Read Gangte EZRA 4 Bible Online

EZRA 4 - Gangte bible

EZRA 4

¹Khutichun, Juda leh Benjamin melmate chun saltâng vaikit te’n LALPA Israel Pathien Ho-In ding a sau hi tih a na zak phet un,

²Jerubabel leh inkuon lawiupate kieng ah a hung u a, a kawm u ah, “Hun sak pih ung kau, kei un le nang haw bangin na Pathien u chuh ka hawl ngâl u a; Asuria lengpa Esar-haddon vaihawm laia kipat khan a kieng ah ka kithawi sek u a, ama’n ei pui tung tai,” a tiu a.

³Himahlele, Jerubabel leh Jeshua leh Israel inkuon lawiupate chun a kieng u ah, “Ka Pathien ho-in ding uh sak na ahin na tel na dinguh lampi a um hiel puoi; Persia leng Kura’n ei thupiek bangin kei u mai in LALPA Israel Pathien In ding chuh ka kisak dinguh ahi,” a tiu a.

⁴Khutichun, zie gam mite chun Juda mite khut chuh a sukchauh sak u a, a in sak u chuh a subuoi tau a.

⁵Persia leng Kura vaihawm sung cheng, Persia leng Daria vaihawm tiengin a thiltup uh susie dingin a gen pih ding mi a guoi hiel u a.

⁶Khutichun, Ahasuer vaihawm tûng lai in Juda leh Jerusalem a umte hêkna lehkha a zik u a.

⁷Chun, Artazerzias vaihawm lai chun Bislam, Mithredath, Teebel leh a guolte’n Persia leng Artazerzias chuh lehkha a thâk u a, a lehkha thâk u chuh Aramaic lehkhamal a kizik; Aramaic pau ahi.

⁸Dan thiem Rehum leh lekhazik thiem Shimsai chun Jerusalem a mite sietna dingin Persia leng Artazerzias kawmah hiti hin hêkna lehkha a thâk tau hi.

⁹Dan thiem Rehum leh lehkhazik thiem Shimsai leh a guol dangteu chun lehkha a thâk tau a; Dinai te leh Apharsath mite, Tarpel leh Apharsi mite, Arkiv leh Babulon te leh Susan mite leh Deha mite leh Elam mite tawh ahiu hi.

¹⁰Mi thupi leh zahum Osnapper hun puidawk, Samari khawpi leh Luipi gala gamdang haw leh mun dang danga um namte tawh ahiu hi.

¹¹Leng Artazerzias kienga a lehkhathâk u chuh zie tawbang hi ahi: “Na mite Luigal langkhat a um te’n chibai ka hun bûk ui.

¹²Na kieng apat a hung to Judate chuh Jerusalem a keihaw kieng ah a hung u a, khawpi kiphin hât leh gilo chuh a siem phau a, kulh bâng haw chuh a zo vang vang tau a, a suongphum haw chuh a phum tau hi tih leng in a na za hen.

¹³Zie khawpi hi a tundawk u a, a kulhbang haw chuh a siemphat kit u chun, lei man leh thil neih man leh chawk man te hun pie nuom puou untin, atawp leh leng a dinga sietna hung hi ding ahi.

¹⁴Leng In a etkawlna nuoia um ka hih ziek u leh, lengpa muolphona muh chuh kei u ding a a kilawm loh ziekin, mi ka sawl u a, lengpa chuh a hi dân tak ka hilh tau hi.

¹⁵Zieziekchun, na pileputeu thil tiemtehna bu a na hawl u chun, zie lehkhabu achun zie khawpi hi kiphin hât leh leng leh a lalgam a ding a thil lauh-um tak hih zieka hung sie ahi tih mudawk unlau, tih na hetna ding u a leng ka hun hetsak u ahi.

¹⁶Zie khuo hi a tun din u a, a kulhbang haw a sakphat kit u chun Luigal lam himhim achun chan neilo ding na hi tih leng ka hun hetsak uh ahi,” a tiu a.

¹⁷Khutichun, leng chun dân thiem Rehum leh lehkhazik Shimsai leh a guol dang teu Samari gama cheng a kithuohpih teu kawm leh, luigal lama umte leh midang dangte chibai ka hun bûk ui.

¹⁸“Ka kawma na lehkha hun thâk u kha ka masang ah kichien takin sim dawk ahi a,

¹⁹Tichun, thu ka pie a, a hawl u a, zie khuo hi malai apat in leng chungah a kiphin sek u a; zie chun, kiphinna leh buoina a suoh sek hi tih ka mudawk hi.

²⁰Jerusalem a khan leng thilhih thei tak tak, Luigal leh lam tienga vaihawm le a na um u a, sieh leh thil neih man leh leiman haw a la sek u a.

²¹Zie mite chuh chawlhsak unla, thu ka hun piekkit masang sieh in khuo chuh tungdawk kiu hen.

²²Zie hi kintak in hih zieng un, bang ziekin em lengpa chunga thilpha lo zaw diek a hung tun ding?” a ti a.

²³Khutichun, leng Artazerzias lehkha chuh Rehum leh lehkhazik thiem Shimsai leh a lawiteu masanga a sim zawh u chun, kin takin Jerusalem a Judate kawmah a chieh u a, thagum leh thuneihna mang in a nasep u chuh a chawlhsak tau hi.

²⁴Khutichun, Jerusalem a Pathien in a sak u chuh a chawlhsak tau a; Persia leng Daria vaihawm kum nih na tiengin nasep chuh a châwl tai.