Read Gangte EZRA 6 Bible Online

EZRA 6 - Gangte bible

EZRA 6

¹Khutichun, leng Daria’n thu a pie a, Babulon a go a kawihkhawmnau leh lehkhabu kawihna in chuh a hawl tau a.

²Tichun Media gama Akemath khuo a leng In a chun lehkhabuziel chuh a mudawk tau a; zie chun hitibang a kizik a kikawihtup ahi.

³“Leng Kura vaihawm kum khatna chun, lengpa ngêi chun thu a pie a, Jerusalem a Pathien Ho-In chungchâng thu ah, A In chuh sakkit hi henla, chun a suongphum chuh dettaka phum hi hen. Kithawihna a bawlna mun ngêi u a, chun a suongphum chuh dettaka phum hi henla; a sânlam chuh tawng sawmgup, availam le tawng sawmgup hi ding ahi.

⁴Suong lien tak tak tien thum leh thingpek thak tien khat ding ahi; chun, sum kiseng chengcheng chuh lengpa sum bawm apat a piek dawk hi hen.

⁵Chun, sana leh dangkaguo ûmlebel Nebuknezar in Jerusalem a Pathien Ho-In apat a a lâkdawk, Babulon lama a puok mang haw kha piekkit hihen la, Jerusalem a Ho-In a kawih kit hi hen la; Pathien Ho-In a amun chiet u ah kawih kit hi hen,” ti’n.

⁶“Zieziekchun, Luigal leh lama vaihawm Tatenai leh Shethar-bozanai leh Luigal a um lawiupa Arpharsak mite, zie apat chun kikiengkawih unla,

⁷“Zie a Pathien in a a nasep u hi subuoi kiu in; Juda vaihawmte leh Juda upate chun zie Pathien In hi a mun ngei mah ah sakit u hen.

⁸Zie mai chuh hilo in, Pathien Ho-In a sak nau ahin Juda upate chunga na thilhih ding u le hun hilh ding ka hi: Nasep a chawlh lohna dingin a sak na ding u le Euphrates luigal a lal in sieh a lâk sek apat a piek ding ahi.

⁹Chun, van Pathien kienga hâlmang thilpiek dingin bâwngchal tuoi te, belam chalte, belam note, buhte, chite, uain te, sathaute amamawh dungzui un Jerusalem a thiempute’n pawimawh a sak dungzui un nichenga a piek dinguh ahi.

¹⁰Khutichun.van Pathien kienga gimlim kithawihnate a piek u a; leng leh a chapa hinna dinga a paucham sak theih na dingun.

¹¹Thupiek ka piei, kuole zie thu sulamdang taphawt chuh a In a inkam bawhdawk sak hihen la, zie chun amah chuh kanden a khaihkang hi hen; tichun, a In chuh êk khûk a siem hi hen.

¹²“Chun, zie a a min um sak Pathien chun Jerusalem a Pathien in suksiet guo a, zie thu hih lamdang dinga khuttha taphawt chuh, leng leh nam chengcheng in amah chuh sumangthai hen; Kei Daria ngêi hin thu ka pie a, kintaka zuih ngâl hi hen.”

¹³Khutichun, Luigal leh lama vaihawm Tatenai leh Shetharbozenai leh a lawite chun leng Daria lehkha thâk chuh khutibang chun a hih zui ngâl u a.

¹⁴Chun, thiemgau Haggai leh Iddo chapa Zekaria thugen ziekin Juda upate chun In chuh lamzang tak in a sau a; Israel Pathien thupiek bangin Kura leh Daria leh Artazerzias Persia lengte thupiek dungzui in In chuh a sau a, tichun, a sazo tau a.

¹⁵Leng Daria vaihawm kum gupna, Adar tha ni thum ni chun zie In chuh zawh ahi tai.

¹⁶Tichun, Israel suon, thiempute, Levi chite leh saltâng pawtdawk haw leh a dang te chun Pathien In a lat nau chuh kipâk takin a mang u a.

¹⁷Chun, Pathien In latna achun bâwngchal zakhat, belamchal zanih, belam no zali a lân u a; chun, Israel te a ding a gitloh thawihna ding in Israel nam zat in kêlchal sawm le nih a lân u a.

¹⁸Khutichun, Mosi lehkhabu a kizik bangin Jerusalem a Pathien nasem ding chun thiempute leh Levi te chuh a pawl pawl in a kawih u a.

¹⁹Chun, saltâng pawtdawk haw chun, tha khatna, ni sawm leh ni li ni chuh Chiehkân Kut ni dingin a mang tau hi.

²⁰Thiempute leh Levi chite chuh a kisuthieng u a; a bawn un a thieng tau a. Khutichun, chiehkân kut na ding chun saltâng pawt te a ding leh-a suohpih uh thiempute leh amau haw a dingin gan a that u a.

²¹Chun, Israel suon sal pawtte leh LALPA Israel Pathien hawlte zie gama Pathien helo te buokna apat kikawih thiengtho te chun zie chuh a neu a.

²²Khutichun, chângthâk chawl sawhloh kut chuh ni sagih kipâk takin a mang u a, LALPA’n amau chuh a sukipak a, Pathien, Israel Pathien In sakna a a khut uh sukhat sak ding in Asuria leng lungthim chuh amau lam a ngat sak ta a.