Read Gangte 2 KHANGTHUBU 34 Bible Online

2 KHANGTHUBU 34 - Gangte bible

2 KHANGTHUBU 34

¹Chun, Josia chu Juda te chunga leng a hung hih in kum giet a upa a hi a, Jerusalem ah kum sawmthum vai a hawm a.

²LALPA mitmuh in thilpha a hih sek a, a pu leng David lampi hawh in, veilam ahim changlam ahim ah a petsan puoi.

³Chun, kum giet a lal kum in naupang cha a hih lai apat in a pu David Pathien a ho pan a; chun kum sawmlenih a lal kum in Juda gam leh Jerusalem a milim hona munte, Asher pathien limte, milim siemkawmte, milim sunkhawm te chu a thielngim a.

⁴A mah puihna nuoi achun, a mite chun Baal hona maichâm te chu a khen gawp u a, a kawma gimlim hâlna te chu a susieu a. Asher limte leh milim dang cheng te chu le, a khên nêl u a, a nêl chu, a kawma kithawihna siem sekte thân chungah a theh u a.

⁵Milim thiempu te guh chu a honau maichâm achun a hâl a. Zie tawbang hin Juda gam leh Jerusalem chu a suthiengtho ta ahi.

⁶Khutibangmah chun Manasseh te, Ephraim te, Simeon te, Naphtali khawpi te suksieta umna munte achun le a siempha a.

⁷Mâllam lal gamsung cheng a, maichâm leh Asher limte chu a khen gawp a, milim te chu a sunel a, gimlim hâlna te chu a susie vek ta a. Tichun Jerusalem ah a vai kit tai.

⁸Chun, a vaihawm a kum sawmlegiet na chun milim pathien hona te subei a, a gam leh Ho-In te a sukthien nung chun, leng Josia chun Ho-In siempha dingin mi thum a sawl a; Azaliah chapa Shaphan te Jerusalem a vaipuopa, Maseiah te, Joahaz chapa Joah te ahiu.

⁹Thiempu Hilkiah kawmah a chieh u a, kawtkhak veng Levi te’n Manasseh mite, Ephraim mite, Israel mi a na umsun te, Juda leh Benjamin mite, Jerusalem a mite kawm apat a a na lakkhawm uh paisa chu a pieu a. Jerusalem achun a vaikit tau hi.

¹⁰Chun, amau in zie chu Ho-In sate enkawl te khut ah a pieu a; tichun, amau in zie chu LALPA In a nasemte kawmah In sakna ding leh etkawlna dingin a pie sawn ui.

¹¹Juda lengte’n a na suksiet sau Ho-In siemphatna dingin suong sekte, leh a zawpna leh a inkam haw ding thing chawkna din khut thiemte leh insate chu a pieu a.

¹²Na sem mipite chun ginum takin a sem u a; a lawiupateu, nasep endikte chu, Merari chapa te laka Levi mi Jahath leh Obadia te, Kohath mi chapa te laka Zekaria leh Meshullam te ahiu a. Levi te chu thil tum thiem tak le ahiu ui.

¹³Levi te chu a puok a puok thawh; mite lawiupa le ahiu a, na tincheng semte sep ding endikte, lehkhazik mite, lawiupate, leh kawtkhak vengte enkawl te ahiu ui.

¹⁴Thil kawihkhâwm na apat a paisa a lâkdawk lai u chun, Hilkiah chun LALPA dân bu, Dan Pathien in Mosi a piek kha a mu ta a.

¹⁵Shaphan kawm achun, “Zie Ho-In a hin Dan bu ka mudawk tai” a ti a. Lehkhabu chu Shaphan kawmah a pie a,

¹⁶Shaphan chun a la a, leng kawmah a chiehpih ta a. “Thu na piek chengcheng chu ka hih vek tau ui.

¹⁷Ho-In a dangka kikawih chu le ka ladawk u a, na semte leh a enkawl te kawmah ka piedawk tau ui,” ti’n a va gen a.

¹⁸“Ziehi Hilkia’n lehkhabu ei piek a hi,” a vak ti a. Leng zak a chun ngeih tak in a sim ta a.

¹⁹Leng in lehkhabu kisim gi a zak phet chun, a puon a bawtthêk ta a, tih ngaihna he lo in.

²⁰Hilkiah te, Shaphan chapa Ahikam te, Mika chapa Abdon te, lehkha zikpa Shaphan te leh leng panpih Asai te kawm achun,

²¹“Chieh unla, kei leh Israel gam leh Juda gam a mipi ana damsun te ding hin LALPA ei va dawtsak tiem u. Zie lehkhabu a thu umzie hi hawldawk unla. I pileputeu in LALPA thu a na zawp loh ziekun leh, zie lehkhabu a hih ding kitite a hihloh ziek un LALPA chu I chungu ah a lung ana tai,” ti’n thu a pie a.

²²Leng thupiek in Hilkiah leh mi dangte chu Jerusalem a cheng, thiemgau numei khat Hulda kiti dawng ding chun a chieh tau a. a pasal Shallum, Tikvah chapa Harhas tupapa chu, Ho-In a silhlechen enkawl ahi, (amah chu Jerusalem a Misne a um ahi) thil umdan chu a kawmah a gen u a.

²³Amahnu chun amau, haw chu leng kawm a kilehkit a, a kawm a,

²⁴zie LALPA thugen te hi va hilh dingin a sawl kit ta a: “Jerusalem leh a mipite chu, leng zaka lehkhabu kisima kizik hansie chengcheng chun gawt ding ka hi.

²⁵Ei deih puou a, pathien dangte kawmah a kithawi u a, a thilhih teu in ka lungnatna a chawktho uh ahi. Jerusalem chung achun ka lungnat na a puokzak a dai kit ngei puo’n a.

²⁶Lengpa chung thu ahih le vang Kei, LALPA Israel te Pathien in ka gen chu ziehi ahi, ‘Lehkhabu a kizikte chu na ngaitha a, Jerusalem gawt ding ka na guot na het in,

²⁷na kisik a, ka masangah na kingainiem a, na puonte bawtthêk in, na kap ta a, na pauchamna ka he a,

²⁸Jerusalem chunga gawtna ka tunsak ding chu na thih masang in tung puo’n a. Thamuong taka hun thih sak ding ka hi’ a tii,” ti’n. Zie thuchah pum chun mite chu leng kawmah a kileh kit tau a.

²⁹Chun, leng Josia chun Juda leh Jerusalem a upa chengcheng chu a sam khawm a.

³⁰Thiempu te leh Levi te leh mipi chengcheng hausa leh chagah te a bawn un Ho-In ah a chieh tau a. A bawn u a masang a chun Ho-In a thugawlh na bu kimu chu leng in a bawn in ngeih tak in a sim ta a.

³¹Lengpa chu a mun ah a dinga, zie lehkhabu a kizik thu gawlh chu zawpa a lunggil chengcheng leh thagau chengcheng a LALPA zui ding leh a thupiek te, a thu hetsakte, a thuguot te pawm dingin LALPA ma achun thu a thun a.

³²Jerusalem leh Benjamin mite chengcheng chun zie banga chu thutiem dingin a ti a. Jerusalem a mite chun Pathien, a pileputeu Pathien thugawlh bang chun a hih u a.

³³Leng Josia chun Israel gam in a huop chengcheng a pat in thil kihdak-um cheng chu a paihmang a, Israel gama um chengcheng te chu LALPA a Pathien uh na a sepsak a. Chun, a damsung in LALPA a pileputeu Pathien na chu a sem ui.