Read Gangte 2 KHANGTHUBU 33 Bible Online

2 KHANGTHUBU 33 - Gangte bible

2 KHANGTHUBU 33

¹Manasseh a lal tûngin kum sawmlenih mi a hi a; Jerusalem ah kum sawmnga leh nga vai a hawm a.

²LALPA mitmuh in thil phalo, Israel chate ma a LALPA’n a nawhdawk Pathien helo namte’n thil kihdak-um tak a hih bang uh a ma’n a hih sek a.

³A pa Hezekia’n a na sukchipsa, milim hona munte chu a sa pha kita, Baal te dingin maichâm a bawl a, Asher limte a siem a, Aksi te chengcheng khu a ho a, a na teu a sem hi

⁴“Jerusalem achun ka min um zing ina,” ti a LALPA’n a genna mun a chun milim hona maichâm te a siem a.

⁵Ho-In huongsung mun nih te a chun, aksite hona dingin maichâm a siem a.

⁶Hinnom chapa luiphai achun a chapa te chu hâlmanga kithawihna dingin a pie; a Phunsân te a chîng a, dawite a mang a. Khutlam-ente leh dawithiemte a guoi sek a. LALPA deihloh lam gitloh na nasa tak hih in a sulungna ta a.

⁷Chun, Pathien in David leh a chapa Solomon kawm a, “Zie Ho-In leh Jerusalem khuo hi, Israel nam cheng lak a kumkhuo a ka min umna mun ding a ka guot a hi a,

⁸thu ka piek chengcheng leh dân chengcheng te, thu guotte, thilhih ding te Mosi manga ka piek kha a zawp phawt u chun, a pileputeu ka pieksa gam apat chun Israel te nawhdawk phal puo’ng ka,” a na tihna Ho-In a chun amah siem, milim siemkawm a kawih a.

⁹Khutichun, Manasseh chun Juda te leh Jerusalem mite chuh thil a sukkhelh sak a; tichun LALPA’n Israel te ma a a sukmangthai namte sang bawn in thil a hih gilo zawu a.

¹⁰Chun, LALPA’n Manasseh leh a mite kawmah thu a gen sek a; himahlele, a ngaihsak puou hi.

¹¹Zieziekchun LALPA’n Asuria sepaih lawiupa te a sawl a, Manasseh chu thikkhau in a khit u a, kawl a buhsak u a, Babulon ah a pui tau hi.

¹²A thuok gimtheihna apat chun LALPA lam a nga kit a, a pilepute Pathien masang achun nasatak in a kingainiem a.

¹³A kawmah a paucham a, LALPA’n a ngetna chu a ngaihthak sak a, Jerusalem a a gam ah a puikit tai. Tichun Manasseh in LALPA chu Pathien a hih a he ta a.

¹⁴Zie nung chun Manasseh chun David khawpi suohlam pang a kulh bâng pawnung zaw chu, Gihon luiguom apat in, mâllam pang a Nga kawt khâk chan in a sânlam chu a siem beh a, a biel khawpi chu Ophel a kitii. Juda gam kulh nei khawpi cheng achun, sepaih hawn te enkawl dingin sepaih miliente le a kawih vek a.

¹⁵Gam dang pathiente leh milimte Ho-In apat chun a lamang a, chun, Ho-In um na tâng leh Jerusalem a maichâm a siem chengcheng te chu khawpi apat in a la dawk a, a paih vek ta a.

¹⁶LALPA Hona maichâm chuh a siempha a, kipawlkhawmna thillat te leh kipah thugenna thillat te a lân a, Juda mipite chengcheng chu LALPA Israel te Pathien ho dingin thu a pie a.

¹⁷Mipite chu mun sang haw achun a na kithawi zing u a; amahvang chuh LALPA a Pathien kawm mai ah a hi zaw tai.

¹⁸Chun, Manasseh chanchin dang chengcheng te, a Pathien kawma a paucham thute, LALPA Israel te Pathien min a thiemgau in a kawm u a a thugen te haw chu, Israel lengte chanchin lak ah a kizik hi.

¹⁹Chuleh, a pauchamnate leh, Pathien in a dawnna thute, a kikawihniem ma a a gitloh na chengcheng, milim ho na a siem, Asher pathien lim leh milim siemkawm a tundawkna mun chengcheng te chuh thiemgau chanchin zik na bu ah a kizik vek hi.

²⁰Khutichun, Manasseh chu a pulepate kawmah a ipmu ta a, amah In ah a vui u a, a chapa Amon chu a thasang in a lal tai.

²¹Chun, Amon chu a lal tûngin kum sawmlenih mi ahi a; Jerusalem ah kum nih vai a hawm a.

²²A pa Manasseh bawl guol mah in LALPA mitmuh in thil phalo a hih a; a pa Manasseh in a siem milim siem kawm chengcheng chu a ho a.

²³Himahleh a pa banglo tak in, kingainiem in LALPA lam a nga kit nuom puoh a; a pa sangin a gilo zaw ta a.

²⁴Amon miliente chun a phielguu a, a leng in achun a that tau a.

²⁵Juda mipi te chun Amon thatte chu a that vek u a, a chapa Josia chu leng in a siem tau a.