Read Gangte NEHEMIA 11 Bible Online

NEHEMIA 11 - Gangte bible

NEHEMIA 11

¹Tichun, mipite laka vaihawm te chuh Jerusalem ah a cheng u a, midang te chuh sawm laka khat zel khawpi thiengtho Jerusalem a cheng ding leh, sawm laka kuo te chuh amau khuo chieta cheng dingin phun a san u a.

²Chun, mipite chun Jerusalem a cheng dinga hung kipie te chuh a kipahpih u a.

³Ziehaw hi gambung lawiupa Jerusalem a cheng haw chuh ahiu (amah vang Israel khenkhat, thiempute, Levi chite, Ho-In a nasemte, Solomon suokte suon haw chuh Juda khawpi a chun a cheng u a, khawpi chuom chuom a chun amau gam chietah a cheng u a).

⁴Jerusalem achun Juda suonte leh Benjamin suon khenkhat chuh a cheng u a. Juda suonte lak ah: Perez suon apat, Mahallel chapa Sephatia, zie pa chapa Amaria, zie pa chapa Zekaria, zie pa chapa Athai, zie pa chapa Uzia leh,

⁵Shiloni suon a Zekaria chapa, Joiarib chapa, Adaiah chapa, Hazaia chapa, Kolhozeh chapa, Baruk chapa, Maaseiah ahi a.

⁶Perez suon Jerusalem a cheng te chuh a bawn un mi hangsan zali leh sawmgup leh giet ahiu hi.

⁷Benjamin suon apat in: Jeshai a chapa, Ithiel chapa, Maaseiah chapa, Kolaia chapa, Pedaia chapa, Joed chapa, Meshullam chapa Sallu ahi a,

⁸Chun, amah nungzui Gabbai leh Sallai te mi zakuo leh sawm nih leh giet.

⁹Zikri chapa Joel chuh a lawiupau ahi, Hassenua chapa Juda chuh khawpi a lawiupa pên bana ahi.

¹⁰Thiempute lak apat in: Joiarib chapa Jedaia leh Jakin.

¹¹Ahitub chapa, Meremoth chapa, Zadok chapa, Meshullam chapa, Hilkiah chapa Seraiah chuh Pathien In a lawiupa ahi.

¹²A nasep khawm pih uh zie In a nasemte chuh zagiet leh sawmnih leh nih ahiu hi; Malkijah chapa, Pashur chapa, Zekaria chapa, Amzi chapa, Pelalia chapa, Adaiah chapa Jehoram leh

¹³Inkuon a lawiupa chiet a nasep khawmpih uh zanih leh sawmli leh nih ahiu hi; chun, Imer chapa, Meshillemoth chapa, Ahzai chapa, Azriel chapa Amashsai tawh,

¹⁴a nasepkhawm pih uh mi hangsan zakhat leh sawmnih leh giet ahiu a; a lawiupau chuh Haggedolim chapa Zabdiel ahi.

¹⁵Chun, Levi chite lak ah: Bunni chapa, Hashabia chapa, Azrikam chapa, Hashub chapa Shemaiah tawh,

¹⁶Levi chite lawiupa te laka Pathien Ho-In pawlam enkawl Shabethai leh Jozabad tawh.

¹⁷Chuleh, Asaph chapa, Zabdi chapa, Mika chapa Mattaniah chuh pauchamna leh kipahthu genna bul pat pên ahi a, chuleh, Bakbukia a suohpihte laka a nihna leh Jeduthun chapa, Galal chapa, Shammua chapa Abdi ahi.

¹⁸Khawpi thiengtho a Levi chite chuh zanih leh sawmli leh li ahiu hi.

¹⁹Ziehaw tih loh chule, kawtkhak vengte chuh, Akkub, Talmon leh a a suohpih teu, kulh kawtkhak vengte chuh za khat leh sawmsagih leh nih ahiu ui.

²⁰Israel dangte chuh thiempute leh Levi chite tawh Juda khawpi haw achun a cheng u a, a pileputeu go a luoh chiet u a.

²¹Nethinim te chuh Ophel ah a cheng u a, Ziha leh Gishpa chuh Nethinim te lawiupa ahi.

²²Jerusalem a Levi te hotu pên chuh Uzzi Bani chapa, Hashabia chapa, Mattaniah chapa, Mika chapa ahi; Uzzi chuh Asaph suonte laka khat, Pathien Ho-In a lasate chunga mawhpuo ahi.

²³Ni cheng a lasate kisan dân ding chuh leng dân leh thupiek a chun a kizik hi.

²⁴Juda chapa Zerah suonte laka Meshezabel chapa Pethahiah chuh mipite chungchânga bangkim a leng palai ahi.

²⁵Chun, a khuo hawu leh gam thu a chun Juda suon khenkhat chuh Kiriath-arba leh a khawpel haw leh Dibon leh a khawpel te, Jekabzeel leh a khawpel haw a chun a cheng u a.

²⁶Jeshua leh Molada leh Beth-pelet haw leh,

²⁷Hazarshual leh Beer-sheba leh a khawneu haw achun a cheng u a.

²⁸Ziklag leh Mekona leh a khawneu haw tawh,

²⁹Enrimon leh Zareah leh Jarmuth mun haw chu tawh.

³⁰Zanoah, Adullam leh a khawneu haw leh Lakish leh lo mun haw achun le a cheng u a; Azekah leh a khawneu haw achun tawh a cheng u a. Beer-sheba apat in Hinnom phaicham tieng in a cheng u a.

³¹Chun, Benjamin namte chuh Geba apat in a cheng u a, Mikmas, Aija leh Bethel leh a khawneu haw achun a cheng u a.

³²Anathoth, Nob leh Anania mun haw a chun a cheng u a.

³³Hazor, Ramah leh Gittaim mun achun le.

³⁴Hadid, Zeboim leh Neballat ah.

³⁵Lod leh Ono, khutthiemte chênna phaicham ah.

³⁶Tichun, Juda gama Levi chi khenkhat chuh Benjamin gam achun a cheng ui.