Read Gangte 2 KHANGTHUBU 4 Bible Online

2 KHANGTHUBU 4 - Gangte bible

2 KHANGTHUBU 4

¹Chun, leng Solomon chun sumeng maichâm, a dunglam tawng sawm nih, a vailam tawng sawmnih, a sânlam tawng sawm le a siem a.

²Sumeng dân lientak, a gei leh a gei kikal a tawng sawm kithawl, a san lam tawng nga le a sung a; a gei kimvel chu tawng sawmthum ahi.

³A gei nuoi chu pak mûm lim haw’n a kimvel suok a, tawng khat sung ah sawm zel, sumeng dân kimvel chun a um a. Pak mûm lim chu tien nih a hi a, sumeng dân a chu sun khawm ahi.

⁴Zie chu sumeng bâwngchal sawmlenih chungah a kinga a, thum in mâllam a nga a, thum in tumlam a ngau a, thum in simlam a ngau a, thum in suohlam a ngau hi; chun, sumeng dân chu ziehaw chung a chun a kilui a, a nung lam un sunglam a ngâi.

⁵Chun, a sahdan chu khutpêk chan in a sah a; a gei chu khawn gei tawbang, lili pak banga siem ahi a, bath sangthum dawl ahi.

⁶Kisilna ding kuong sawm le a siem a, Ho-In changlam pang ah nga a lui a, veilam pang ah nga a lui a; ziehaw chu hâlmang thilpiek sawpna ding ahi a; sumeng dân chu vang thiempute kisilna ding ahi.

⁷A siem dân ding guotsa bang in sana thaumei kawihna sawm a siem a, Ho-In sung a chun changlam ah nga, veilam ah nga a kawih a.

⁸Dawhkhâng sawm le a siem a, Ho-In sung a chun changlam ah nga, veilam ah nga a kawih a, Sana kuong za khat a siem hi.

⁹Zielo chule thiempu te dingin huong leh huong lien te a um a, huong kawtkhakte a bawl a, sumeng in a luon khum hi.

¹⁰Tuibel dân chu In changlam pang suohlam ah sim dawh in a lui hi.

¹¹Huram in belte, vutluoh te, kuongte, a siem a.

¹²Khutichun Ho-In a dinga Leng Solomon a siem sak chu Huram in a zo ta a;

¹³Zie tuomna pawl chilchel nih dinga vaimimthei banga siem za li te, khuom sip a bel banga bawk nih tuomna ding pawl chilchel gêl gêl dinga vaimimthei tien nih te.

¹⁴Thilluihna te, thilluihna chunga bel te le a siem a;

¹⁵dân khat leh a nuoia bâwngchal sawm le nih te tawh.

¹⁶Bel te, vutluoh te, sa thukna te, leh ûmlebel te chengcheng chu Huram chun LALPA in a dingin sumeng nawtval a leng Solomon thupiek banga a siem sak ahi.

¹⁷Ziehaw chu Jordan phaicham ah Sukkoth leh Zereda bellei mun ah leng chun a sung hi.

¹⁸Khutibang chun Solomon in ûmlebel tamtak a siem a, sumeng chu bûk sen guol ahi puoi.

¹⁹Chun, Solomon in Pathien in a ûmlebel um chengcheng chu a siem a, sana maichâm te, etsakna chângthâk dieh na dawhkhâng te;

²⁰guot bang a munthiengtho mai a det ding thaumei kawihna te, a thaumei pum in, sana thiengkei in a siem a;

²¹chun, pakcha te, thaumei te leh chaicheh te chu sana thiengkei in a siem a;

²²chun, thaumei puon chehna te, kuongte, thikkhe te, meilakna te, chu sana thiengkei mah in: chun, insung lutna, in sungnung zaw mun thiengtho pên kawtkhak te leh a in, Ho-In kawtkhak te chu sana a siem ahi.