Read Gangte 2 KHANGTHUBU 7 Bible Online

2 KHANGTHUBU 7 - Gangte bible

2 KHANGTHUBU 7

¹Chun, leng Solomon a paucham zawhin, van a pat in mei a hungkie suk a, hâlmang thilpiek leh kithawihna te chu a hun katum ta a; tichun, LALPA lopina’n Ho-In chu a hung dim ta a,

²Ho-In chuh LALPA lopina a a dim ziekin thiempu te chuh a lut thei ta puou hi.

³Israel chate chengcheng chun van a pata mei hung kie suk leh In chunga LALPA lopina chu a muh phet un, suong kilem chung achun maia lei si’n a bawkkhup u a, “Pathien a ho u a, LALPA a pakchau a, Amah chu a pha ngâla, a lungsiet na chu kumkhuo’n um ding ahih ziekin,” a tiu a.

⁴Tichun leng leh mipite chun LALPA masangah kithawihna te a lân u a.

⁵Chun, leng Solomon in kithawihna bâwngchal singnih leh sangnih leh belam nuoi khat leh singnih a lân a. Khutichun leng leh mipi te chun Pathien In chu a lân ui.

⁶Chun, thiempu te chu a mau mun chiet achun a ding u a, chun Levi te le LALPA kawma kipah thu genna dinga David in a phuok, “A lungsiet na chu kumkhuo’n um ding ahi,” ti a LALPA pahchakna a David in a mat sek, thil githei tawh LALPA la sa’n a ding u a; chun, alangkhat achun thiempute’n pengkun a mût u a, Israel te chengcheng chu a ding u a.

⁷Chun, Solomon in LALPA In mai huongsung haw chule a suthiengtho a; chun, Solomon in ana siem sumeng maichâm achun hâlmang thil latte, changbuong thillat, chun thaute latna ding a dawlloh ziekin, amah chun zie chun, hâlmang thilpiek, chamna thillat leh thaute a lân hi.

⁸Khutichun zie chunga chun Solomon leh Israel mi chengcheng, mipi kikhawm nasatak chu Hamath khaw lutna apat a Aigupta gam lui chan a mite tawh ni sagih sung a kut u a.

⁹Chun, ni giet ni chun kikhawpna lopitak a nei u a; maichâm latna’n ni sagih a lut a, chuleh, ni sagih sung mah ankuong luihna a nei ui.

¹⁰Chun, tha sagihna, ni sawm leh ni thum ni chun mipi te chu a kikhenzak u a, LALPA’n David leh Solomon leh a mi Israel te chunga a phatna a latsak ziek chun lawp tak leh kipâk takin mipi te chu a In lam chiet u ah a chieh tau hi.

¹¹Khutibang chun leng Solomon in Ho-In leh leng In chu a zo ta a; a lunggil a a tup bangtak in Ho-In leh amah In chu lamzang takin a zo ta a.

¹²Chun, LALPA chu Solomon kawmah zan in a hung kilak a, a kawmah, “Na pauchamna ka na za a, zie Ho-In hi kei a ding a kithawihna latna dingin ka guot tai.

¹³Vante ka khak a guoh te a zuk loh in ahim, khaupe te ka sawl a, gam te a suksiet uh ahim, ka mite laka hi ka lênsak ahim inle,

¹⁴Ka minpu ka mite chuh, kingainiema a paucham uh a, ka mel a hawl uh a, a umdan giloteu kisik a a haihsan u chun, van apat in a na ngaitha’ng ka ting, a gitloh nau ngaidam ing ka ting, a gam uh sudam kiting ka.

¹⁵Chun, zie muna a pauchamna lam u ahin ka mit hak ka ting, tichun, ka bil dawh ing ka.

¹⁶Kumkhuo a ka min umna dingin zie In hi ka tel a, ka suthiengtho tai: zie tak ahin ka mit leh ka lungthim chu châm zing ta’n a.

¹⁷Nang chungchâng thu a le na pa David banga ka mitmuh a na um a, thu ka hun piek bang zel a na um a, ka thuguot te leh ka vaihawmte na pawm chun,

¹⁸Na pa David kawma, Israel te chunga vaihawm ding na suonte kitasam puo’n la, ti a ka thuthun bang khan sudet ing ka.

¹⁹Himahleh na mau a ka zam, ka dante leh ka thupiek te hi na kiheisan u a, pathien dangte na nasep u a na ho u chun,

²⁰amau haw ka piek gam apat hin hun sumangthai ing ka ting; Ho-In ka min umna dinga ka sukthienthosa hih ka mitmuh phâk loh ah chawnmang kêi ing ka ting, namtin lak ah ênghona leh a sie lam a tehkalna’n siem ing ka.

²¹“Chun, zie In lopi tak hile a kawm hawh chengin maksa takin, ‘Bang zieka zie gam leh zie Ho-In hi LALPA’n hiti banga hih ahih a hi?’ ti’n au.

²²‘LALPA, a pileputeu Pathien Aigupta gam a pata puidawkpa chu a lehngatsan u a, pathien dangte a bel u a, a ho u a, a nateu a sep ziek un a chung u ah thil phalo tin cheng tung ahi tai, hun ti’n au,’” a ti a.