhat leh belam singkhat a pieu a, thiempu tamtak te a kisuthiengtho u a.

²⁵Tichun Juda mipi chengcheng chu thiempu te tawh Levi te tawh, Israel gam apat a mipi hung chengcheng te leh nam dang Israel gam apat a hung Juda gama umte chu a kipâk mah mah mai u a.

²⁶Khutichun kipahna lopitak Jerusalem achun a um ta a: Israel lengpa David chapa Solomon a pat in khutibang himhim chu Jerusalem ah a na um kha puoi.

²⁷Khutichun thiempute leh Levi te chu a dingdawk u a, mipi te dingin LALPA vangsakna a ngên u a, vana a In apat in Pathien in a pauchamnau chu a ngaihthak saka, a pawm sak ta a.