Read Gangte NEHEMIA 13 Bible Online

NEHEMIA 13 - Gangte bible

NEHEMIA 13

¹Chun, zie ni chun mipite zak in Mosi lehkhabu chuh ngeih takin a sim u a, zie chun Amon te leh Moab te chuh Pathien mite kikhawpna achun bangtik lai inle a tel loh dinguh ahi, tih a kizik a.

²Israel chate chângthâk leh tui a muok lo a, amau hansie lawh dinga Balaam a gawih ziekun. Himahlele, ka Pathien un hansie chuh vangsak na chan sak ta a.

³Chun, hiti hi ahi a, dân thu chuh a ngaihthak zawh phet un Israel mite tawh a na cheng hel nam dang te chuh a khen dawk tau hi.

⁴Chun, zie masang hin Eliashib chuh Pathien In a neklechâk lama lawiupa’n a kawih u a, amah chuh Tobia tawh kikhutzawp ahiu a.

⁵Levi te, lasate leh kawtkhak veng te chanvo an thillat leh gimlim te, ûmlebel leh buhlebal sawma-khat leh uain thak leh sathau leh thiempute a dinga pei thillat kawihna dinga tu masanga kimang chuh Tobia a ding in a guonggalh sak a.

⁶Himahlele, zie hun lai chun Jerusalem ah ka um puoh a; Babulon leng Artazerzias vaihawm kum sawmthum leh kum nih a hih kum in leng kawma chun ka va chieh a, ni bang zat ahim nung in phalna ka mu a.

⁷Tichun, Jerusalem ah ka hungkit a, Eliashib in Pathien Ho-In pindante Tobia mat dinga a phalsak ka muh chun ka lungthim a khawih mah mah ta a.

⁸Zie thil chun ei sulungna ta mah mah a; tichun, Tobia thuomphuo in sunga um chengcheng chuh pindan apat chun ka paih dawk vek ta a.

⁹Tichun, pindan sung suthieng ding chun thu ka pie a, tichun, Pathien Ho-In a ûmlebel leh an thillat te leh gimlimte chuh a bawnin ka la lut kit vek ta a.

¹⁰Khutichun, Levi te chanvo ding chuh piek ahi puoh a, Levi te leh La sate chuh a chanvo dinguh piek a hih loh ziekun amau lo lam chiet ah a tai zak ui tih ka za kit a.

¹¹Tichun, vaihawmte chuh ka vau a, “Bang zieka Pathien In chuh ngaihsak loh a um zing ahim?” ka ti a. Khutichun, amau haw chuh ka sam khawm a, a mun chiet u ah ka luoh sak kit vek ta a.

¹²Tichun, Juda mi cheng chengte chun buhlebal sawma-khat leh, uain thak leh sathau sawma-khat haw chuh tuoklawm kawih khawmna achun a hun chawi tau hi.

¹³Chun, thiempu Shelemiah leh lehkhaziktu Zadok leh Levi chite laka Pedaia te chuh tuoklawm kawih khawmna In a a lawiupa dingin ka guot ta a. Amau haw kithuohpih ding chun Mattaniah chapa Zakur chapa Hanan ka guot a, ziete chuh mi muon-um ahiu a, a nasep pipen u chuh, a suohpihteu kawma thil hawp viel chuh ahi.

¹⁴Zieziek hin, Aw ka Pathien, ei hezing in, chuleh, ka Pathien In leh a nasep na dinga ka sep zawh sa, ginum taka ka thilhih phat te hi nuoimang hiel ki’n.

¹⁵Zie hun lai chun, Juda mi khenkhat chawlhni a uain thawk te, buhphal hun pawlut a, uain te, grep te, theipi te leh van puokgik chichuom chuom a sabiltung teu a hun puok sak haw chuh ka mu a; ziehaw chun chawlhni’n Jerusalem ah a hun pawlut u a. Chun, zie ni a nek ding a zawk u chuh a dikloh zie ka hetsak a.

