Read Gangte 2 KHANGTHUBU 36 Bible Online

2 KHANGTHUBU 36 - Gangte bible

2 KHANGTHUBU 36

¹Tichun, zie gam mite chun Josia chapa Joahaz chu a pui u a, Jerusalem ah a pa thasanga leng dingin sathau a nuh tau a.

²Joahaz chu a lal pat tûngin kum sawmnih leh thum mi ahi a, Jerusalem ah tha thum vai a hawm hi.

³Chun, Aigupta leng chun a leng hihna Jerusalem ah a subei a, a gam apat leiman dangkaguo talent zakhat leh, sana talent khat a lieu sak tai.

⁴Chun, Aigupta lengpa chun a suohpihpa Eliakim chu Juda leh Jerusalem ah leng in a siem a, a min chu Jehoiakim ti’n a then sak a. Chun, a suohpihpa Jehoahaz chu Neko chun a mana, Aigupta ah a pui tai.

⁵Chun, Jehoiakim chu a lal pat tûngin kum sawmnih lenga mi a hi a, Jerusalem ah kum sawmlekhat vai a hawm a, LALPA a Pathien mitmuh in thil phalo a hih sek a.

⁶Tichun, Babulon lengpa Nebuknezar chu amah do dingin a hung kuon a, Babulon lama puih dingin, kawl a buhsak ta a.

⁷Tichun, Nebuknezar chun Ho-In a umlebelte le Babulon ah a puoh a, a pathien In ah a kawih ta a.

⁸Jehoiakim chanchin dangte, thil kihdak-um a hihte leh a um dante chu, Israel leng leh Juda lengte chanchin bu ah a kizik a; chun, a chapa Jehoiakin chu a thasang in a lal tai.

⁹Chun, Jehoiakin chu a lal pat tûngin kum giet mi a hi a, Jerusalem ah tha thum leh ni sawm a lal a, LALPA mitmuh in thil phalo a hih sek a.

¹⁰Kum a hung kihei phetin leng Nebuknezar in Jehoiakin chu Ho-In a ûmlebel hawih taktak te tawh Babulon ah sal in a pui a, a paneu Zedekiah chu Nebuknezar in Juda gam leh Jerusalem ah leng in a siem hi.

¹¹Zedekiah a lal pat tûngin kum sawmnih leh khat mi a hi a, Jerusalem ah kum sawmlekhat vai a hawm hi.

¹²LALPA a Pathien mitmuh in thil phalo a hih sek a; LALPA apat a thugen thiemgau Jeremia ma achun a kikawihniem nuom puoh a,

¹³Chun, Pathien min a kihâksiel sak lengpa Nebuknezar chung ale a hel a, a genhak a, LALPA Israel te Pathien lam ngalo dingin a lunggil a sukhauh a.

¹⁴Zie bân achun Juda lawiupa te leh, thiempute leh mipite chun a kimvel u a namte thilhih gitlohte chu hih in milim te a ho u a. Khutichun LALPA’n Jerusalem a a sukthienthosa Mun thiengtho chule a hihbuok tau a.

¹⁵LALPA a pileputeu Pathien chun amau haw leh Ho-In chu humbit a nawp ziekin, a hilhgaih dingin thiemgau te a sawl zel a.

¹⁶Himahleh Pathien mi sawlte chu a na musit u a, a thugen chu a ngaihsak puou a, Thiemgau te chu a nuihsan u a, suohchak na himhim umlo khawpa, LALPA lungnatna a mite chunga a tun ma chun.

¹⁷Khutichun LALPA’n Babulon leng chu amau haw a do sak ta a. Leng chun a tangval teu chu a that a, Mun thiengtho sung na tieng ah chemzâm in a that a. upa leh teksie leh, nungak leh tangval te le, a zawng a hât kuomah chungah lungsietna neilo in, Pathien in a bawn un a khut ah a pie tai.

¹⁸Chun, Babulon leng chun Ho-In chu a buluh a, Ho-In a sumte leh, leng leh a miliente go chengcheng leh thil dang cheng chu a la a, Babulon lam ah apuo mang vek ta a.

¹⁹Ho-In leh khawpi chu a hâl a, leng in leh a hauhsak na chengcheng te tawh, chun, khawpi kulh bâng chule a suchim a.

²⁰A suokcha sunte chu Babulon lam ah a pui a, tichun amau haw leh a suonteu chu Persia lalgam hung din ma cheng chu suok in a um tau ui.

²¹LALPA’n thiemgau Jeremia manga thu a gen chawlhni mang thei lo a a um sung uh kum sawmsagih, chawlhni a mat theih kit chan un, gam chu sukgawt in um in a, a tih kha a hung guitunna ahi.

²²Chun, Persia lengpa Kura hung lal kum khatna achun, LALPA’n thiemgau Jeremia manga a na thugen te chu a guitun kim theih na dingin; zie thu piekte hi zik thawh a thakdawk a, a gamsung pumpi a ngeihtaka sim dawk dingin leng Kura lungthim a chawktho ta a.

²³“Ziehi Persia leng Kura thupiek chuh ahi. Leichung a lalgam chengcheng chu LALPA Van Pathien chun ei pie ta a, chuleh, Juda gama Jerusalem achun a In sa dingin thu ei pie a. Nanguh a mite laka kuo a chieh ding? LALPA a Pathien in umpih henla, va chieh to hen, ti’n.”