Read Gangte EZRA 7 Bible Online

EZRA 7 - Gangte bible

EZRA 7

¹Chun, zie thil haw nung chun Persia leng Artazerzias vaihawm lai in Ezra chuh Babulon apat in a chiehto a, zie pa chuh Seraiah chapa ahi a, zie pa chuh Azaria chapa ahi, zie pa chuh Hilkiah chapa ahi.

²Zie pa chuh Shallum chapa ahi a, zie pa chuh Zadok chapa ahi a, zie pa chuh Ahitub chapa ahi a.

³Zie pa chuh Amaria chapa ahi a, zie pa chuh Azaria chapa ahi a, zie pa chuh Meraioth chapa ahi a.

⁴Zie pa chuh Zerahiah chapa ahi a, zie pa chuh Uzzi chapa ahi a, zie pa chuh Bukki chapa ahi a.

⁵Zie pa chuh Abishua chapa ahi a, zie pa chuh Phinehas chapa ahi a, zie pa chuh Eleazar chapa ahi a, zie pa chuh thiempu lien Aron chapa ahi.

⁶Ezra chuh lehkhazik mi, LALPA Israel Pathien piek Mosi dân thiem tak ahi a; LALPA a Pathien in a deihsak bangin a thil nget cheng chuh LALPA’n a phalsak zel hi.

⁷Chun, Artazerzias vaihawm kum sagihna a chun Jerusalem a Israel suon khenkhat, thiempute laka khenkhat leh Levi chite leh lasa mite leh kawtkhak vengte, Nethinim khenkhat chuh Jerusalem ah a chieh to u a.

⁸Khutichun, Ezra chuh kum sagihna, a tha ngana a chun Jerusalem ah a chieh to a.

⁹Tha khat na, ni khat ni’n Babulon apat in a pawt a, a Pathien in amah chuh a veng zela, tha nga na, ni khat ni’n Jerusalem a tung tai.

¹⁰Ezra chun LALPA Dan chuh he a zawp ding leh Israel kienga a thuguot haw leh vaihawmna sin sak dingin a lungthim a pie ta a.

¹¹Chun, Artazerzias in thiempu Ezra Lehkhazik thiem, LALPA thupiek leh Israel mite a dinga a thuguot sinsak kawma a lehkha thâk chuh ahi.

¹²“Kei lengte leng, Artazerzia’n thiempu Ezra, van Pathien Dan zikpa chuh chibai ka bûk ui. Artezerzias, lalte lal, thiempu van Pathien te Dan zikpa Ezra kieng ah thamuonna bukim zie tawbang hun hin um hen.

¹³“Ka gamsung a Israel mi chengcheng leh, a thiempu teu leh Levi chite Jerusalem a chieh kit nawp na lungthim nei chengcheng in hun zui u hen.

¹⁴Leng leh a siehmang mi sagih te’n, na khut u a um Pathien Dan bang zela Jerusalem leh Juda chung châng dâwp chien dinga nang a hun sawl guol un.

¹⁵Jerusalem a Israel te Pathien a ding a, a kiphal dungzui u a a piek uh sana leh dangka, leng leh a lemguotpihte’n a piek u chuh puo dinga a hun sawl na hiu hi.

¹⁶Babulon gamsung a na muh chengcheng uh dangka leh sana amau kiphal dungzui a mipite’n a piekkhawm uh, Jerusalem a Pathien In sak na dinga kipâk taka a piek khawm u haw tawh.

¹⁷“Bâwngchalte, belam chalte, belam note leh nek ding leh dâwn ding thillat te Jerusalem a na Pathien In u a maichâm a na lat theih na dingun.

¹⁸Chun, dangka leh sana mat-val haw chuh Pathien deih bangin na suohpih teu phasak dân in mang un.

¹⁹Chun, ûmlebel na Pathien In u a matchâk dinga a hun piek u chuh Jerusalem a Pathien kawma na lat dinguh ahi.

²⁰Chun, na Pathien In u a matchâk ding pawimawh cheng chuh lengpa sumbawm apat in la thei unlau.

²¹“Chun, kei Artazerzias ngêi in luigal leh lama sum enkawlte âwm ah thu ka pie ta a; khutichun, thiempu Ezra, van Pathien Dan lehkhazik pa’n nanguh kawma a nget cheng chuh kin taka na hih zel dinguh hi.

²²Dangka talent zakhat, buh tehna zakhat, uain bath zakhat leh athau bath zakhat leh chi zie zat hih tih um chuom lo in pie zieng un, ti’n thu ka piei.

²³Bang hileh, van Pathien thu hun piek phawt chuh van Pathien a dinga hih in um zel hen; bang ziekin em leng leh a chapate chunga lungnat na a um ding?

²⁴Chun, thiempute leh Levi chite, lasate leh kawtkhak vengte, Nethinim te leh Pathien In a zenvielte haw hih khasana leh thilneihman leh sieh haw chuh lieusak loh ding ahiu tih ka hun hetsak hi.

²⁵“Chun, nang Ezra na khuta um Pathien chitna bang zelin Luigal leh lama chêngte vai na hawm sak theih na dingin, lawiupa leh vaihawmte Pathien Dan he mite na guot sak ding ahi a, a helote chuh na sinsak ding ahi.

²⁶Chun, kuole na Pathien Dan leh leng dân zui lo taphawt chuh kin taka a chungthu vaihawm sak hi hen, thih na ahim, gamsung apat a nawhdawk ahim, a thuomphuo lâksak ahim leh suongkul a khum tieng inle,” a ti a.

²⁷Ezra chun, “I pileputeu Pathien chuh pahchak in um hen! Jerusalem a LALPA In zem hawih dinga hitibang a leng lungthim siempa leh mi lopi takte masanga ka chunga lungsiet na sulang pa chuh!

²⁸Chun, LALPA ka Pathien in ei lungsiet a, ei suhat a, tichun, ka kawma hung dingin Israel chate laka lawiupa deuh deuh haw chuh ka thuzawh thei ta a,” ti’n.