¹⁶Zie tak achun Tura mite le a cheng u a, nga leh van chichuom chuom a hun puou a; chawlhni’n Jerusalem a Juda mite kawm achun a zuok sek u a,

¹⁷Khutichun, Juda milien te chuh ka hilhgaih a, a kawm u ah, “Thil phalo bawla, chawlhni na sukbuok u hi bang ti dana?

¹⁸Na pileputeu khan le hiti bang thil hi a na bawl u a, eihaw leh zie khawpi chung ahin Pathien in sietna a tun sak hilo ahim? Khutisa chun le chawlhni subuok in Israel mite chungah lungnatna sangzaw na tunsak u a,” ka ti a.

¹⁹Chun, hiti hi ahi a, chawlhni kipat ding ni a khuo a hung miel tieng leh Jerusalem kawtpi te chuh khâk ding leh chawlhni a beih masang sieh hawng lo dingin thu ka pie a. Tichun, ka suok te laka khenkhat chuh kulh kawtkhak achun ka kawih a; chawlhni a van gik a hun puoklut loh na dingun kawtkhak haw chuh ka ven sak a.

²⁰Tichun, sumkawlveite leh thuomphuo chitin zuokte chuh khatvei ahim, nihvei ahim chuh Jerusalem kulh pawlam ah a giek u a.

²¹Khutichun, a kawm u ah a dikloh zie ka hetsak a, “Bang zieka kulh panga giek na hiu hi? Khutibang hi na hih kit u chun na chung u a khuttha ding ka hi,” ka ti a. Tichun, zie ni apat chun chawlhni’n a hungkit ta puou hi.

²²Khutichun, chawlhni nit thiengtho ahih theih na dinga, Levi chite chuh amau kisuthiengtho a, kawtkhak veng ding in thu ka pie a. Aw ka Pathien, zie thu ahin le ei hezing inla, Na zahngaihna let dungzui in ei hing hawih in.

²³Zie lai chun Juda mi Ashdod numeite, Amon leh Moab numei kichênpih ka mu a.

²⁴A chate chun Ashdod pau kimkhat a mang u a, Juda pau thieng a mang thei puou a; mitin chuh nam dang pau in a pau mai u a.

²⁵Tichun, amau haw chuh ka vau a, hansie ka lawh a; khenkhat chuh ka zêp a, a sam hawu ka bawhthâk sak a. “Na chanuteu chuh a chapateu na neih sak loh dinguh ahi a, na chapateu chuh a chanuteu tawh na kichên sak loh dinguh ahi,” ti’n Pathien min sal in ka kipautiem saka.

²⁶“Israel leng Solomon khale zie tawbang thil ahin a gilo hilo ahim? Khutisa chun le, namtin lak ah amah banga Pathien in a deihsak leng dang a um puoi, Pathien in a lungsiet a, Israel chate chung ah leng in a siem a, himahleh, amah nasan chule gamdang numei te ziekin gitlohna ah a puk tai.

²⁷Khutia chuh gamdang numei zi a nei in, I Pathien uh chunga thil gilo tak hih dingin na thuu zawp ding ka him?” ti’n Pathien min in ka kitiem sak ta a.

²⁸Chun, thiempu lien, Eliashib chapa, Joiada chapa khat chuh Horon mi Sanballat mâkpa ahi a; zieziekchun, ka kawma pat in ka delhmang a.

²⁹Aw ka Pathien, amau chuh hezing in, thiempu dinmun leh thiempu thugawlh leh Levi te thugawlh haw chuh a subuok tau hi.

³⁰Khutichun, amau chuh gamdang mite apat chun ka suthiengtho a, thiempute leh Levi chite chuh amau sep ding chiet sem dingin ka guot a.

³¹A hunbi zela hâlmang thilpiek a mat ding thing leh buhthak masapen leh thai gah masapen hun chawi dingin mipite chuh thu ka pie a. Aw ka Pathien, ziehaw ziek hin a phalam in ei hezing in.