Read Gangte 2 KHANGTHUBU 9 Bible Online

2 KHANGTHUBU 9 - Gangte bible

2 KHANGTHUBU 9

¹Chun, Seba lengnu’n Solomon minthan dân a na het in Solomon chuh thu hak tak taka patep guon, nungzui tamtak pui in sangawngsau haw a thil gimlim leh sana tamtak leh suongmantamte puo’n Jerusalem ah a va chieh a, Solomon kawm a va tun chun, a lunggil a um chengcheng chu suoh dawkin a hopih a.

²Tichun, Solomon in a thu dawt chengcheng chuh a hilhchien a; Solomon in a dâwn theih loh himhim a um puoi.

³Chun, Seba lengnu’n Solomon chit dân leh a In sakte a muh phetin.

⁴A dawhkan a nek dingte, a suokte chut dân te, a nasemte nasep dante, a kichei dân teu, a khawn pie mite leh a kichei dân teu, Ho-In a va chieh tohna haw a mu a, gen ding helo khawp in mak a sa a.

⁵Tichun, lengpa kawm achun, “Na thilhihte leh na chit dân thuthang ka gama ka na zak kha a dik takzet ahi hi uo!

⁶himahlele keimah mit ngêi a ka hung muh ma sieh a gen mai uh ka taksang puoh a, na chitna lopi dân kimkhat le ei na hilh puou hi: na minthanna ka na zak dân chu na khel vek hi.

⁷Na nasemte mi hampha ahiu ui, zie na suok na kawma um zinga na chitna thu ngaitha zing sekte hi a hampha na lâwm lâwm u e!

⁸LALPA na Pathien, na chunga kipâk, a leng dingu a lalchutphah a hun chut sak LALPA na Pathien chu pahchak in um hen; na Pathien in Israel te kumkhuo a hihdet dingin a hehpih a, zieziekchun diktaka vaihawm dingin a leng dingu a a hun siem na hi hi,” a ti a.

⁹Khutichun leng chu sana talent za leh sawmnih leh thil gimlim tamtak mai leh suongmantamte a pie a, Seba lengnu’n leng Solomon thil gimlim a piek tawbang himhim hi a um puoi.

¹⁰Chun, Solomon suokte leh Huram suokte, Ophir a pata sana va pawte chun le algum thing leh suongmantamte a hun puou a.

¹¹Solomon chun algum thing in Ho-In kalbi leh leng In um na ding leh lasa mite dinga kingkang leh tumgit in a siem a: khutibang chuh Juda gam ah tuma lam in a na um kha ngei puoi.

¹²Leng Solomon inle Seba lengnu chu a nget taphawt chu a pie a, khutichun Seba gam lam ah a lawite tawh a chieh kit tau hi.

¹³Khutichun Solomon kawma kum khat sunga sana hunglut gik dân chu sana talent za gup leh sawmgup leh gup bûk ahi.

¹⁴Mi kiveite leh sumkawlvei te leiman simloh in, Arabia lengte chengcheng leh gam vaipawte’n Solomon kawma sana te, dangkaguo te a hun puoksak sek u a.

¹⁵Solomon in sana sêk pêk in phaw lien zanih a siem a: phaw lien khat ah sana sekel zagup a lut hi.

¹⁶Sana sek pêk in phaw neu zathum a siem a; phaw khat ah sana sekel za thum a lut a; ziehaw chu Lebanon gammâng In ah a kawih hi.

¹⁷Leng chun saiha lalchutphah lopi tak le a siem a, sana thieng kêi in a luon khum a.

¹⁸Lalchutphah a kaltohna kalbi gup te, lalchutphah tawh kimat sana keng ngakna te, chutphah sik tuoka bân ngakna te, bân ngakna kawma ding sakeibaknei lim nih a um a.

¹⁹Chun, kalbi gup siktuok chung achun sakeibaknei sawmlenih a ding u a; zie tawbang chuh khawimah gam ah a kisiem ngei puoi.

²⁰Chun, leng Solomon khawn chengcheng chuh sana vek ahi a, chun, Lebanon gammâng ina ûmlebel chengcheng te chule sana thiengkei chiet a hi a; Solomon damlai in dangkaguo bangma’n a ngai puou hi.

²¹Leng chun lawng hawn, Huram suokte Tarshis lama chieh sek kikawppih a nei a, kum thum hal cheng in tuipi a lawng hawn chun sana te, dangkaguo te, saiha te, zawngliente, vahuong te a hun puo sek hi.

²²Khutichun leng Solomon chu khawvel lengte chengcheng sang chun a hausa zaw a, a ching zaw ahi.

²³Tichun Pathien in a lunggil a a kawih, a chitna thu chu ngaitha dingin khawvel lengte chengcheng chun Solomon chu a hun zuon sausau sek u a.

²⁴A bawn u chun kum chengin piek bîk nei in dangkaguo belte, sana bel te, puonte, gâlvante, thil gimlimte, sakawlte, sabiltung te a hun pie chiet sek ui.

²⁵Leng Solomon in sakawl leh kangtalai kawihna sangli a nei a, chun, sakawl chung chuong mi singkhat leh sangnih a nei a, zie a khenkhat chu Jerusalem ah a kawih, a khenkhat chu khawpi dang ah a kawih a.

²⁶Euphrates lui a pata Philistia gam leh Aigupta gam chana leng chengcheng chunga vaihawm ahi a.

²⁷Chun, a lal sung chun, Jerusalem a dangkaguo chuh suong guolin a tama, sidar thing chuh phaicham a theipi bangin a tam hi.

²⁸Solomon in sakawl te Aigupta apat leh gamtin a pat in ahun tawl lut zung zung a.

²⁹Solomon chanchin dang chengcheng abul apat a tâwp tiengin, thiemgau Nathan thusim leh Shiloh mi Ahijah hilhlawkna buhaw leh, Nebat chapa Jeroboam thute tawh thiemgau Iddo in kilâkna a muhna bu ah a kizik chiet na hilo ahim?

³⁰Chun, Solomon chun Jerusalem ah Israel mi chengcheng chungah kum sawmli vai a hawm a,

³¹Tichun, Solomon chu a thi a, a pa David khawpi ah vuih a hi a, a thasang in a chapa Rehoboam chu leng in a chu ta a.